I siums 

dal mago Bide

di Gian Carlo Menis

Il mito dal mago Bide al ten-dûr ancjemò a Buje. 'E je ancjemò int ch'e si vîse di lui, amancul par sintût a dî, ancje se la memorie s'inturbidìs simpri plui di misteri.

In realtât, il mago Bide, ch'al jere un Miot di Ursinins Pizzul, di non Vizens (Vincenzo Giordani: 1820-1892), al é stât un dai personagjos plui impuartanz de pizzule storie locâl dal secul passât.

Il mistîr (desìin cussi) ch'al faseve al jere chel di «uaridôr erborist», ven a staj une specie di miedi ch'al uarive o ch'al tentave di uarî lis malatiis cu lis jerbis (decoz, impacs, sirops, infûz, polvarins e vie discorint). Ma lui, un pôc inteligjent un pôc mataràn come ch'al jere, curiôs di dut, letôr inrabiât di libris di ogni sorte, prestigjatôr, poete, scultôr, atôr nasût... al veve savût creâsi in tôr une fame che si jere spandude par dut il Friûl.

«De fieste - al à scrit Pieri Menis - 'e capitavin chês feminis cence nuje tai pîz, cui muloz in tune man e in chê altre une fete di polente e qualchi pome invuluzzade tun fazolet. Al pareve ch'e lèssin a un perdon. E al mago 'e contavin, une a la volte, lis lôr passions. Lui, cence scrupul di sorte, al prescrivere chel o chest decot di jerbis e altris pastroz, ch'e no fasevin ne cjalt ne frêt... Ma intant lui al veve risolt il problem de vite cun pôc...» (1).

E «un'altre baronade al veve il mago Bide - 'e à scrit Marie Forte -. Al faseve spandi l’aghe a ogni malât. Po al meteve dentri tre fueis di urtie vive e s'e restavin verdis si butave tal câs cun dut il so impen, parceche il malât al sarès uarît comut» (2).

La Forte, ch'e à tirât-jù un biel ritrat dal Bide, propit come che si pò viodilu tune vecje foto­grafie conservade dai erêz, 'e va ancjemò indenant cussì: «Il Bide si veve lassat cressi une barbute a corone atôr de muse, ch'al semeave San Samuel, e la int 'e veve plui sudizion e lu scoltave... Al veve lassât cori tantis vôs sul so cont: che lui al veve un podê straordenari cuintri lis tristis robis, che s'intindeve cui spirz e cun aganis, ch'al indivinave dut...» (3).

In conclusion: ch'al jere un mago vêr!
La figure dal Bide, 'za presentade dai doi autors citâz, 'e mertarès però di jéssi studiade in forme plui sistematiche (4). Ancje parceche uè une ricercje in chest sens 'e pò doprâ une font gnove, puartade a cognossince cumò di pôc. Si trate di un còdiz di cjarte a man, di 378 pagjnis, dut scrit nujemancul che dal stes Bide (5). Lì dentri si cjate un pôc di dut: notis di medisine, risetis di terapie cu lis jerbis, memoriis autobiografichis, prejeris, poesiis, trucs di prestigjo e di magĵe... Ma la part plui grande 'e je fate di descrizions di siums faz dal 1840 («in età di anni 20») fin al 1882. Ogni sium al ven riferît dal Bide cun tune vore di particulârs e cu l'intent di no smenteâ nuje d'impuartant come «segno», parceche lui al jere convint che i siums 'e son segnos di chel altri mont pai vîfs. Cheste silloge di siums di un omp di Buje dal secul passât al à cence dubi un grant interes etnografic e psicanalitic. Infati, daûr dal ambient bujês dal Votcent e jenfri des fantasimis onirichis dal Bide, si rive adore di viodi vivide la muse di une personalitât complesse e, di riflès, di dute une culture popolâr.

  NOTE

(1) P. MENIS, EI mago di Buje: Ce fastu? III,9-10 (1927) pp. 7 s.; ID., Lis lejendis di Buje, Udin 1928, pp. 16-19; ID., Anche il «mago Bide» fornaciaio: Inaugurazione del campanile di Avilla, Udine 1951, pp. 38-40.

(2) M. FORTE, Il Bide di Miot: Sot la Nape XXI, 1-2 (1969) pp. 15-22.

(3) ibid. p. 17.
(4) Un scandài interessant in merit lu dà N. CANTARUTTI te note relative ae lejende dal mago te seconde edizion de «Lis lejendis di Buje» citade, in cors di stampe (Societât Filologjche Furlane 1982).

(5) Il libri al è conservât cun cure di Silvano Taboga, di Ursinins Pizzul, che gjentilmentri nus al à segnalât.