Un bon complean

Di frut mi capitave spès di sintî sivilâ le stesse cjanzon di gno pari, intant ch'al cusive, e di Meni Zanier, el casaro, ch'al lavorave te latarie lì dongje. Fra lôr al 'ere un gran "filing", madurât in tanc' agns di vicinanse, di taiùz scambiâz di corse te ostarie o dongje de cjalderie, tes binores di criure, di qualchi bicjerin, che el casaro al tirave fûr pai amîs o in cualchi ocasion speciâl.

E finivin i agns a pôs dîs di distance (gno pari el 5 e Meni el 8 di dicembar) e naturalmentri 'e profitavin par festegjâsi a vicende. Un an, el 8 di dicembar, Meni, che, gjenerôs, al veve preparât divierses butiglies di vin, une di sgnape e une di "nocino" ch'al veve finalmentri decidût di screâ, si cjatà a dâ fons ae scorte: duc' chei ch'e jentravin a puartâ el lat a binore j fasevin i augurios e lui, lusingât che duc' e cognossessin le date dal so complean,... jù alc di bevi. 

Dome cuant ch'al jessì, un biel pôc dopo, al capì el motîf di tante popolaritât: su le bree dongje de entrade, dulà che lui al picjave i avîs ("Si paga il siero", "È arrivato il guano" ... ), al 'ere un sfuei cun su scrit in grant, cu le scriture di gno pari, "Auguri a Meni! ".