«Di lassù, i Blancs di Kolçak and’an copâts 70...” (archivio Romano Rodaro)

O soi tornât pe tierce volte sul lât Bajkal. No di turist ma di pelegrin; une rosute, une lapide su cualchi tombe di Furlan, un incuintri cun Elvira Kamenshchikova e Albina Rugo (gnece di Sante Rugo di Cjampon) a Irkutsk, une gjite in trenin sul “KrugoBajkal”, il trat di 90 km opare di Furlans e Cjargnei, che une biele dì al deventarà Patrimoni Mondiâl dal Unesco... se Diu ûl.

O stoi preparant il cuart viaç lavìe e lu prepari achì a Parigji, sgarfant di cà e di là tant che une pantiane di archivi, simpri in spiete di cualchi scuviarte e soredut passionât dal periodo tragjic e fradricidi de Rivoluzion dal 1917.

Ce no ae di vê provât la nestre int lavìe intant ch’e lavorave su la ferade! Guai se cualchi scuadre e plantave la bandiere rosse, come che mostre cul dêt chê vecjute de fotografie: «Di lassù, i Blancs di Kolçak and’an copâts 70 su lis scinis e improibît di puartâju vie... miò pari, di gnot, judât di un âtri, al è lât a soterâju».

Parcé Kolçak, capo de Legjon ceche fedêle al Zar, dopo vê tentât di salvâlu dal mazzalizzi di Jekaterinburg tignivial tant di voli chel bocòn di ferovie atôr dal Bajkal? Ritiransi viers la salvece (Vladivostok) si strissinave cun sé 70.000 fedêi e un tesaur di vuere, int’un vagon, di 20 toneladis di aur robât int’une bancje di Jekaterinburg. Dopo passade la curve taliane dal lât, al veve ideât di fâ saltâ un tunnel. E cussì dopo vê afondade le nâf rompi-glaç “Bajkal” si siarave daûr di sé la ferovie e ogni pussibilitât di passaç. Par furtune, prin di firmâ il tratât di Versailles e par rimpatriâ “a la miôr” chei di Kolçak, i Rumens, i Letons, i Polonês, i nestris 330 Trentins e Triestins, i 2000 Artiglîrs di Montagne Talians, une scuadre di Carbenîrs Talians, i operaris de ferovie (o sin tal 1918), i Aleâts e vevin incjariât il gjenerâl francês Janin di frenâ i Rôs magari in mût di no fâ diferencis tra Rôs e Blancs. Basât propit a Missovaya, il Janin al jere rivât a convinci Kolçak di rinunciâ al so progjet.

Intant, dute cheste int e podeve ritirâsi viars Vladivostok scurtant pe Manciurie e rivâ te penisule di Gonorstai (gonorstai=ermelin) une specie di babilonie di dosenis di razis e lenghis in spiete dal rimpatri.

L’Italie e veve nolegjât dôs nâvs gjaponesis: il Texas Maru e l’Engrand Maru ch’e son rivadis a Triest tal Avrîl dal 1920 dopo doi mês di viaç e vê calât in mâr, al larc dal Sri Lanka a lat. 05°34 N long. 83°08 E, Luigi Giordani, il 20 di Març dal 1920, cun tun De Profundis e la bussade dal Signôr.

E vuê 19 di Març 2010, dopo 90 ains, a lat. 46°12 N Long. 13°06 E tal so borc di Ursinins Piçul in te gleseute di Sant’Osef, e son ca a ricuardâlu i Giordani: Livia, Adriano, Danilo Bulòt, president dal Fogolâr di Lyon, so fradi Disma, diretôr di Leco-Milan e Leco-Paris, ducj i doi fîs di Anute e lôr cusìn, un biât viandant: il sot scrit Rodaro.

’Us vevi visât: o soi lât di pâl in frascjie come les vicendes di beât Luigi Giordani... le lorde barache dal 1n di Zenâr 1900 a Missovaya, la scuviarte dal so scrit te cjase di Ninute di Vissense tal 1976, un torseòn francês ch’e s’inçupede dapruf, el jutori dai Trentins di Parigj e dal Museo di Missovaya-Babuskin che mi spiete pe cuarte volte e che mi à conferît la citadinance di “Sibiriak”.

Briviet! Mandi!

Il “computer a man” doprât ancjemò in dì di vuê. (foto Romano Rodaro)