No tant il timp, ma il progres tecnologjc, al à fat lâ in dismentie putrôs imprescj, machinaris, argagns che i nestris vielis a’ vevin fat e doprât par agns e agnoruns. Un di chescj al è il vieri cjâr di len inferât.

Cemût âl podût capitâ che un imprest che par secui al veve vudis ben pocjs modificazions, al vignìs bandonât, no nome te sô costruzion ma ancje te memorie?

In dì di vuè, infat, no si sares in stât di cjatâ un zovin o ancje un di miege etât che si cjatas in câs di fâ un cjâr di chei di une volte. Cheste no jè colpe lôr sigûr di nò. La colpe o il merit, seont daûr che si ûl cjalâ, al è de grande buride che il progres al à cjapât tai ultins cinquant’agns.

Inmò par antîc, l’omp par stramudâsi di un sît a chel altri, al à simpri vût doprât nemai, venastai: cjavai o bûs tacâz tal cjâr.

Il cjâr di chês etis, pûr jessint di tancj secui indaûr, nol jere tant diferent di chel ch’al doprave il nestri von o nestri pari; si tratave simpri di un imprest di len e tignût adùn cun leandis, aruès e cjvilis.

A cjalâlu vuê, un di chei cjârs, si daressissi di maravee a viodi cetant len ch’al vignive doprât par fâ ce che vuê si fâs cun quatri tubui di açâr e quatri ruedis di gome.

In chê volte, paraltri, no jerin i profilâz tanche vuê e il fiêr al costave, sedial par comprâlu che par metilu in vore, un voli dal cjâf.

Cheste sorte di costruzion e à durât a lunc tai secui fin tal 1950 e daspò e à fermât a colp; si capìs che cul discomparî dai cjavai e dai bûs e cul rivâ dai motôrs, ancje il cjâr al mudà vuessadure e non e al deventà: rimorchio e dut in açâr.

Ce che paraltri lu à fat lâ in dismentie, daspò di tancj agns di onorât servizi, al è il fat di sei stât costruît, no di grandis fabrichis dulà che si doprin dissens e si lavore cun plans faz di ingegnîrs, ma in piçulis buteghis di artesans là che si lavorave a memorie, daûr ce che si veve imparât viodint a lavorâ i mestris dal mistîr ch’a jerin par vêr, artiscj dal fiêr e dal len; infat, no si à di crodi che fâ un cjâr e sedi une robe di pôc!

Bigne vê une buine cognossince dal legnam di doprâ, bigne savê ce len ch’al va doprât par ogni toc dal cjâr, si à di savê lavorâ di seselèt, di manàrie, di scarpèl e ancje intajâ, tal câs di cjârs di lùs; cundiplui si à di savê bati il fiêr, temperâ e boli e sei ancje un fregul artiscj tal fâ i ornamenz di fiêr batût.

Ducj chescj lavôrs, in tai timps passâz, a son stâz faz cence dissens e non son stâz lassâz, di lôr, studis e plans, par chel si è pierdude cussì facil la memorie.

Jo inalore, cence la pratese di insegnâ nuje, ma nome par suvignî almancul alc di chel imprest tant umil e cussì util, o ài pensât di fâ, a memorie, un qualchi schiz des parz ch’a compònin il cjâr e di un pâr di furnimenz par daongi i nemai, te sperance che a qualchidun i interessi.