«Oggi 1^mo dell’anno 1900 sfida i rigori più tensi del freddo in una lugubre e lorda baracca Giordani Luigi in compagnia di altri 13 Friulani stando sempre allegri in aspettativa di un avenire prospero e lucroso. Stà quindi à Dio il affretarcelo quale noi tutti gli rendiamo unito i ringraziamenti, anche il quore. Massavoja – Siberia».

E son dîs ains che ti côr daûr Giordani... a Buje, a Nimis, a Feagne, a Triest, tai archivis di Parigj e dai Loyds di Londre!

E son dîs ains che ti cîr, Missavaja su dutes les mapes de Siberie tai libris de Transiberiane e parfìn te Ambasciade Russe di Parigj (Service Culturel). Dîs ains ch’o sgarfi e che no ti cjati!

Dute colpe di chel mostacjon di Stalin che une biele di, ai 18 di genâr dal 1941, al decidè di gambiâ el non dal paîs par dai chel di Babuskin, un rivoluzionari che cun Lenin al veve fondât el gjornâl “Iskra” (Faliscje). Brincât a Missavaja denant de stazion in plene gnot dal 1916, al ven fusilât sul puest cun cinc compains.

E vemi, in plene gnot dal 20 di otobar dopo quatri dîs e meç di treno, in chêl paîs: scûr e nêf che Diu le mandave. Nissun dongje di podê fevelâ... magari, miôr cussì, o feveli cussì pôc el rus...

Dut un sium: mai pui no varès crodût di incuintrâ Giordani in chestes cundizions... grassie Signôr! Le sô fede, le sô anime, le sô gjenuinitât, o pues tocjâles cul dêt.

Nissun dubit: mi spiete in te sô «lugubre e lorda baracca». Par intant o spietarai che vegni l’albe in sale d’aspiet. E lì une decine di Buriats “sclipignâts” mi fasin compagnìe. Chel al fò el mio “Comité d’aceuil”.

Apene l’albe, voi sglonfs e cjâf pesant, m’invii sule strade glaçade saludant el bronç di Ivan Babuskin (le sô statue e jè propit sul puest che lu an copât). A un scuelâr, avonde grandut, i domandi: “Hotel” mi rispuint: “Gastinitsa!” mostrant cul dêt. E vie jò, sul ôr de strade par no sbrissâ. E ogni tant mi ripetevi “gastinitsa?” braurôs di vê imparade ancje chê.

Ah, puare “gastinitsa” fate di troncs di len e di ingen siberian! E chê buine int che mi compagne fin te cjamarute. 160 rublos par gnot: el presit di tre cafès in sitât!

El probleme al nassè cuant ch’o ai domandât dal cesso, che par dut el mont e capissin: “toilette”. Mi an mostrât el ort, come là di Bulòt a Cjamadus. Puâr mai jò, ch’o salti fûr cinc voltes par gnot! Passience.

Pojade le valîs o viarç el “passepuart”: el magnetofono e le cassete par francês e rus che spieghe el scopo dal viaç: Giordani... lavôrs talians... ricuarts... Apene sintude mi disin: “Museї”. O ai capît che chel paisut al à un Museo e ch’al verç aes dîs. Doi scuelârs, sore che ur fâsi le fotografie, mi menin fin là.

Di gnûf le cassete e i documents dai scrits di Giordani. Ludmila, apene viert el museo, lu siere a colp e jù a bracèt a presentâmi aes autoritâts, sindic, diretôr di scuele e le fondadore dal museo (a bracèt parceche chel basavuâl di parigjìn al veve già marcolât dôs voltes). Dulinvìe, al jere marcjât, o sgambìn dôs peraules cul Buriat ch’al vent el lat a cjaces, cul Tartar ch’al vent verges e cjâr, cul Kazak ch’al vent scufis e cun “Gavroche”, tune biade puarine che ufris el so soriso, e nome chel, cuant che tu i metis cualchi rublo te man.

Tornant sul cont dai lavôrs in cors a Missavaja tal 1900, e fasevin el puart sul lât par ricevi el “rompighiaccio” Baïkal, ch’al lave sù e jù, cui vagons dal “Transibir” te sô panse di Puart Baïkal a Missavaja (75 km) intant che si finissi le curve feroviarie (260 km) atôr dal cûl dal lât Baïkal.

In zornade di vuè, nol è pui puart a Missavaja; al reste un trat di binari a scuare dal lât e il faro, gimul di chel di Puart Baïkal di là da l’aghe. Doi trats son bandonâts: el prin lunc el flum Angara inneât cuant che an fate le centrâl eletriche, tal 1956, a Irkusk alçant dut el nivel dal lât e dal flum Angara che lu discjame; el secont dilunc el lât clamât “opare taliane” e sorenomenât “Fibie d’aur de cinturie di fiêr” di 72 km, componût di 38 tunei, 248 puints, 18 galaries e un slac di mûrs di sosten ormai “Museo nazionâl architeturâl” e riservât par fâ turismo.

Dute cheste curve feroviarie e à doprât 10 ains, dal 1894 al 1904. Duncje al coventave intant el puart di Missavaja ch’al è stât pront tal 1900. Eco el parcè de presince di Giordani e compagnie el 1ⁿ di genâr dal 1900! Mentri ch’al scriveve chês bieles peraules plenes di sperance, si po ancje prosumâ che corès le solite vodka, baste viodi, ogni tant al scrîf mo Massavoja, mo Majavoja, invessit di Missavaja… mo Sibiria, mo Siberia.

E cumò, tal museo, in compagnie di Ivan Babuskin ch’al voleve miorâ el mont intîr, impiant le sô “Iskra” (Faliscje) si cjate el spirt dal Giordani, che chel al voleve semplicementri miorâ le sorte de sô famee e chê di Buje.

El prin al à vude le fin che si sa: implombât dat zariscj tal 1916. El secont, cuatri ains dopo (març 1920), muart tisic sule “Texas Maru”, le nâf che lu rimpatriave e calât tal mâr a «lat. 5° 38’ N long. 82° 10’ … ».

A ducj i doi: “In manus tuas Domine! ”

Cumò o varès tantes robes di contâ a pro dal riceviment di chel paisut e de sô int che mi an fat prometi di tornâ. Mi an lassât el lôr jet, cuant che mi an tirât fûr de “gastinitsa”. El sindic al à mandât i salûts a chei di Buje. El predi ortodos mi à benedît intant ch’o impiavi le cjandelute pal “Miot”. Une femine mi à regalâde une Bibie russe e une crôs cul fîl di lane di picjâ atôr dal cuel.

Sul moment di saludâsi, dôs femines sentades sul lôr scagnut mi an fat moto di fâ come lôr. Dopo un moment si son metudes a preâ: “Gospodi!...”

Usance siberiane: fidâ al Signôr el pelegrin, el viandant che s’invie.

Benedete Buriatie. Benedete le tô int!