Il numar unic "Il Bausar" dal 1988 (vedi articolo precedente) al à publicât une fotografie là che si viodeve un omp in mascare cun tai pîs un par di cruchiis e sul cjâf un zei fat a man. Alore Wanda Tondolo, ch'e vîf a Artigne cun sô mari, 'e à viodût cheste publicazion e, ricognossint so pari, e à cirût di savê cui che al veve le vere fotografie di chê stampe.

Ven a stâj che nus à fat scuvierzi che l'omp di chê pagjne simpatiche al jere so pari, e che si clamave Delio Tondolo, ch'al veve fat l'equilibrist. Lant a cjase di Wanda par cognossi miôr Delio 'o ài cjatât une famèe che cun tante cordialitât mi à fat viodi ce che lui ur veve lassât. Mediant la buine cure de fie pe robe dal pari 'o ài podut cjalâ e cognossi tantis bielis robis.

Elsa, la sô femine, mi à contât che Delio al jere nassût a Buje, a Codês dal 1912 e che fin di pizzul al veve gole di 'zujâ lant a fâ maraveis par aiar. Di dulà vignivie chê smanie di pericul, chê voe di lâ 'm alt a cirî di tocjâ il cîl? Forsit a lui nol interessave di murî! "Tant nissun mi vai!" al diseve.

La sô vite, fin di pizzul, 'e jere stade un 'zei plen di miserie, di umiliazions e di dolors, parvie che lu veve lassât cence pari e mari quant ch'al jere snacajut di pôs agn. Par podê vivi, di pizzinin, al à vivût par qualchi an cui soi fradis in tun orfanotrofi. A sôs agnes chê situazion ur faseve dûl e cussì agne Anute e Ide lu adotavin par podê tirâlu fûr di chê cjase desolade.

Delio a Codês, al veve une cjase di chês di une volte cul curtîl e la stale tacadis dal piûl e lis scjalis di fûr ch'e puartavin disore. In chel lûc al tacà a mateâ e sgherbetâ, lant simpri pe strade plui curte, fasint drezzâ j cjavei a chel che lu cjalave. Par lâ a puartâ il fen sul toglât ce coventavial lâ a fâ duc' chei scjalins? Al jere plui facil, par Delio, tirâ un fìl di fiêr dal piul al curtîl e lâ su par lì ridint e schersant cun la cosse plene di fen. Mai content di ce ch'al veve conquistât lant par aiar cul lâ dai agn si je fate une innomine.

A sedis agn, lant a Udin a viodi un spetacul, al viodè un equilibrist roman che si clamave Ivo Aprigliani. Restât scaturît di chel bulo, al decidè di copiâlu, stabiìint ce ch'al varès fat in te sô vite par vivi. Nissun j veve mai insegnât cemût fâ chel lavôr, ma la sô spotaneitât e il so istint lu judàrin plui di qualsiasi gramatiche. I prins suces ju vè tal so paîs, fasint lis sôs maraveis distirât sun tun fil di fier tacât sui cuvierz des cjasis atorator de place di Madone.

Dal 1932, cun doi amis, al vè le idee di fâ il gîr d'Italie cun tune bicicletone alte tre metros e miez. Al partì sul cricâ dì dal 10 di lui. Aì passà par paîs granc' e pizzui e al tornà a Buje il 13 di setembar soresere. Par documentâ lis fermadis ch'a vevin fat in chê lungje trotade pa l'Italie a' tignivin un diari dulà che si puedin viodi ancje vuè duc' i timbros e lis firmis dai podestàs e dai adez dal municipi di chê volte che ju vevin viodûz a passâ pal lôr paîs.

Il vecjo quader di Delio, la sô femine lu ten cont, cun reson, come une reliquie e come un document di valôr storic ch'al conte un moment de storie di Delio e de vite sportive taliane. Tra chês pagjnis timbradis si pò lei, lant daûr l'itinerari che a' vevin fat, il grant coragjo di un pizzul omp ch'al tacave a fâ grandis robis. Tornât a cjase, siôr di cheste esperience, al tacà a sei clamât tes sagres di paîs e cussì al rivave a vivi come che si jere proponût a sedis agn quant ch'al veve viodût Aprigliano a Udin.

Chestis sodisfazions, però, a' duràrin pôc. Lis vueris lu oblàrin a lâ pal mont: Etiopie, Afriche e prisonîr in Russie dulà che pal so valôr al cjapà la medae di bronz. Tra une vuere e chê altre; quant ch'al tornave a cjase, Delio al tornà a lâ a tor dulà che lu clamavin par fâ spetacul e cussì chei che j batevin lis mans a' jerin simpri plui numerôs. La int in chê volte no veve la television, il cine e dut ce ch'o vin in dì di vuè.

Ven a stâj che quant ch'al e lât a fâ un spetacul a Udin in place San Jacun la domenie dal 5 di mai dal 1946 'es nuf di sêre, la int sot di lui e jere come un grant tapêt pojât tal miez des cjasis sdrumadis de vuere apene fìnide. Un grant faro j butave la lus par inluminâlu denant dai vôi di chê puare int tribulade come lui dai mai de miserie e lu faseve semeâ un agnulut ch'al svueletave liserin a vinc' metros di altece.

Ce sodisfazion, ce contentece varâl mai vût chel frut che quant ch'al jere tal curtîl di sôs agnes al leve a puartâ il fen sul toglât pe strade plui curte! Gragn apuntamenz lu spetavin par dut il mont! Tacant dal so Friûl al slargjà in pôs agn le sô innomine fasint scrivi sui gjornai foresc': "Il pazzo volante", "Il più grande equilibrista d'Europa", "L'uomo deì brivido", "Il suicida a quaranta metri d'altezza". In te sô cariere di equilibrist, al lave "a 600 metros de altura!" A Coney Island lu àn clamât "Suicida italiano!".

Tra tanc' articui, però, 'o ài let un che mi à lassade instupidide e maraveade. "Por un cable a 50 Mtrs. del suelo correra en bicicleta el mejor equilibrista del mundo". Lui al lassave in beneficenze il vuadagn di chel spetacul venezuelan. La sô femine mi à dit che ancje altris voltis al à fate beneficenze a istituz par fruz bandonâz o a int malade.

Ce si puedial pensâ di un omp cussì? Lui no si smenteave di dulà ch'al vignive e ce che si provave a scugnî vivi in chêi puesc'! Cu la sô cariere al 'zirà dut il mont e cussì al podè cognossi gnove int, imparâ simpri robis gnovis! Ce podevial fermâ un omp cussì? Nol veve pore di murî, nol veve famèee, nol veve nuje di lassâ a nissun. La vite, però, cul so destin lu spetave ancje par dâ une svolte a chel mût di vivi e pensâ.

Dal 1949 al cjatave une fantate che lu faseve innamorâ e cussì, metint sù famèe, la sô nocurance pe vite si voltave in responsabilitât e j tacave a vignî un fregul di pore di murî e di lassâ al mont une femine e une frutine bessolis. Cun qual coragjo varessial podût continuâ a riscjâ la sô vite e la sigurece de sô famèe fasint ce che fin cumò al veve fat?