Pineladis 

in blanc e neri

FOTO

J crôt che le nêf e sedi un dai pôs events atmosferics che le fotografie e puedi documentâ.

Cjalant chestes inmagjnes si rindìn subite cont di trop ch’al neveave i ains passâts e tancj ricuards nus tornin tal cjâf: i gnûfs paesaçs creâts di chê coltre cussì fofe; il cidinôr rot dal svuelâ des passares, svariades, che cirin di mangjâ e facil vitimes des palisses tindudes dai fruts; il berghelarili dai scuelârs pes vacances fûr program; el plasê di slichiâ jù pai roncs cu le slite e le disperazion des maris che par sujâ i vistîts strafonts no vevin âtri che el spolêr.

El grant frêt al paronave ancje pe precarietât des cjases. Nol ’ere râr che tes cjamares è rivas un pocje di nêf jentrade pes frissures des ramades e di buinore, in cusine, cjatâ i barcons ricamâts dal gî, che el frêt de gnot al veve glaçât el umit che si cjatave sul veri.

Ricuarts di plui part des persones di une certe etât, ch’e an vivude l’infanzie cuant che riscjaldament centrâl, veris doplis, isolament, no fasevin part dal vocabolari de int.