I marcs des 

fameis di Buje

I MARCS DES FAMEIS DI BUJE

Sui "marcs di famee" (Hausmarken, marque de maison, sigle o contrassegni familiari) si è scrit unevore tal forest, massime in Gjermanie là ch'e son plui difondûz; quasi nuje invezit si è scrit di lôr in Italie, ancje parceche si trate di une usance limitade al Nord (1). In Friûl (ch'o sepi jo) si son interessâz dai marcs nome Gaetan Perusini e Vigj Ciceri ch'e àn publicât 'za ains qualchi centenâr di esemplis tirâz dongje tal cors del lôr numarosis "peregrinazioni attraverso il Friuli" (come ch'al à scrit il Ciceri) (2). Tra di chei si cjàtin ancje un pôs cjapâz su a Buje (vincjequatri esatamentri), la majorance tirâz fûr dal Catapan de Plêf e un quatri di qualchi piere architetoniche (3). Di chesc' al veve vût notât alc ancje Pieri Menis tal so libri su lis "stemis di Buje" dal 1951, ma plui che altri par visâ che chestis "sigle familiari meriterebbero uno studio a parte costituendo da sole un'interessante raccolta" (4). In efiez, lui al veve dade dongje un ricolte di marcs di famee bujês, ma nol à podût burile fûr, lassanle ancjmò incomplete fra lis sos cjartis. 'O vin, duncje, pensât ch'al ere il câs di fâ cognossi ae int di Buje cheste lôr preziose e dismenteade ereditât; no sigûr par svantâsi di cui sa ce straordinarie nobiltât, ma par non pierdi la cussience de proprie storie e de proprie dignitât. Ve' chi, duncje, la liste interie dai marcs del fameis di Buje segnâz sul 'za nomenât Catapan. Al sarà oportun, paraltri, precisâ prime rapidamentri ce ch'e son chesc' "marcs di famee" e qual ch'al è il lôr significât storic. I marcs 'e son, duncje, "segnos", simbui convenzionai, di personis o di fameis o di fraternis e corporazions, di nature no araldiche, usâz par antic par certificâ la proprietàt, l'identitât, la divignince di cjasis, di mobii, di prodoz, di marcanziis. 'E podevin doprâu duc', i nobii ma ancje la borghesie imprenditoriâl, cumierzans, artesans, cramars... Qualchi volte il marc su documenz o su oparis d'art al sostituive la firme dal autôr o dal artist. Cussì a Venzon su lis pierds lavoradis dal domo i pichepieris 'e àn segnade la lôr identitât. Qualchi volte il marc rigjavât tun anel al podeve servi par sigjlâ une letare o un testament. Qualchi volte il marc al vignive sgriât sui mûrs di un santuari come segno di devozion. (Cussì si pò viodilu, par esempli, daûr dal vecjo altâr de Madone te glesie di Paluce). La usance di segnâ cul marc la proprietàt di une cjase 'e je documentade 'za tal secul XII. Tal prin i marcs 'e son unevore semplizs. Si trate di pocjs liniis tiradis par dret e par traviers e variamentri incrosadis tra di lôr in mût di formâ figuris elementars (crôs, stelis, frecis ecet.). Dispes 'e vegnin metudis dongje lis letaris inizials dal non e cognon dal titulâr. In seguit, massime dal '500 indenant, i marcs 'e vegnin metûz dentri di un "scudo" e si van vie vie trasformant, insioransi cun altris elemenz realistics (impresc', rosis, palmis, nemai stilisâz) e cussì 'e deventin qualchi volte veris stemis. Chest fat si notilu soredut tal '6 e'700, massime fra chês fameis ch'e vevin ambizions nobiliars o che, in qualchi maniere, 'e cirivin di dâsi une innomine sociâl (di solit fameis ch'e vevin fra di lôr qualchi nadâr, qualchi predi, qualchi studiât). In Friúl i marcs si cjatiu par plui (al serif Ciceri) te zone da l'Alte (Buje, Glemone, Venzon) e in Cjargne. L'usance 'e cesse sui prins dal '800. In Cjargne 'e rive fin ae metât dal secul. Tornant ai marcs di Buje, al va dit che fin cumò 'o cognossin nome marcs di famee dopràz soredut par distrigâsi fra lis numerosis gjarnaziis dal paîs. Per chest cont 'e vignivin siguramentri usâz tal Catapan de Plêf di San Laurinz, dulà che dal '4 al '500 'e jerin regjstrâz famee par famee due' i lassiz e i obligs di messis e di caritâr impiâz tal aniversari de muart dai propris vons. Ancje chi di nô a partî dal '500, qualchidun di chesc' marcs 'e devèntin veris e propris stemis, par plui scolpidis su lis clâfs dal volt dai portons come segnâl de residence familiâr (4). Il plui vecjo che si cognossi di chesc' câs al è chel che si pò viodilu ancjmò sun tune cjase di Ontegnan. Al è il marc de famee Pezzetta (quatri astis ch'e formin un quadrât cui lâz slungjâz), metût dentri di un elegant scudo e compagnât di cheste scrite: IOVANES. P(eceta). F(ieri). F(ecit). 1520. 'Zuan Peceta al à fat fâ (cheste ciase tal an) 1520 (5) (fig. 1). Cumò chi di seguit 'o metarin i marcs che si cjàtin tal Catapan (6), 'zontant ancje lis stemis di chei pós ch'e son stâz in seguit doprâz ancje par chel cont (figg. 2-3). No publichìn, duncje, chi lis altris numerosis stemis ch'e an vût doprât tal passât lis fameis di Buje 'za publicadis di Pieri Menis e che in part si pò viodilis ancjmò ca e là atôr pai borgs. Lu fasarìn un'altre volte.

Note:

(1) L. de Laszloczky, Marchi di casa: Sot la nape 7,5 (1955) 4, ricorda l'opera specifica fondamentale: C.H. Hohmeyer, Die Haus-und Hofmarken, Berlin 1870.

(2) L. Ciceri, I contrassegni individuali in Friuli: Sot la nape 7,5 (1955) 3-10; G. Perusini, Le marche di proprietà in Friuli: Ibid. 8,1 (1956) 14-17. Va ricordato anche lo studio di H. Klein, I "materialisti" della Carnia nelSalisburghese: Ce fastu? 30 (1954) 70-80 che documenta l'uso dei marchi da parte di cramars carnici operanti nel Salisburghese.

(3) P. Menis, Stemmi buiesi, S. Daniele del Friuli 1951, 23.

(4) Ibid. 8-11

(5) Ibid. 11.