Ancje chest an al è vignût fûr puntuâl Il lunari de int di Buje 1989, metût adun di Laure Nicoloso di Côz, insieme cun Elisabete Ursella Fioz dai Setos ch'e à curade la part grafiche.

Come tai ains passâz il lunari al presente mês par mês vecjs splendidis fotografiis e "testemoneancis" cjapadis su atôr pai borcs, fra la int di Buje. II lunari, che nol à nissune pratese sistematiche, al cjape su cussì spontaneamentri il savôr rampit de culture popolâr, il profum sclet de robis di cjase, la nostalgje dolce dai ricuarz, la maravee simpri gnove de vite di ogni dì.

Ma la vere sorprese di chest an 'e je la lungje schirie dai sorecognons des fameis di Buje, burîz fûr borc par borc di un grop nudrît di colaboradòrs. Cheste dai sorecognons 'e je une tipiche usance bujese e furlane in gjenerâl ch'e forme un patrimoni storic e antropologjc di prin ordin, ch'al mertarès studiât sientificamentri ancje chì di nô come che si à 'zà comenzât a fâ in algò.

Par intant il contribût dal nestri lunari al reste, ancje cussì, unevore impuartant, e ancje nô 'o invidìn duc' chei ch'e cjatàssin ch'al mancje qualchi sorecognon a segnalâlu ai strolics dal lunari, a Saramont, Lì dal Cont 131/A. Cussì un'altri ben spirituâl de nostre antighe civiltât nol larà dal dut pierdût, scjafojât de buride disumane dal nivelament culturâl