Altres dôs bieles 

medaes par Buje

FOTO

Ancje se il titul di sitât al è abusîf se no’l è ricognossût dal President de Republiche, di fat però Buje e jè cognossude di tantes bandes come le “sitât d’art de Medae” pe sô storie, pai soi incisors e ore presint ancje pal so museo.

E chê lungje biele tradizion e jè stade confermade chest an de incision di altres dôs medaes ch’e vegnin cussì a ingrandî chel lunc interessant elenco di opares nassudes di artiscj di Buje.

Si trate de medae di Arnaldo Baldassi pai mîl e sietcent ains di San Floreàn, e de medae di Pierino Monassi de Madone de Salût pal gnûf non de strade intitulade ae memorie di pre’ Saverio Beinat ch’al è stât prin plevan di Vile par ben 55 ains.

A dî il vêr, cheste medae no jè dal dut origjnâl parceche Pierino Monassi le veve già incidude all’inizi de sô maturitât artistiche, squasit quarant’ains fa, pal novantesim de fieste de Madone de Salût: e puartave incidude le date 1876-1966. E jere cheste une medae speciâl, par vie de nicje a spieli che faseve risaltâ le figure de Madone; e si è olût dâj ancjemò pui valôr cul tornâ a fâle: ma nò tornâ a bati il vecjo conio, ma adatâle ae gnove situazion, ch’al vûl dî fâle gnove. Otignût il vecjo conio de Zeche di Rome, l’artist al à pensât di gjavâ les dates che jerin incidudes, par rinovâ une validitât aldilà dal timp; e al è stât un gran lavôr di fin a ricostruî il ricam dai madons dal mûr de glesie cence che par nuje s’impari le modifiche. E in pui, l’artist al à metude di bande le seconde faciade de medae, che e mostrave le vecje glesie di Vile (che cumò no jè pùi, butade jù dal teremot dal ’76), par lassâ invessit une faciade libare par incidi di volte in volte i gnûfs moments di ricuardâ.

Pierino Monassi al à in cheste opare continuade le sô linie artistiche che lu à puartât par tancj ains a riprodusi cun finece, delicatece e precision chês che son tra les opares, religioses e profanes, pui bieles e pui famoses dal mont. Te cripte de glesie di Vile si pò viodi qualchidune des 60 medaes ch’e reclamin il “genio di Michelangelo”: opare comissionade de Zeche Americane e che à costât 5 ains di lavôr; come che si po’ viodi ancje le Muse dal Signôr muart, tirade jù cun sensibilitât e finece de sante Sindone. Al è il «testimoni di un secul di gjenerazions di incisors ch’e an fat di Buje la stele de nazion de medae» come ch’e dîs le motivazion dal premi Nadâl Furlan che j è stât dât un an fa; e al è «protagonist di rare finece, sintiment e passion».

Pierino Monassi al è stât un protagonist di prin plan ancje te realizazion dal “Museo d’art de Medae” di Buje. Al à, infati, metude a disposizion dute le sô competence tecniche e artistiche e in pui al à regalade le sezion “Come nasce una medaglia”.

Arnaldo Baldassi nol po vantâ i titui academics di Monassi, ma ai titui di scuele e supliss une grande cjarie interior artistiche e fantastiche che lu à puartât a esprimisi ad alt livel in pui formes espressives. Sô in particolâr e jè, come ch’e vin dite, le medae di San Florean.

Il 4 di mai da l’an passât e colavin i 1700 ains dal martìri di chel soldât roman condanât pe sô fede cristiane a sei butât-jù dal puint cuntune piere leade al cuèl tal flum Enn te Alte Austrie. E contin che une dì cuntun seglot di aghe al à studât un gran fûc; clamât a protegi les cjases cuintri il fûc e deventât patrono dai pompirs, j an dedicades un grum di glesies tal Centro Europe e in Alte Italie, une ancje a Buje. Le medae di Baldassi, di une bande, e ripuarte in riliêf le biele sagume de glesie e de borgade di San Florean; ma sule faciade al ven ricuardât el uficiâl roman ch’al distude un fûc. E jè une rapresentaziòn incidude cul gust dal moviment, cun cure dai particolars e riciece di figures, come le aghe e il fûc, le divise militar e il labaro e il cjaval plen di vite.