INT DI TOMBE

Tai paîs les tantes ocasions di cognossisi, di stâ insieme, di fâ comunitât ‘e àn creât pui pusibilitâs di schersâ, di fasi dispiès, di remenâsi in amicisie e di ridî insieme.

A Tombe el sfotò al à cjapât un spessôr particolâr, un gust  che forsit un cert isolament des atres frazions al à mantignût vîf e le  int ‘e stâ ancjemò a sintî vulintîr, come che si  scolte une cjanson cognossude, a contâ di chel schers, di chê bulade. E alore eco cà une cerce di cheste antologje di vite di paîs, une piciule galarie di personagjos nostrans, par soridi cun lôr e les lor vitimes ch’e àn savût, s’al ere el câs, acetâ les batudes e i dispiès cence fâ i parmalôs, preseant le arguzie dal autôr.