El destin di Walter di Sefe (Walter Pauluzzo, nassût a Buje là dal Cuelàt in Dobes el 11 di novembar dal '20, fî di Toni e di Catine di Lene) al someave 'za segnât: al sarès stât fornasîr, come duc' in famée, ch'e vevin tignude le stesse fornâs in Carintie par 108 agns, fintremai che le strade des Gjarmanies no jere slacade sot dai gambiamenz storics e pulitics.

Ma propite chel pari Toni, che lu puartarà cun sè sul Piamont a cinc agns, al varess insedade tal cjâf dal fî le cjece di une graned passion: chê dal cine. Cuant ch'al tornave a cjase al contave ai fruz di Charlot, Ridolini, Polidoro, di comiches viodudes tal cino tes pocjes domenies libares.

El so contà al faseve maravee: de sô peraule 'e nassevin figures che si messedavin te fantasie dal pizzul, ch'al "viodeve" cussì il so prin cine: el cine-contât. Tant che di domenie di sere, cuant che in cjase le lûs lamie de lampadine 'e calave di colp, "eco, cumò al tache el cine a Madone", el frut al podeve parâ-vie le gole tornant a "viodi" e a fâ nassi el spetacul su les ormes lassades tal so ciavùt des peraules dal pari.

El curtîl di Vuic, a Solaris, là ch'al va a stâ dal '28 al somee fat apueste par tirâ-dongje le mularie di lì atôr. Vevial stât el circo a Buje? Si lu tornave a fâ. Vevino fates les marionetes? Si imbastive el spetacul, di domenie dopo gjespui o di sere vie pal estât, tun palcùt di fortune, ma cun gambio dai fondai di cjarte piturâs a definî les scenes, cu les marianetes a manece su pai dês des mans: Fracanapa, Bocaton, Sechiti. "Vieni cuacchio, vieni mecchio che ti faccio sbonbassione!" - E al public: "Vino di sbombâlu?".

E jù paches di vueli sant. E ridí plui i granc' che no i pizzui, che no ju vevin dâs di bant i dîs sentesins pe tragjedie di "Pia de' Tolomei", cu les comiches tra un episodi e chel âltri. El câs al voleve che, tôr dal '30, al passàs per cjase sô Titute di Toni a... fâ viodi une pelicule, cun tun proietôr: e Walter a cjalà chee machine che mai le varès pensade.

Dit e fat, al cîr di cumbinâ alc ancje lui: cjolte une scjatule di carton, cun tune lampadine dentri, pojade sul denant une lint di binocul prestade dal nono, al fâs scori une striche di cjarte veline, piturade cun pipins. Al nasseve el Cine-fêr (1). pal ingrandimento si veve cumbinât, par gjavà el flus bastave rivâ a tignî ferme le lint... ma pal moviment? Vie tal cino di Madone a cjalâ 'e jè propite une eliche che fâs movi i pipins.

Al met i soi stricùs sun tune eliche, simpri te casselute di carton, ma nol gambie nuje. Tocjave rivâ a jentrâ te gabine. Al spietâ fintremai a etât di Azion Catoliche. 'E jere fate. Dongje dal Capelan, don Modesto Pez e di Carlìn Sinàt, al devente aiutooperatôr dal cino di Madone.

Si svele el misteri, le passion si fâs plui grande, ancje s'al reste sustât cuant ch'al cjape fûc dut: brusades ancje les mans dal capelan, cjapât dal scrupul di tajâ vie de pelicule les bussades (2). Par Walter le fotografie 'e pues stâ un pôc vissine al cine. Al tache cun tune Kodak, casselute lassade di un barbe vignût de France, a fâ fotografies ae int di Saramont, Solaris, Urbignà, di domenie.

El rodul lu puarte a svilupâ lajù di Barnaba. Ma le fornâs 'e clame: a tredis agns adèt ae cogarie sul pravilegio e po dutes les stagjons e vie pal unviêr lavorent tal studi viert a San Denêl di Barnaba. Une ocasion d'aur par metisi in contàt cun tun ambient bramât. Les produzions 'e son soredut fotos di tessares, "Le art 'e jere un lusso che non si podeve permetissi". Le pae 'e jere chee ch'e jere: i tre francs in dì cuintri dai 27 de fornâs 'e metevin el dêt su le plae, segnant le strade dal San Scugnî che dome le uere 'e ferme.

Riformât par un voli ruvinât de cjalcine, al pues rilevâ pe prime volte un studi dibessôl, a Aosta, dal '40 al '41. Intant i suoi 'i vevin procurade une licenze a Solaris. Tre fotografos a Buje 'e son di masse, 'i tocje bandonà e lâ a Trep Grant e di lì a Buje d'Istrie, che un parint 'i veve fat savê che al ere lavôr tant ch'al voleve. 'E dure fin al vot si setembar. Sot dal so obietîf 'e passe le int dal borc, i amîs, les gnoces. Le foto 'e jè un ripiego, le vere passion simpri el cine: al lei libris, publicazions che fevèlin di cine, al studie, si documente, al impare.

Barnaba al met in vendite une cineprese: une Pathé-Baby di 9,5 mm e tre metros di pelicule. Le uere apene finide 'e à segnade le int; di bocje in bocje 'e còrin les vôs di ce ch'al è sucedût sot dai cosàcs, cui partigians, 'e à lassât les ormes tes cjases e tai cûrs e ancje le robe... montures çli ogni esercit, scarpes, cjupiei.

Le peraule contáde si pues trasfigurâle tun lengaz gnûf: chel des imagjnes in moviment, là che el lamp cu le realtât nol ven inclaudât de imobilitât di cuadris e di timps come te forografie, ma indulà che el passât, el vuê, el doman si ju messede come tal pinsîr e 'e cjàpin dut un altri savôr.

Cun tre rodui di pelicule di 9 metros (27 metros in dut) al nass el prin film: "La guerra in Friuli" (8' 40" - 1945). No covente scrivi i dialogos; el cine al è mut; le pelicule si preste a sei scrite e... si sparagne. Le int dal borc 'e interprete les pars: baste dome cognossi le trame, che conte un fat sucedût tune famee di Buje.

Le polente 'e jè apene butade sul taîr, a ore di gustâ 'e rivin i cosacs; 'e pàrinfûr duc' e 'e tìrin une slepe di polente in muse al paron di cjase ch'al à un moto di ribelion; le pore e le prepotense 'e son grandes. Intant pal borc i 'zovins 'e van partigjans o 'e scjàmpin. I aereoplanos 'e tàin el cîl par lâ viers Osôf. Osôf 'e jè bombardade.

E culi el ingèn al prudele e le passion di fotografo 'e rint pussibile le documentazion reâl. I bombardîrs: modelins di cinc centimetros custruîs cul carton neri, pojâs sun tun veri cuintri i nûj; le cinepresse si môf e l'efièt al è grant. 'E còlin les bombes sul paîs: sul grump di savalon tal curtîl cjasutes di cjarte e sotvie spandût polvar di sclope.

Si impie el fulminant. Al tone e al bruse dut (ancje el zuf dal cerneli di Walter). Al quadri-finzion si sormonte, te pelicule, le foto-document: chee vere dal bombardament dal fuart di Osôf, scatade dal cuc di Masanêt el 18 di avrîl dal '45. Nissune scene no jè ripetude: si interven dome cul montagjo. Dôs casselutes, un telarùt, i acis: in cjase si fâs le inversion, el svilup che al compuarte el percors contrari di chel de pelicule fotografiche. Le int 'e à fat nasi chest film e ae int el film al à di tornâ.

Le prime proiezion a Solaris, podopo a Madone parsore de latarie o tai intervai dal cine. Le int 'e à di gjoldi, di podê inmedesimâsi, cjatâsi tes situazions, che jê stesse 'e à vivût; al è nassût el cine-realtât. Simpri tai chei agns 'e vegnin girâs: "I due rivali" (l' 50"), "Stagioni" (4' 40"), "Amore Sublime" e le farse "Le femine di Todero" (2' 50"), parceche el cine al à di dâ ancje el gust di cjatâsi e di divertîsi.

A chesc' 'e van 'zontâs tocs di documentaris: i setôrs, fuars come rôi, in rieste a dâ colps di falcèt ae jerbe alte dai prâs; le 'zoventût a fâ el bagno te Ledre, cun barcjes fates cui serbatoios dai aereos. In chel stes periodo in Italie al cjape pît un mût di fâ cine ch'al ribalte "les regules": si filme pes strades, te lûs dal di o dal soreli, tal miez de int; i atôrs no son di mistîr, i scenaris 'e son naturâi, si môf le machine plui che no i atôrs; el montagio al cuiste el ritmo dal timp reâl. Al spetatôr 'i fâs provâ le emozion di tornâ te realtât.

El cine da "studios", falsificât e di "evasione", si trasforme in spieli dai timps. Le int 'e cognos strades, cjases, problemas e, naturalmentri, se stesse. Si trate dal "neorealismo italiano" (3). Tune Buje, tiere di fornasîrs, in momens di miserie, le curiositât, el ingen, les letures e le predisposizion di un omp 'e permètin di cjatâ el stes percors che regisc' di grande innomine 'e an fat: de sperimentazion în cjase al cine-verismo; de comiche che si fonde su le tradizion popolâr al documentari.

Al pues restânus simpri un dubit, come un biel siump: e se in chest lûc e par chest omp el ingèn si fos compagnât cun pussibilitâs economiches? (Cjapade sù de vôs di Walter Pauluzzo tal setembar '92 a Urbignà, di L. Nicoloso). Walter Pauluzzo al vîf a Giaveno (TO), dulà ch'al è emigrât dal '45, dopo vé sposade Rita Tondolo. Al à un studi di otiche e di fotografie su le place dal paîs. Al à fat ancjmò cines, di caratar amatoriâl.

(1) El stes ricuart al è te vite di Emir Kusturica (regjst de Bosnie, n. 1955), che lu torne a fâ vivi tal film "Papà è in viaggio di affari" (Otac na sluzbenon putu - Sarajervo 1985; 116'. Palma d'oro al festival di Cannes). 1952 "L'agitato pisolino" 4'21" - 1952 "La graziosa cliente" 4'38" -1955 "Piccola tragedia" 7'55" -1955 "La schedina" ll'06" - 1955 "Il pino" 6'51" -1956 "Rimorso" 7'30" -1956 "L'allievo fotografo" 8'51" - 1956 "Due mondi" 8'45" -1961 "Giovedì grasso" 10'26".

(2) Nus pâr di viodi Alfredo (Philipe Noiret) in "Nuovo Cinema Paradiso" (premiât cul Oscar tal '89 come miôr film in lenghe foreste). (3) Si tratà di une vere e proprie rivoluzion tal mont dal cine. Ricuardin "Paisà" di Rossellini; "Ladri di bicicletta" di De Sica; "Riso amaro" di De Santis.

El neorealisin talian, ancje pe conseguence de "uere frede" al vignarà scjafojât ae fin dal '40 di une ondade di films hollywoodians; pierdude le batae sul plan comerciâl, si cjaparà le rivincite tal forest, viergint gnoves strades al cine soredut in, France e te stesse Americhe, dulà che al è stât di lezion ai regisc' de "lost generation" (gjenerazion pierdude); lassade di bande Hollywood, si son butâz a cirî cuadris di Meriche puare, strente tai cuartîrs di imigrâz. Regisc' coragjôs, metûs a tasé cu le colpe di vé fotografade le realtât.