Un esperiment di ipnotismo

Di mul, atôr dai dodis, tredis ains, j vevi let che in Gjermanie, une volte, un troput di giovins studens universitaris ‘e vevin fat un esperiment di ipnotismo: ‘e vevin cjapât un gjâl, lu vevin fat scrufujà su une superficie nere e, a partî dal bec ch’al tocjave chê superficie, ‘e vevin traciât cul gess blanc une strisce di un vinc’-trente centimetros: el giâl, lassât libar, par une ventine di secons al restave imobîl, ipnotisât.

J vevi contât le mê scuvierte al gno amì Agnulin di Norio e insieme, là di lui, dulà ch’j lavi spès a giuâ, j vevin ripetût cun sucess l’esperiment. Entusiasc’, j vin clamât a asisti al fenomeno i mui di Tombe, par vê le lôr amirasion e chei ‘e rivarin subìt, ansiôs di verificâ le nestre scuvierte.

Ma el gjâl no si lassave cjapâ! Dai par lì, cjapilu par là, prove cu le scove, provin cul riscjel… Finalmentri lu vin cjapât, lu vin poât sul peciot neri già preparât, tirât el segno cul gess robât a scuele, lu vin molât… El gjâl no si è mot. Aplausos!