Al è nassût a Sequals ai 13 di otobar dal 1826 e muart a Parigj, in rue Cardinet n. 47, ai 26 di avrîl dal 1903.

A 17 ains al fâs il so garzonât a San Just a Triest e in te basiliche di Aquilee. So barbe e santul di batisin, cjaluni a Vignesie, lu clame a imparâ il mistîr cun mestris mosaiciscj di Rome a San Marc. Pôc dopo, si lu cjate a Vile Visintine, a lavorâ tal palaç de Principesse Bacciocchi, une gnece di Napoleon. Lì, in chel ambient francês, si fevele di scuviertis archeologjichis a Montpellier tal meridion de France.

O sin tal 1847. Al lavore al ricupar dai scjâvs di Montpellier, Nîmes, Narbonne, Béziers... robe romane. Propit a Béziers, tal 1852, al vierç un atelier e al lavore par cont so. Si fâs brevetâ (protezion par cinc ains) el so sisteme di ricupar di mosaics antîcs (brevet dal 23/3/1858). El so sisteme al po semeâ sempliçon: sacs di tele di farine di siale incolâts parsore, scjavâ par sot e traspuart fin in cualchi museo.

Al à di spietâ ancjimò un 15 ains par jessi cognossût mediant la sô invenzion: la preparazion in laboratori des tassarutes a ledrôs, incolades su cjarte fuarte cun cole di farine di siale, par tocs di cirche 50x50 cm, numerâts in mût che pui operaris e puedin lavorâ in propri el so toc. Sisteme che nol fasarà mai brevetâ.

Magari un cert H. Lavagne in «La mosaïque», éditions P.V.F., al presum che si riferive a une tecniche antighe dai “tesselari” e “musivari”. Dut câs, il merit di Facchina al è intîr.

Salviati, chel de Scuele di Mosaic di San Marc, subite al adote il so sisteme. Sisteme che al fasarà calâ i presis, calâ lis dificoltâts e cresci le critiche di chei che tegnin al mosaic tradizionâl.

E cumò? «Jo e te, Parigj, o vin di cjalâsi tai voi». Cussì o inmagjini il Facchina tal so meridion, che nol veve nissune voe di indurîsi lajù e di realizâ alc di grand lassù. Simpri pui, Facchina al cirive di fâsi viodi a Parigj, massime tes mostris internazionâls.

Mediant chel, dal 1855, al domande une incuintri cul rinomât «Viollet-Leduc» il specialist de Architeture medievâl, chel ch’al rinovave Carcassonne, Pierrefond, Notre Dame de Paris, robe gotiche, robe tipiche de Ete di Mieç. Nol jere par nuje le persone che podeve interessâ Viollet-Leduc. E pûr al bateve simpri a dutis lis puartis.

I tocje spietâ ancjimò dodis ains, le mostre dal 1867 a Parigj.

Charles Garnier, l’architèt imprevist vincidôr dal concors par costruî l’Opéra di Paris jenfri 175 concorints, nevôt di un marescalc di paîs, e son già sîs ains ch’al à tacât chel lavoron. El so sium: introdusi il mosaic a Parigj. Al è dispès in Italie. Al è amiradôr di robe antighe. Al domande presits a Vignesie, a Rome ai specialiscj dal mosaic. Des dôs bandis i domandin un 3.000 francs al metro cuadri e 10 ains di armadures. Nuje di fâ: i tocjarâ scjafojâ il so sium. La Ministrazion di tutele no permetarà une spese dal gjenar, le impinion publiche, le stampe e disarà e e scrivarà «Lassait chês robis ai poetes, ae storie, ae scovacere da l’Art». Inalore, Rindisi? Ma eco la Providenzie.

Cemût isal rivât te orele di Facchina il desideri di Garnier? No si sa. Si presentin in tre di Sequals: Facchina, Mazzioli e Del Turco. I spieghin che in 6-7 mês, lôr e son sigûrs di riviestî il volt da «L’Avant-Foyer» e par 200 francs al metro cuadri. «Pensait ce riceviment! Pensait ce gjonde! Mi permetevin di realizâ il gno sium di simpri!» al à vût scrit Garnier.

Sierìn i voi un moment... provìn a inmagjinâ l’incuintri... i nestris tre... sule cuarantine... mans come el coreàn... Girant daûr de schene, cun tant nervôs, il cjapiel «melon» comprât gnûf, i genoi frujâts cu la lungje pratiche dal “battuto” e dal “terrazzo” e soredut chel lengaç franc trivelât cul tamês furlan.

Tante sperance in chel moment des dôs bandes. Al pareve che il cîl si viergès, che il miracul tant bramât di Garnier e la ricompense tant spietade di Facchina si podevin tocjâ cul dêt. Ma il Garnier nol mole cussì ae svelte: simpri pore dal “veto” de ministrazion, de impinion parigjine par vie de policromie (di bant no lu clamavin «il Veronese de architeture»). Alore ûr dîs: «Dome chi a Parigj o podarês fâsi cognossi. Jò, us al promèt, o pandarai il vuestri ingen». E si metin d’acordo par 162 francs al metro cuadri cun smalts di Vignesie. Dome che, a Facchina i fasevin pore i cuatri medajons disegnâts dal De Curzon: cuatri alegoriis de Mitologje greche, e al sugjerì a Garnier di tratâ cun Salviati el venezian (chel de Scuele dal Mosaic di San Marc). E chest, braurôs di jessi dentri, ju fasè par 1000 francs l’un. Risultât perfet, stampe entusiaste, impinion publiche cujetade.

Garnier al veve progjetât in seguit di riviestî di mosaic le stragrande cupule dal Foyer, che lis pituris si stavin ruvinant cule lûs a gas. Ma le France si preparave ae vuere cule Prussie e il Facchina al lavorave a Lourdes aromai, pe pui grande sodisfazion des Autoritâts glesiastichis dal Santuari. Intant il Guviêr Francês lu veve già fat «Chevalier de la Légion d’honneur» e l’Italie i veve dade le onorificenze de «Corona d’Italia», se no altri pe sô gjenerositât viers la sô tiare di origjine.

In conclusion, Charles Garnier, cence Facchina, al podeve dome insumiâsi di introdusi il mosaic a l’Opéra. Lui al viazave in Italie amiradôr di marmui, di mosaics antîcs, di policromie, premurôs di dai un rip a une architeture induride, simpri in lote cule Aministrazion di tutele che sule fin dai lavôrs e strengeve simpri plui le cuarde de borse. Al à vût scrit: «O soi plui braurôs di vê vût el dran-dran de mê epoche, dibessôl, che di cualsisei opare mê».

Il Facchina, cence di Garnier, al podeve imponissi subit dopo in te “Basilique du Rosaire” dopo i miracui di Lourdes. Ma Charles Garnier, ricognossint, i veve imprometût di fâlu cognossi pardùt. Fasint scrivi cun tessarutis d’aur, cence puntegjadure, su doi arcs a l’Opéra, doprant un alfabet cirilc bastard dal otâv secul: «Il mosaic moderni al è stât doprât pe prime volte in France par decorâ chest arc e pe vulgarizazion di cheste art», «De Curzon al à fat il disen, i medajons e son di Salviati. KTL1 Facchina – Karlos Garnier architectonas»

Chest istât tal simiteri “Pére Lacheise”, viâl 2 sezion 41, in presince di Madame Denise Facchina (92 ains) di Vanessa Facchina, dai “Amîs dal Friûl” ch’e an rinovât el monument cul jutori de Scuele di Spilimberg e de Ministrazion di Sequals si è svolte une piçule cerimonie ricuardant le vite e les vites di un Furlan nassût puar (ce covente dîlu) che sui 40 ains cul so ingèn al stave benut e che sul tramont al è partît lisêr cuntun cûr di puar. Le semplicitât dal monument lu dimostre, a confront di opares faraoniches che son atôr, par int ormai dismenteade.

Eco une lezion par nô ducj, le lezion di un Furlan di une volte, di un vêr Artist che nol à mai fat brevetâ le sô invenzion; ch’al veve regalât i soi fôrs di smalt a Vignesie a Angelo Orsoni par ricompensâlu de sô fedeltât e puntualitât; ch’al veve creade le “Societât Operaie di Mutuo Soccorso” par chei di Sequals a Parigj; ch’al jere rivât a gloti lis critichis tipo: «Cul sisteme Facchina, il mosaicist nol è plui un artist, al è un manovâl» e che soredut, une schirie di Artiscj si son sparniçâts pal Mont intîr, dopo jessi stâts inscuelâts di lui o dai soi.

Al è stât su scjale mondiâl une specie di Filip Cjocjo par Buje.

Al jere l’Artist: si è impensât di maridâsi nome a 47 ains cun Antonietta della Savia di 24 ains pui zovine.

E an tant insistût, Garnier in teste e ancje il Guviêr Francês, par ch’al meti su une scuele di mosaic a Parigj. Ma Parigj nol è Spilimberg. Tentatîf al è stât, cun zoventût sorde, mute, handicapâts si po dî. E vuelin secui di esperiencis e cuintai di Grinte furlane! («Indulà si le comprie cheste?» al verès dit Rino Bulòt, gno barbe).

Finalmentri, atôr dal so monument, un sintût De Profundis, man in man, in te lenghe nostrane, cussì nobil, cussì biele, propit chê ch’e à puartât tal Batisteri el mosaic moderni in France... par Furlan!

«Signôr, ti clami dai fonts ch’o mi cjati...

Signôr scolte la mê vôs...

Slungje le orele...»

Cun Gjò, Facchina!

Note

1) KTL=Kai-Ta-Loipa=etc.