Dispiès

I dispiès a Tombe ‘e àn simpri gjoldût di grande considerasion, soredut in chei che u fasevin. E no erin dome i mui a fau…

Une sere, d’astât, Vitorio dal Siôr al veve menât a cjase une caretade di meniche, ma al ere tart par scjariale, e cussì al parchegjà le carete dapît de place, dongje de cjase di Agnul di Candie, pensant di fâ el lavôr tal indoman binore.

Ma, vie pe gnot, giovins, mai identificâs, j àn gjavât les rovedes te carete!

Cussì Vitorio al scuegnì scjariale sul puest, cirî les rovedes, tornà a metiles su, tornâ a cjarjâ le meniche, spostâ le carete e, finalmentri, al podè scjariale!  

Ancje a Toni Pessete j plaseve schersâ e no si tirave indaûr cuant che si presentave l’ocasion di fâ cualchi dispièt.

In che volte si cjatave lajù di Corgnâl dulà ch’e vevin copât el purcít e lu stavin lavorant e, apene che j capità l’ocasion al platà, cence che nissun sepi, el fiât dal purcìt.

A un cert moment, cuant ch’e ere ore di metilu vie, Lino, el Tabar, che nol viodeve el fiât al domandà:

- Dulà isal el fiât?

Ma el fiât no si lu cjatave. Toni disàl:

- Viodeit che, mi pâr, che chest purcìt nol veve el fiât.

A Lino j semeave une robe impussibil, ma el fiât nol ere e no si lu cjatave di nissune bande.

Lino si innervosive e al continuave a domandâ:

- Dulà isal el fiât?

E Toni, ch’al veve cjapât gust:

- No l’è. El purcìt no lu veve!

E Lino, che ormai al veve pierdût le pasiensie:

- Cemût no l’è! Al scuen jessi!

Alore, Ciro, fradi di Lino, che già di ains nol tabajave cun nissun, nome cul miedi, al sberlà risolût:

- Se no l’è, no l’è! 

Par cont di dispiès, cun Olindo al faseve spès copie Diego Piceche.

No si saress dite a cjalalu in muse. Dal rest, se le muse 'e pandess, nissun al podaress fà dispiès!

Tai ains cincuante, Diego e Olindo 'e lavoravin come muridors te cjase di Gjldo Sâr (già inmomenade).

Par furnisi de aghe che coventave par fâ maltes 'e dopravin le bote di len di Pessete.

Une dì che Diego al ere lât a cjoile cul cjaval, tal lôr curtil al viodè, picjât su pe scjale, un rassat copât che Fiorine 'e veve di splumâ. Cidin cidin, cence fasi viodi, Diego al cjapà el rassat e lu butà su le piargule di cjanorie di fur de stale e al tornà a vore cu' le bote come se niente fosse.

Un pôc dopo al rivà Enso a domandâ a Olindo dulà ch'al veve metût el rassat, che so mari 'e veve di splumalu.

Olindo j rispuindè che lui nol saveve nuje dal rassat. El frut al tornà subite dopo a dî che so mari ‘e veve premure, che nol fasess el stupit e che j disess dorman dulà ch'al ere el rassat.

E Olindo a giurâ che lui nol saveve nuje.

Cinc minûs dopo al rivà dut rabiôs Toni, disint che nol veve voe di schers e comandant di tirâ fûr el rassat. Olindo e Diego j rispuinderin che lôr no savevin assolutamentri nuje, che forsit cualchidun lu veve robât.

Pieri Gjaline, ch'al ere lì, al disè che pôc prime al ere passât par lì un poar, di chei che lavin a cirî le caritât, cun tun fagot sot dal braz: forsit lu veve robât lui.

Toni al partì come une saete cu le biciclete viers S. Florean.

Lì dal Lavio, fûr de farie, al viodè Sandri e j domandà s'al jere passât par lì un omp a pît cun tun fagot. Sandri j disè che pôc prime al jere passât un cun tun fagot sot dal braz e ch'al lave viers Andreuce pal troi sul ôr dal Lavio. Toni al pedalà a dute velocitât e al rivà a cjapâlu propit lajù dai puintùs. Lu brincà pal copin e, sdramassanlu cul nervôs ch'al veve, j ordenà di tirà fûr el rassat cence stories.

Chel poar omp al cjapà une pore che mai e al mostrà el fagot: 'e jere le so gjachete cui soi peciòs.

Toni al tornà indaûr vergognât e cuant che si inacuargè che Diego e Olindo j vevin fat un schers ur disè serio:

-   Saveiso che par colpe vuestre cuasi j copavi un omp?

E Diego:

-  Ce si lamentaiso vô, cun duc' i dispies che j veis fat vô a Galiano! 

A cjaval dai ains 40 e 50, dopo gjespus, les femines di  Tombe e usavin cjatasi a giuâ di tombule pes cjases, a turno, lajù di Testôr, là di Pessete, di Lee... In che fieste si cjatavin lì di Berto di Cech, tal curtîl disore.

Le cusine, piciule e base di sufit come dutes les cjases vecjones, cuasi fate su misure par chê famee piciule di stature, e jere plene come un ûf. Doi mulas di cui no si sà ben el nom, cuviert di une omertât pui fuarte dal gust di celebrâ le bulade, vierte le puarte che dave tal curtîl cidins cidins e butarin dentri un petardo (di chei ch’e vevin une specie di cuarde mine che lu faseve sivilâ par cjere e scopiâ une serie di 7-8 colps prime dal bot finâl, ch’al capitave a tradiment dopo une polse che ingjanave duc’). Imagjnaisi dentri ce putiferio: cui berghelave, cui preave, cui clamave vîs e muars, cui saltave su les cjadrees, cui sot de taule... E no podê scjampâ fûr: i doi mui ‘e vevin sierât le puarte a clâf! 

A Tombe i dispiès no son mai mancjâs. E une dì j capità propit a Leon di socombi.

Te ostarie di Tonin al jentrà un siôr di di fûr e al domandà se cognossevin Leon.

Olindo Pessete, ch'al ere lì, j disè:

- Eh, al è gno barbe! Velu là ch'al giue di cjartes. Ma j véis di fevelai fuart, ch'al sint pôc.

El siôr lu ringrasià e, visinansi al taulin, al disè, alciant le vôs come cun tun sòrt:

- Bundì, Leon, jo j soi...

E Leon, ch'al sintive ben, e ansit al provave un grant fastidi pai rumors e les vôs altes, al cjalà di brut chel forest e j domandà:

- Berghelino duc' cussì fuart tal vuestri paîs? 

Pieri Jan nol veve le patente. Al veve le machine, une Lancia Fulvia, e le tignive ferme te stale, costrét a  sopuartâ i sfotòs dai Tombins che j domandavin:

-        Alore, Pieri, atu leât le machine cumò te grepie, al puest de vacje?

Subit dopo el taramot, però, le machine ‘e ere deventade presiose: Pieri le veve tirade fûr de stale, menade te Mandrie (un toc di cjere poc distant de so cjase) e di gnot al lave a durmî tranquil te so Lancia.

Ma i mui, vie pe gnot, e lavin a scjassai le machine e lui tal doman, te ostarie, cu le braure di chel che si sintive al sigûr, al diseve:

- Veiso sintût ce scossadine ancje usgnot passade? 

Di frut mi capitave spès di sintì sivilâ le stese cjanzon di gno pari, intant ch’al cusive, e di Meni Zanier, el casaro, ch’al lavorave te latarie lì dongje. Fra lôr al ere un gran "filing", madurât in tanc’agns di vicinanse, di taiùs scambiâs di corse te ostarie o dongje de cjalderie, tes binores di criure, di cualchi bicjerin, che el casaro al tirave fûr pai amîs o in qualchi ocasion speciâl.