Le Madonute dal Bide

 fate di len

di Andreina Nicoloso Ciceri

Passade le sagre di Sant'Josef, ch'e je une des primes sagres de vierte, une volte i netris omps 'e fasevin fagot par tornâ dome dopo San Michêl. 'E lavin tal forest, pal pui come fornasîrs. Fornasîr al è stât ancje el Bide di Miòt, Vincenzo Giordani, nassût tal 1820 e muart tal 1892; ma lui nol à imparât dome a fâ modòns. Lui al veve un estro artistic naturâl e, une volte che les sôs mans 'e àn cjapade confidenze cu la rigile, al è stât bon ancje di fâ figures, statues adiriture. Cussi'e son opare sô chê biele «Madone de uve» ch'o podìn ancjmò viodi a Ursinins Pizzul sul mûr dai Mucjns, chê di Vile su la ostarie di Ganziti, e âtres ch'e son lades pierdudes.

No sai se prime o dopo di chês di rigile, Bide al à tentât di lavorâ ancje tal len e mê mari 'e à vude le furtune di comprâ l'uniche statue di len ch'e reste di lui: une Madone no tant rifinide, se no te muse, ch'e semèe slissotade cun afièt; une Madone un pôc ingjenue, ma ch'e prove l'istint naturâl dal autôr (1).

Quant ch'e vevin di sdrumâ le cjase di mê mari, une des primes a lâ-jù dopo el taramòt, j ài tant fat che i pompîrs 'e son lâz-su a salvâmi le Madonute dal Bide. E cumò al sarès di just che chê Madonute 'e cjatàs pâs te gleseute dal so borc...

Dal Bide, dal «mago» Bide, jo no savevi nuje prime di lei le biele conte che mê mari 'e à scrit su «Sot la nape» (1969, 1-2), une conte un pôc di fantasie e un pôc su informazions dai vecjos. Ma le fantasie si met simpri in moto quant ch'e si pense al Bide, e propit lui al à fat in maniere che le sô figure 'e jentràs te liende. 

Un pôc artist, un pôc botanic, ma ancje omp ch'al veve un istint sigûr pes robes de vite. Fato sta che lui al reste un di chei che, cence vê vude une istruzion, 'e savevin viodi ce che atris no viodevin. Dopo dut, une biele figure vignude-fûr de nestre int di Buje!

(1) Cheste statue 'e fo scolpide prime dal 1848. In chel an difat il Bide al scrîf: «La statua (che aveva sognato) è quella che feci di legno, immagine della B.V. Maria per esponerla al pubblico» (n.d.r.).