L'aghe in cjase

Al sarà stât dal 65 cuant che ancje a Tombe, finalmentri, e tiràrin l'acuedot. Duc' 'e spetavin cun ansie cheste grande comoditât e Lino el Tabar, ancjemò prime che Fabio Fidrì, l'idraulic comunâl, al fases el colegament, al veve parecjât dut in cjase: rubinèz a bas, rubinèz adalt... E l'aghe no rivave.
Une sere j' eri lât te ostarie di Tonin a passâ l'ore. Apene jentrât, mi vignirin incuintri Leandro dal Siôr e Tarcisio, el fì dal Rôs. 

Tarcisio al viergè un pôc le puarte de stansie, dulá che Lino al 'ere daûr a viodi le television, e Leandro, alzant le vôs, mi domandà:

- E alore, mestri, cuant rivie cheste aghe a Tombe?

E Tarcisio, di rionte:

- Tu che tu sês in comun, tu savarâs trop che i vin ancjemò di spetâ.

Lino intant, atirât dal argoment che j stave pui a cûr, al veve bandonât el telegjornâl e al 'ere vignût fûr svelt a sintî.

E jò, stant al scherz:

- Tal ultim consei j' soi propit intervignût par domandâ al sindic cuant che 'i varìn ancje a Tombe le aghe...

E Lino ch'al stave su les spines:

- Ce ti âl rispuindût el sindic?

E iò:

- Mi à domandât: voleiso vé l'aghe in cjase a Tombe?

E Lino:

- Si capiss! No j âtu dit ch'a è ore?

E iò:

- Sigûr. E lui, el sindic, mi à rispuindût: se 'i volês l'aghe in ciase, tirait vie i cuvierz!

Lino al 'ere un bon omp, ma cuant ch'e j saltave le moscje al nâs, j scjampavin tantes di chês bestemes che mai.