Buje: tanc' paîs, une int

La prime volte ch 'o soi rivât a Buje, al è stât une matine di fevrâr di 'za trent' agn indaûr. 'O vevi compagnât un amì pitôr, ch'al veve di disegnâ il lûc là che un timp al jere il «vecjo cjscjelat». In chê dì 'o ài podût cognossi ancje Pieri Menis, che di Buje al à vût scrit storìe e liende. Grant, fuart come un rôl, al veve la muse ch 'e semeave scolpide in tal cret: un vêr patriarcje. Daûr de sô indicazion, 'o sin lâz a gustâ, e, in chê tratorie, 'o vin cognossût altris di lôr: int vivarose e plene di voe di fâ.

E d'inchevolte 'o soi simpri tornât vulintîr a Buje: 'o âi podût cognossile e cognossi i soi omps di culture, i soi artisc', la sô int. E gjoldi lis culinis verdis che Marie Forte 'e à vût cjantât, la mont di Buje, l'aghe de cocule, la cjampane di mont... E cul timp a lâ 'o âi imparât a cognossi ancje la vite comunitarie e sociâl di chê int che, par un cont o par chel altri, 'e je simpri impegnade a organizâ opûr a fâ alc. La sdrume di personis impegnadis in iniziativis a pro dal paîs 'e je une carataristiche che, salacôr, no si cjatile in nissun altrì lûc fûr di Buje,

A pensâj ben, al ven di domandâsi dulâ che chê int 'e va a cjatâ tantis ideis, tante fantasie e tante fuarze par puartâ a bon fin ogni iniziative. Provìn a viodi che ch 'al è e ce che si fâs a Buje: la filarmoniche di Madone, la bande di Buje, il coro e la sô «Vendeme dal cjant popolâr», il circul laurinzian e l'organizazion pal premi «Nadâl», i balarins, i alpins e chês altris sociazions d'arme, la sociazion par dâ il sanc, l'organizazion sportive, il grop di Ursinins Pizzul, la fieste dal tàur, la fieste di S. Josef, chei dal teatro sperimentâl di Vile e vie indenant. Dibòt nancje une citât di 100. 000 di lôr 'e à un tâl implant e une organizazion sociâl cussì immaneade. E Buje 'e â dome sietmìl abitanz.

Se chestis a' son lis idèis, ancje la fantasie 'e à la sô impuartanze tal fâ lis robis. Cjapìn, par esempli, la fieste di S. Josef ch 'e je ancje la fieste dai artesans. Cheste fieste, come duc' sa, la fâsin in diviars paîs, ma a Buje 'e ven fate in tune maniere dute particulâr: ogni an al ven metût in evidenze dome un mistîr e, di chel mistîr, al ven metût in lûs dut: origjne, svilup, materiâi e machinis ch'a convéntin, cemût che si usave fâ, cemût che si fâs.

 Ancje i fruz des scuelis a' partècipin a chestis iniziativis e, i lôr lavôrs, a' vegnin metûz in mostre tune sale dal Municipi. E cussì ogni an, chei dal paîs e dal dulintôr, e' àn podût viodi cemût che si fasevin pipinis e borsis di scus, cemût ch' al ven fat un 'zei o une cosse, il lavôr dai argilârs par burì-fûr planelis e modons e, l'an passât, si à podût preseâ une panoramiche complete sul cont des scarpis, des borsis, de piel e dal corean. Si à podût viodi ancje duc' i impresc' ch 'a conventavin par fâ zuculis, dongje dai stamps e des machinis plui modernis e preseadis ch 'a convèntin in dì di uê par fâ scarpis.

E dute la int lì, presinte, sot di doi capanons granc' dibòt come un cjamp di balon che un centenâr di volontaris a' vevin fat-sù a timp di record, cun dute la organizazion pe mangjative e il banc pe vendite dal vin, des bibitis, dal cafè. E tal dopodimisdì ancjemò duc' insieme, a visitâ ogni repart de mostre e a domandâ ai artesans ch 'jerin daûr dal banc, cemût chest, cemût chel.

Parcè dute cheste conte? Prindidut par dâ un esempli di ce che si deseve prime, podopo parceche un forest al si domande cemût che tal mont di uê el sedi pussibil cjatâ une int di cheste fate. E al è ancje di domandâsi ce podê di union, di leam, di solidarietât e di culture dal paîs, che une tâl maniere di intindi la vite 'e pò significâ.

Co si vîf cussì, dongjelaltris, la vite 'e à un altri savôr, un altri valôr, parceche chê int 'e à savût mantignî, plui che in altrò, l'indipendenze di judizi, di sielte di ce ch 'cd vâl, senze patî sudizion o sotananze di nuje e di nissun. Salacôr al è ancje par cheste reson che il numar unic si clame «Buje pore nuje»! Valadì cun coragjo. Chel stes coragjo metût in mostre dopo dal taramot, tornant a fâ-sù cjasis e fabrichis.

E tal mês di setembar dal '88, la comunitât 'e à vivût un dai momenz plui impuartanz de sô lungje storie: la fieste pe fin de ricostruzion. In place di S. Scjefin, ch'e pareve un tinel sot des stelis, Buje 'e â gjoldût une setemane che mai. Cjantôrs, fanfaris, orchestrìs e musichis di ogni timp, balarins, fûcs artificiâi, si son alternâz in tune sucession continue. E te domenie, sot un soreli sflandorôs, presintis autoritaz e dute la int des borgadis, il plevan a dâ la benedizion par latin, a preâ par che il cîl al protegi l'opare dal omp.

E tal lunis, di gnûf a vore, come prime, come simpri. Par vê, par jêssi, par mertâ chel ch'e â.