FOTO

Cui à dit che al à di lâ sui gjornâi nome cui che al à fat robis straordenariis? E po cuant sono straordenariis lis robis, intal ben o intal mâl? Parcè un arbul che al cole fasial fevelâ di sé cun dut il dan che al fâs e invessit nissun si vise de foreste che e crés cidine?

Mi passavin pal cjâf chescj pinsîrs intant che o jeri a messe par Alma, in chê dì che le vin compagnade a San Bortul.

Alma e jere un arbul de foreste che e crés. Jê, come tante int cidine, e à puartât a bon fin la imprese plui straordenarie di dutis: chê di fâ ben, cuasit cun devozion, ce che al va fat ogni dì.

Lu à fat «con fierezza», al à dit monsignor Goi fevelant di jê. Mi à semeât che e fos la maniere juste di descrivi cuntune sole pinelade cheste femine di Ursinins Piçul.

E jere nassude apene un pas di là di Ursinins, a Sacuel, te grande famee des Caries; a Ursinins si è sposade cun Elio Bolzòn e al è lì che e à vivût par cuasit dute la sô vite, se o gjavìn un pôcs di agns vie pe Svuissare e i ultins timps a Madone.

La mê memorie no rive a cuvierzi dute la vite di Alma, ma o ai tai vôi doi puescj dal borc che i fasin di curnîs: il trop di cjasis dapît de Androne, là che e jere a stâ, tun dai curtîi di Bolzòn, e il volt de strade, di front de glesie di Sant Josef, là che par agns e à lavorât cun Elio, par judâlu daûr dal desc di cjaliâr prime te buteghe dongje il curtîl di ’Soc (lì che al metè sù il so prin “studi”so barbe Cisio, il grant fotografo mai dismenteât Tarcisio Baldassi), e dopo cualchi pas plui indenant, plui o mancul lì che cumò a àn il studi so fî Egidio e so ginar Sandro.

Le viôt a movisi svelte, parfin di corse, lant sù e jù de cjase ae buteghe, de buteghe ae cjase, simpri in scomesse par no pierdi timp e par stâ daûr a dut, tant di une bande che di chê altre. E jere come chei mulinei di polvar che si jevin sù tal cjalt, che cumò e son, subit no si ju viôt plui. Ma intant che e jere ocupade cence padin, e rivave simpri a cjatâ une soste par scambiâ dôs peraulis, par dâ une man tes iniziativis dal borc o dal paîs, o par fâ un cafè a chei che a levin a cirî Elio. A pît o cu la biciclete, e passave pe Androne, là che a cjapavin lûs i balcons de mê cjase e là che lis vôs e jerin dutis di famee: chê cul flât a grops di Fabie, chê sclete di Nana, chê complimentose di Armida. Il sun de vôs di Alma al jere misurât e cence sgriaduris: une vôs pastose ancje se no le spindeve, che jo o sepi, a cjantâ, cun dut che Elio al jere simpri tal mieç de musiche. Mi visi i vôi vîfs, che a savevin jentrâ tai discors e mostrâ sorprese, marivee, compassion, interès, comprension. O ai ben devant dai vôi lis sôs mans, segnadis dal lavôr. Mi visi il so ridi sigûr, viert ma no sfuarçât e il so fevelâ cun peraulis ben poiadis, sieltis cence sparagnâ su la proprietât dai significâts, su la ricjece dai vocabui, su la profonditât des espresssions: Alma e jere pardabon une che viveve “con fierezza”, dut altri che une persone smamide. Il so non al jere il so spieli: la fuarce di une Anime intun fisic fat di gnerfs plui che no di cjar.

E saveve fevelâ di dut, e mostrave interès par ogni robe. Lis esperiencis diretis de sô vite a jerin il fîl condutôr, il filtro des sôs riflessions e des sôs opinions, ma il so pinsîr al jere bon di leâ la trame di chês esperiencis cu la realtât ator di jê, cu lis personis, i moments e i fats dal paîs opûr de grande storie dal mont.

Ma ce che mi lassave simpri un gust profont di cjacarâ cun jê al jere il fat che no le sintivi mai a vierzi discors cuintri cualchidun; pluitost i plaseve contâ lis cualitâts di chel o chel altri. Come tante int che e à tal sanc la umiltât plui vere, (cualitât diferente de false modestie!) e viodeve di misure ingjigantide i progrès di un zovin che al studiave, di une famee che e saveve frontâ la vite e i soi dolôrs, di cualchidun che al veve savût fâsi strade partint dal nuie. Al è clâr, ancje se no à mai fatis enuciazions di principi, che i soi valôrs a jerin i afiets, il lavôr, la culture: une culture che di sigûr no veve podût concuistâ a sun di titui di studi, ma che e veve tignût in alt cun chê curiositât di imparâ e di capî che e je carateristiche nome des personis inteligjentis.

Alma e Elio e jerin santui di batesin di mê sûr, e par chest a cjase mê si usave fevelâ di lôr come di “santul” e di “santule”: santui di ducj, insome. Duncje, al capitave dispès che o lessin “là di santul, là di santule” a fâ provis par cjantâ intun matrimoni, o par une ocasion un pôc speciâl, une volte parfin par regjistrâ une trasmission pe radio. Lui al veve in cjase il so armonium a pedâi e dut il fassut dai spartîts. Cence cjantâ une note, judantsi a voltis cuntune sivilutade che e doveve fânus jentrâ tes orelis la frase musicâl di imparâ, al passave sù e jù pai tascj i soi dêts grues, usâts a tirâ il spali par cusî scarpis, e come par incjant e vignive fûr la musiche lisere, limpide, precise, che nus faseve inmagjinâ grandis orchestris daûr di nô. Nô o cjantavin e Alma e continuave cidine a fâ lis sôs robis. Cuant che dut al jere finît, e diseve la sô, cun cognission di cause e cun sinceritât: e no jere mai une volte che no nus fasès sintî la braure di vê fat une robe impuartante, biele, grande come il cjantâ. Par chest, cjaminant daûr di jê, dal domo al simiteri, mi soi domandade trop che al po sei stât merit dai soi incoragjaments e des sôs peraulis di stime il vê imparât a meti cûr e buine volontât in tantis ativitâts de mê vite. E o soi convinte che al sedi stât un toc di merit so se Elio al à spindût dut il so timp e dute la sô passion pe cantorie de glesie di San Scjefin, opûr pal coro di Buje, cuant che don Luigino D’Agostini, tal ’67, lu metè in vore, propit podint contâ ancje su la sô colaborazion di brâf organist. Elio nol varès podût fâlu cul stes valôr se nol ves vût in cjase cui che al saveve scoltâlu e tal stes timp sostignîlu; e no crôt che la cantorie e il coro a varessin podût rivâ ai stes risultâts se la cjadene di fuarcis positivis che a judin a meti dongje alc di bon e ves vût un anel debul inte presince e te colaborazion, daûr des cuintis, di Alma! La stesse robe si podarès dî par altris iniziativis, de Fieste di Primevere Mont ae Sagre di Sant Josef a Ursinins Piçul, là che jê si prestave a dâ di man, puntuâl, ative e mai strache: le viot ancjemò, dute indafarade a fâ polentis une daûr l’âtre pe sagre di Mont tai agns 60. Plui lavôr al jere, plui e jere contente, parcè che al voleve dî che lis robis a stavin lant de bande juste. A jê, si capìs, no i vignive nuie te sachete, ma al jere chel il biel: fâ parcè che al lave ben fat.

Don Luigino D’Agostini, che tancj a ricuardin come capelan dal ’61 al ’67, plen di ideis e di iniziativis par tignî dongje Buje e la sô int, al jere une di chês personis che Alma e veve metût suntun scjalin plui in alt. Fin che al steve ben, e veve peraulis di stime par lui, pe sô passion pe musiche, par chel che al faseve pal paîs e soredut pai zovins, pe sô inteligjence parsore dal comun, pe sô clarece di caratar. Cuant che si è inmalât, e al à començât a scombati cuintri il mâl che lu à puartât vie, e menave il cjâf cence peraulis par dî la sô amarece, ma ancje la amirazion sconfinade pe fuarce de sô anime e de sô fede, drete e cence sovrastruturis inutilis, che lu puartave a fidâsi di Lui, lassù, che al sa il parcè dal ben e dal mâl.

La fede: o pensi che ancje par Alma e sedi stade il valôr plui grant. O dîs che “o pensi”, parcè che no jere une che e leve ator a fâ predicjis. Ancje par jê la fede no jere fate di peraulis ma di comportaments di ogni dì, tes piçulis robis di cuant che lis zornadis a semein svuidadis di ogni sperance. Il banc di prove de sô fiducie tal Signôr de dutrine che e veve imparât di simpri si è fat indenant di brut cul taramot che i à butade jù la cjase, po cu la malatie e la muart di Elio. Infin, ben planc, si è dade dongje la sô malatie, che no i sparagnave né lis soferencis fisichis né la rinunce a cjaminâ, durissime par jê che e veve simpri corût. L’ultim strap, chel di bandonâ Ursinins Piçul…ma lu veve cjapât cuntune serenitât che e sconfinave te contentece, dal moment che e leve a stâ intune cjase finalmentri comude e biele, là che no i mancjave nuie, tant mancul l’afiet e lis premuris atentis dai fîs e dai nevôts. Une mari no domande di plui.

«Puarte to mari a cjatâmi» mi diseve cuant che, ormai di râr, le viodevi. Il nestri apuntament fìs al jere ae sagre di Andreuce, in avost, là che e rivave puntuâl cun soi fîs Egidio e Annamaria e cu lis lôr fameis. Tal 2002 i vevi prometût che i varès lassât mê mari lì di jê dut un dopomisdì, parcè che o savevi che e vevin gust di fevelâ a lunc di ce che al sucedeve tal borc e dai lôr ricuarts. Ma mê mari e je lade lassù di San Bortul prin di jê, cence che o vedi rivât a mantignî la promesse. Cussì, in chê dì di novembar dal 2002, Alma e à scugnût sei jê a vignî jù a Ursinins Piçul, cu la sô carocele, par dâi la benedizion.

Cumò Alma e je tornade a Ursinins par simpri. «Cussì forsit o rivi a vignî a cjatâti plui dispès di ce che ti ai prometût tantis voltis e no ai mai rivât a fâ…» i disevi dentri di me cjaminant cu la lungje prucission di int che e je vignude a compagnâle fin a San Bortul.

In fin dai conts, e je tornade a cjase. Par nô di Ursinins Piçul, San Bortul al è apene difûr dal porton, lu cognossìn di simpri. No nus fâs pore l’ambient plen di fotografiis di piere, là che nus ridin chei che a àn ormai passât l’ultin confin, e nancje lis pituris di Ursella, cul judizi universâl plen di agnui e diaulins, che dal alt de cupule nus metevin i sgrisui al rosari de gnot dai Sants, cuant che o jerin fruts.

Ma la vere cjase là che e je tornade Alma, cun mê mari e tancj altris, e je chê de nestre sperance, plui in alt de cupule di San Bortul. E je la cjase di ducj i arbui che a son cressûts, che a àn dât rosis, semencis e ombrene frescje, a àn frontât tampiestis e burascjis ma a àn tignût lis lidrîs ben profondis te tiere de lôr storie e dai lôr afiets. Mandi Alma: cence premure, sì, ma cuant che sarà ore, a riviodisi ducj Lassù.