"Le ancone dal Bide a Ursinins Pizzul 

'e jè tornade come gnove"

FOTO

Restauro

Ancje chest an l'associazion «Chei di Ursinins Pizzul» 'e à volût meti dongje aes manifestazions folcloristichis tradizionals pe sagre di Sant Jose£ qualchi iniziative culturâl. Al è un impen ch'al coste ma che j fâs grant onôr denant di dute la comunitât. Chest an, duncje, 'e àn organizade une mostre di fotografiis d'art di Bepute Baldassi e une mostre di modei miniaturizâz di Melio de Cosse. Cussì l'ingen e l'art di int di Buje 'e à vût ancjmò un so doverôs ricognossiment. Ma dongje di chestis, un'altre iniziative culturâl 'e merte di sei laudade: il restaur de Ancone dal Bide, inaugurât e benedît propit sul comenzâ des fiestis de sagre. Chest restaur, realizât cul concors dal Comun, de Provincie e de Bancje dal Friûl-Credito Romagnolo, al è un regâl par dut il paîs, ch'al insiore une strade e al fâs splendi un altri trat de fisionomie religjose de nestre culture. Il restaur al è stât fat cun grande cure e competence di Marie Rafaele Turco di Udin cul aiût artistic di Bepute Baldas.

In cheste ancone il Bide nol à metude nome la origjnalitât dal so ingen, ma ancje dute la sô grande devozion ae Madone! E par che il messaz ch'al voleve dâ al fos clâr a duc, al à creât a mût so atôr de statue de Madone une vere sinfonie di simbui plastics e di scritis ch'e mertin di sei studiâz. Il tema al è chest, articolât in dôs proposizions: La Madone 'e je grande e potente denant di Diu e dai omps. - La Madone e je l'lmacolade.

La glorie de Madone, rapresentade te nicje centrâl in pins cul Bambin in braz in dute la solenitât de sô ande e dai soi vestîz, 'e je esaltade dai simbui dal cîl adalt che dut si plee viers di jê (i cjavai cu lis alis, i agnui che puartin la corone de sô regalitât e la palme  dal so martiri), e des scritis latinis, adalt e sul basament de statue, cjoltis dal Magnificat (Luche 1, 48 s. ): «Fecit mihi magna qui potens est» (al à fat in me robis grandis Chel ch'al è potent) e «Beatam me dicent omnes generationes» (mi disaran fortunade dutis lis gjenerazions). 

Il rapuart particulâr e unic cu la Trínitât al è rapresentât: parsore de colombe simbul dal Spiritu Sant, in braz dal Bambin ch'al è il Fi di Diu (cu la man in at di maestri e cul mont te man zampe come paron) e infin de scrite che riguarde il Pari: «Pater meus agricola est» ('Zuan 15. 1) (gno Pari al è come un contadin ch'al governe la cjere). La potence de Madone in aiût da poare int 'e ven proclamade prin di dut des scitis: in alt tal arc: «Qui delucidant me vitam eeternam habebunt» (chei che mi onorin 'e varàn la vite eterne), sot la colombe: «Pasce edos tuos» (pass i toi zocui», e in bas: «Ave consolatrix aflictorum» ('o saludin te che tu consolis chei che son tal dolôr); plasticamentri la stesse idee 'e ven rindude cul maz di clâfs leât te cinturie de Madone (jê 'e je la parone di cjase in cîl), cul rap di uve ch'e ten in man e cu lis pincjs cjariadis di uve che decorin lateralmenti l'ancone, simbul de gracie e de salvece ch'e ven de redenzion di Crist, come ch'e declare l'ultime scrite in bas a gjestre: «Ego sum vitis vera» (jo 'o soi la vere vît) ('Zuan 15, 1).

Su chest schema di fons s'ingrope un secont tema iconografic, chel de Imacolade Concezion, che te tradizion glesiastiche 'e ven rindude cui simbui derivâz diretamentri dal test de Apocalissi di San 'Zuan (12, 1): «Signum magnum apparuit in caelo: mulier amitca sole et luna sub pedibus eius et in capiîe eius corona stellarum duodecim» (al comparì un grant segno tal cîl: une femine vestide di soreli e la lune sot i soi pîs e une corone di dodis stelis sul cjâf). Di fat la Madone dal Bide 'e poe il pît parsore di une miege lune e atôr dal so cjâf si disponin a arc dodis stelis. In pui la figure tradizionâl de Imacolade 'e 'zonte sot i pîs de Madone un sarpint che nol mancje nancje chi, a ricuart de promesse fate di Diu a Adam e Eve quant che ju à parâz fûr dal Paradîs e inverade cu la nassite de Madone: «Inimicitias ponam inter te et mulierem... ipsa conteret caput tuum et tu insiadeberis calcaneo eìus» ('o metarai la uere fra il sarpint e la femine... cheste 'e sfracuarà il so cjâf e lui al cirarà dibant di becâj il talon. (Gjenesi 3, 15). Chesc' modei iconografics 'e podevin vignîj al Bide tant dai librs liturgjcs, ch'e lui al veve e al

leeve, tant des imagjnis di devozion ch'e circolavin tra i fedei, come che lui stes al pant in tun sium dal 1875. Dopo vê riferît di jessisi insumiât propit de Imacolade Concezion al 'zonte che jê si ere presentade «con tutte le sembianze di quelle immagini sulle medaglie».

A chest proposit no vin di dismenteâ che propit in chei ains, dal 1854, il Pape Pio IX al veve solenementri declarade come veretât dogmatiche la dutrine de Imacolade Conce-zion di Marie, e che chê definizion «ex cathedra» 'e ere deventade la bandiere di duc' chei catolics che si batevin cuintri (liberai e massons) pe infalibilitât e pal primât dal Pape. E fra chesc' al ere, in prime linie l'Arcivescul di Udin natîf di Buje, Mons. Dree Casasola (Drigul), e cun lui il Plevan di Buje di chei timps, Mons. Pieri Venier, grant ami dal Bide.