Il “Museo Diocesan 

e Galariis dal Tiepolo”

FOTO

Trôs sano che tal Palaç dal Vescul a Udin al è un Museo impuartant viert a ducj chei che son interessâz a l’art furlane e a la pietât de int dal Friûl? E pûr i Todescs, che vegnin ancje di lontan, e san che Udin al è la “Tiepolostadt”, la sitât dulà che il grant pitôr venezian al à lavorât e al à fat un capolavôr de sô zoventût (il Tiepolo  nol veve trent’ains) e che par cognossi la fin sflandorose dal baroc talian bisugne vê presint lis pituris di Udin tal Palaz dal Vescul che une volte al ere dai Patriarcjis. E il Museo Diocesan de Diocesi al à come sô prime glorie chê di mostrâ chescj afrescs al public.

Il Museo, infati, si clame tal prin “diocesan” parceche al conserve oparis che vegnin di dute la grande Diocesi udinese; ma dopo al zonte la declarazion di podê mostrâ lis “Galariis dal Tiepolo” che formin la sô opare artistiche cognossude te storie da l’art.

Storie dal Museo Diocesan

Di un Museo de Diocesi di Udin si comence a fevelâ zà sul principi dal secul XX quant che l’Arcivescul Pieri Zamburlini (1897-1909) al nomenà i “deputâz pa l’art sacre e i monumenz sacris” che vevin dadis adun chês oparis d’art che no podevin jessi conservadis tes glesiis e valorizadis come che mertavin. Cussì e forin racoltis un pocjis di statuis e colocadis provisoriamentri in dipuesit. Ma di Museo vêr e propri no si podeve ancjimò fevelâ. Cheste situazion e durà sot i Vescui Rossi e Nogara. Al fo invessit l’Arcivescul Josef Zaffonato che tal 1963 al creà il Museo in forme decorose tal scantinât dal Seminari in viâl Ongjarie realizant il vecjo sium.

Ma al fo l’Arcivescul Monsignor Alfredo Battisti che dopo il taramot dal 1976, cul concors public e privât, al puartà il Museo tal Palaç patriarcjâl e cussì al podé meti in lûs ancje la Biblioteche, chês altris salis di rapresentance e i afrescs dal Tiepolo.

Il Museo al ocupe il prin e il secont plan dal Palaz dai Patriarcjis. In particulâr, in sîs salis dal prin plan e jè la mostre de sculture furlane in len dal secul XIII al XVIII, ven a stai al rapresente un spieli da l’art furlane di chê influenzade dal mont todesc a chê che s’ispire a l’art venite e italiche. Ma soredut il Museo s’ispire a ricognossi la religjositât de Glesie locâl, di chê medievâl patristiche e bizantine a chê tridentine e cuintritiformiste. Cussì lui al conte cu la lenghe da l’art la storie de fede dai nestris vons che come une vene d’aur e compagne lis vicendis dal timp. Po dopo il Museo tal tierz plan dal Palaz Patriarcjâl al mostre il contribût fondamentâl che la glesie e à dât ae culture locâl tal ’700 cu la prime Biblioteche publiche, cu lis salis decoradis e infin cu lis pituris dal Tiepolo ch’al à ufiert a Udin la sô plui grande glorie!

Il Museo Diocesan

Te prime sale dal Museo il visitadôr al smire l’art furlane de sculture in len dal Romanic al Gotic, ven a stai dal 1200 al 1300. E prin di dut al reste incjantât denant de statue di Sante Eufemie dal principi dal secul XIV. La statue, che fo un timp te basiliche di Aquilee, e jé un simbul de ortodossie de Glesie parceche e ten fra lis mans la Glesie di Calcedonie dulà ch’al fo declarât, dal 451, Gjesù Vêr Diu e Vêr Omp cuintri Arians e Nestorians. Lis altris statuis ch’o viodìn culì dal ’200 e dal ’300 e confermin te lôr severitât la fede dai vons.

Te seconde sale si mostre il Prin Rinassiment che al rive ancje in Friûl puartât dai scultôrs locai, prin fra ducj Domeni di Tumiez che chi al compâr cun tune pale d’altâr de sô maduritât artistiche dal 1488. L’altâr, ch’al ’ere un timp te Plêf di Sante Marie Madalene di Vile Santine, al mostre dute la sensibilitât semplice ma cjariade di umôrs poetics e virgjinai che rindin l’altâr un asempli espressif di dute l’epoche. I Sanz e i Agnui che i fasin corone cu la Madone e il Bambin e son chei plui venerâz de pietât popolâr. Ma il visitadôr al scuen fermâsi un moment denant dal riliêf de Dormitio Virginis (la Muart de Madone) di un intajadôr todesc dal 1400. La Vergjine Marie pojade sun tun iet rustic, la muse dolce e serene, circondade dal vêl. Atôr atôr e son i Apuestui cu la muse sfigurade dal dolôr.

Te tierce sale si viôt l’eplosion furlane dal Rinassiment. Il mestri capitâl di chê stagjon da l’art al è Zuan Martini (1475-1535) che cul so stes cognon al declare l’ispirazion taliane de sô art. La sô produzion, che tal prin  e conte ancje pituris che si po ancjmò viodi tai museos di Udin, di Vignesie, di Milan, di Budapest e di Londre, e comence dal 1505 dedicansi dute a l’intai dal len. Si à memorie di 25 anconis d’altâr e di une sdrume di statuis di len. Dal 1526 al complete la pale spetacolâr di Mortean, alte 6 metros, cun tune sessantine di statuis. Chi tal Museo al è esponût un so Redentôr ch’al unìs ae impostazion classiche une religjositât solide e intime. Lis altris oparis dal Martini e lassin viodi dute la sô cariere artistiche, de prime ispirazion entusiaste  da l’art pitoriche taliane, ae perfezion de sculture in len de etât madure, ae strachece dal omp sul finî de vite. Ma la sô grande fede e lee dutis lis sôs oparis. Lis Madonis e i Sanz di chei altris artiscj rinassimentâi  che no si po viodi ta cheste sale e formavin la consolazion de int tormentade di chei timps.

Te quarte sale e son esponudis lis oparis dal Manierisim furlan ch’al fo come paralizât tra la cuintririforme antiprotestante e lis intrusions politichis. L’art e reste cussì academizade sui modei rinassimentâi. Si po viodilu te Madone in trono dai prins dal ’600 che ven de glesie di San Michêl di Culine. Se l’equilibri des figuris al pant la tradizion classiche, il gust rafinât dal intai al sa zà de esuberance baroche. Lis altris statuis, che si po viodi culì, tiradis fûr dai lôr altârs, di une bande e rivelin lis sgramaticaduris stilistichis e di chê altre e pandin la partignince a une gnove culture formaliste e decadent.

Tra 6 e 7 cent ancje in Friûl al cjape pît il gust Baroc come che lassin intindi lis statuis esponudis te quinte sale. Ancje l’art dal intaj dal len si anime dal gnûf stîl artistic, esasperant l’espression des musis, sglonfant il modelât dai vistîs, ma restant cence il respîr di une vere religjositât. Ancje la grande statue di San Cristoful di Jeroni Paleario fate tal 1615 pe fazzade di San Cristoful a Udin, dute piturade di blanc par imitâ il marmul, e jé un esempli significatîf di cheste epoche.

Te ultime salute dal Museo e son esponudis lis statuis ispiradis al gnûf stîl che o clamìn Rococò. L’art si bandone a un decorativisim rafinât, a ritmos eleganz, a invenzions ilusionistichis stonfadis di lûs. Ma la stagjon e dure pôc parceche l’art dal len e fo scjafojade dal neoclassicisim ch’al lavorave il marmul cun fastosis machignis. Lis statuis esponudis in cheste sale e mostrin claramentri la crisi da l’art dal len dai secui XVIII e XIX.

Il contribût di Buje al Museo

Ma ta cheste schirie di statuis jse qualchidune ch’e ven di Buje? Si, and’è dôs che mertin l’atenzion dal visitadôr. Te seconde sale, dulà ch’al ven presentât il prin Rinassiment, tra i monumenz ch’e fasin corone ae pale d’altâr di Domeni di Tumiez (1448-1507 c.), e jé la Madonute in trono cul Bambin tal braz che tegnin viert un cartel (fig. 1), che ven de Plêf di San Laurinz in Mont. L’opare e jé di un artist furlan dal secul XV. La Madone, sentade sun tune bancje, e à une vieste di colôr rose, sot di un mantel dorât e tal interno blu; sul cjâf e puarte la corone e un fassolèt blanc j cengle il cuel. La muse serene e cjale diretamentri la int. Il Bambin Gjesù, vistît di une tuniche dorade che j lasse scuviertis lis gjambutis, al cjale la int cun favôr. L’opare e po sei colegade al Weichenstil (stîl dolz) de ultime etât gotiche, quant che l’art e cîr gnûfs contignûz simbolics, come in chest câs cu l’inseriment dal cartel ch’al veve une scrite che jé lade pierdude.

Te quarte sale e son doi Agnui ceriferaris dal secul XVI (fig. 2) di Zuan Antoni Agostini (+1631 c.), che vegnin de Plêf di San Laurinz di Buje, che chi al mostre la sô mode manieristiche adimplen. I doi agnui e erin colocâz su l’altâr majôr de Plêf fin dal 1595 come che si po viodi tai documenz des Visites pastorâls. E son stâz restaurâz dopo il taramot dal 1976 e l’opare e meté in lûs dut l’equilibri classic des figuris, il modelât curât e dute la rafinatece dal intai che, se disin la grande l’esuberance da l’artist, e lassin indaûr un pôc le religjositât vere.

Chestis statuis e son cumò tal Museo e e rapresentin ben la lôr epoche. Ma te Plêf di Buje in Mont e jé la copie in len de Madonute in trono cul Bambin tal braz piturade come gnove (fig. 3). Al è un segnâl di ce ben che ur vuelin chei di Buje!

Lis salis dal Plan nobil dal Palaz Patriarcjâl

Jessint di cheste salute si cjate la scjale a bovul che une volte e puartave i forescj te Biblioteche Delfino. La scjale e à par cîl un afresc di Vico Dorigny (sec. XVIII) ch’al rapresente il Pari Eterno ch’al dà la taule dai comandamenz ai omps. Fate la rampe, si entre te Biblioteche dulà che si reste incjantâz pes scafaladuris, pai libris e pal cîl dulà che, parsore de steme Delfino e di altris quadris e stucs, si profile la tele di Nicolò Bambini (sec. XVIII), rafigurant il Trionf de Sapienze.

Po e ven la Sale blu cu la volte decorade di Zuan di Udin, il famôs pitôr dal Cinccent furlan dit il Ricamadôr, famôs pes pituris de Loge vaticane. Po e ven la Sale zale cul cîl decorât a stuc di Zuan Marie Andreoli. E finalmentri te Sale rosse che ven dopo si entre in contat cun Zuan Batiste Tiepolo, ch’al piture ancje part dal salon d’onôr, la Capele palatine e la Galarie dai ospiz.

Lis pituris dal Tiepolo

Il Tiepolo al fo clamât a Udin dal Patriarcje Dionisio Delfino dal 1726 par completâ il so gnûf palaz. Il zovin pitôr, che nol veve nancje trent’ains, al frescà par prin il sofit dal scjalon d’onôr figurant San Michêl ch’al pare fûr dal Paradîs i agnui ribei, dentri de decorazion a stuc di Abbondio Stazio. Ta chescj quadris e jé ancjmò presint l’esperienze pitoriche veneziane. Libars dai tais venezians e son invessit i quadris monocromos che compagnin la scene centrâl e che rapresentin in vot scenis il pecjât di Adam e di Eve ch’al à dât origjine al mont.

La seconde fase dal racont de Bibie si svolz te cussì dite Galarie dai ospiz, durant l’astât dal 1727 e dal 1728. In vot quadris il Tiepolo al pant il svilup storic che, sot la guide sapiente di Diu, al à puartât ae formazion dal popul elet. Dal centro de sale si viôt a gjestre la prime scene di Abram ch’al ricêf i agnui tra i roi di Mamre. A zampe dongje il barcòn e jé rapresentade la sô femine Sara che trate cul agnul pal problem dal fi. Po sul sofit a zampe e jé rapresentade Agar cul fi Ismael confuartade dal agnul. Al centri Abram ch’al sacrifiche a Diu il fi Isac, e infin l’altri fi Jacob ch’al viôt une scjale che tocje il cîl. Tal miez de parêt di front Laban al incuintre Rachele e Jacob su la montagne di Galaad ch’al è il moment decisîf pe nassite dal gnûf regno di Jacob. A gjestre, monocromos, Jacob al lote cul agnul e a zampe Jacob e so fradi Esaù si cjapin a brazacuel. Il sgnificât des scenis al è spiegât des Profetessis che si disponin dôs a lât e ches altris tra i barcons su le parêt oposte. Marie sûr di Arone a giestre e Debora a zampe, e tra i barcons Ulde, Ane e dal gnûf Testament Elisabete e Ane e cjantin lis maraveis dal futûr di Diu.