Tra i protagoniscj ch’e àn segnât il rinovament dal teatro furlan, un puest di primarie impuartance j spiete a Alviero Negro (1920-1987), insegnant, gjornalist, scritôr e prolific autôr di tescj teatrâi.

Al jere nassût dal 1920 a Muzzane, te Basse, e restât uarfin cuanch’al jere inmò frut, al veve scugnût lassâ il paîs par jentrâ tun colegjo in Toscane. Dopo il diplom e il prin incaric come insegnant, al veve partecipât al Moviment di Liberazion tes filis de “Osôf” e, finide vuere, al veve tornât a cjapâ il so puest te scuele. Intant al veve scomençât a colaborâ cun diviarsis rivistis, a scrivi e a fâ il condutôr di trasmissions pe RAI. Dal ’71 al publicà ancje un libri di contis dal titul “Ajar de Basse”. Ma dulà che Alviero al à metût dut il so impen e manifestât la sô vocazion artistiche, al è stât il teatro furlan, che cun lui al à cognossût une gnove stagjon gjavantsi de mediocritât des vieris comediis dal passât.

Di simpri il teatro al è stât une des espressions artistichis plui impuartantis pe incressite civîl e culturâl di une int, ma la è ancje chel che di plui al è mancjât ae culture furlane, cundut che tal cunfinant Venit si vessin vût esemplis come chel dal ’500 dal Ruzante e chel seguitîf di Goldoni. E duncje il Friûl, pûr disponint di une cualificade tradizion tai studis storics, leteraris, lenghistics, des tradizions popolârs (e vuê incalmât parfin tai programs Internet), tal teatro non veve vût autôrs impuartants, se nò da râr e cun tescj di scjars valôr artistic, tant che su la “Panarie” dal ’24 Chino Ermacora al scriveve: “...gli autori non sanno evitare quasi mai la sdrucciolevole china che mena al matrimonio... rimpannucciando stinte figure di burberi benefici, di preti ficcanaso, di beghine baciapile, di fantesche mezzane e maliziose: tutto un piccolo mondo di marionette, più che esseri artisticamente concepiti e trattati”. Chest articul al jere stât ripuartât di Negro stes dal ’79 su “Risultive Trent’agn”, che te midiesime riviste cussì al comentave il scrit: “...salacôr no si pensave che il teatro al podès deventâ un document di denunzie, un mieç par mejorâ dal pont di viste morâl, par jevâsi plui ad alt e viarzisi al mont”.

I prins stralûs di un teatro gnûf si scomençàrin a viodi dal ’27 cun “Il Zoc” di Ercul Carletti, podopo cu la ispirade ma isulade vôs di “I Turcs tal Friûl” di Pasolini, cun Luîs Candoni e Renato Appi che cu lis lôr creazions teatrâls dal dut rinovadis, si distacàrin dai vieris modêi oleografics par frontâ problems plui di fonde e di caratar universâl. Juste in chest gnûf teatro-veretât Alviero Negro al è rivât a trasferî la sô passion gjenerose e la sô fantasie, proponint tescj moderns che a vevin la lôr lidrîs te storie e te realtât. Spetacui dulà che sot la sô esperte direzion i atôrs si movevin te suaze di senaris dal dut origjinâi e creâts de sô ferbinte fantasie.

E cussì da ’65 al fo screât “Il Quilibrio”, un’opare satiriche su la pulitiche e sul custum, un spetacul anticipatori par chei agns ch’al puartave in sene una satare ferbinte. Lis replichis a fòrin unevore, e ancje orepresint cualchi companie lu à ancjemò in repertori. Dal ’66 Negro al publicà “La Cjase”, un dram dulà che i dirits che Basili al veve su la sô cjase no vignaran rispietâts par cause de pulitiche e dai puliticants. Dut si concludarâ cu la muart di Basili tra lis flamis de cjase. Dal ’69 e vignì fûr la comedie pai fruts “Lis zariesis pa mari di S. Pieri”, dal ’71 “Buje”, une comedie scrite insieme a L. Cjanton e daspò, tal ’75, inmò un’altre comedie dal titul “Joane”. Simpri dal ’75 al fo publicât “Plomp e Nivel”, un dram dulà che Negro al palese dut l’amôr pe sô tiare e pe sô int, metint su la bocje dal protagonist lis peraulis: “... ‘o vin di fevelâur a la nestre int... ’o vin di dismoviur il cûr, stizzâur la fantasìe... e ride e vaî cun lôr, e dîur ce ch’a son: sì, gjarnazie di une int antighe, popul di une lenghe che di secui ur côr pa li venis. E dîur che no si làssin dislidrisâ de lôr tiare... Nô us cjantarìn simpri di libertât, che la sùpin i fruz tal grim da lis maris di lûs e di colôrs, la lûs e i colôrs de nestre tiare!”.

Tre agn dopo, dal ’78, al fo stampât il test di “Strumîre e Zambarlans”, un dram storic ch’al puartave in sene i fats insanganâts che a metèrin un cuintri chelaltri i doi partîts dai Torians imperiai e dai Savorgans venezians in chê malandrete joibe grasse dal 1511. Dal ’80 “Il Bunker”, che si riclimave ai problems d’inchevolte su lis servitûts militârs ch’a inderedavin il svilup di tante part dal Friûl, e l’an dopo e fo la volte dal dram “Gne Milie”, intant che dal ’85 al vignive presentât “Friûl”, un test storic in doi ats, une sorte di saghe sul nestri passât. L’ultin lavôr, publicât dopo de muart di Negro, al è stât “Il Misteri de Crôs”, un dram che si riclamave aes rapresentazions sacrâls de Ete di Mieç, ch’e à vût in Jacopon di Todi une des vôs plui altis.

Fûr di “Plomp e Nivel”, stampât pe Clape Culturâl Aquilee, e “Il Misteri de Crôs” stampât de “Nuova Base”, dutis lis altris oparis e àn vût come aditôr la Societât Filologjche Furlane. Ma nol baste, stant che dal ’71, come dit al à vût publicât un libri di contis dal titul “Ajar de Basse”, pes edizions di Risultive, un libri dulà che l’autôr al ûl tornâ a une forme di narative popolâr come i antîcs contestoriis. Leint cualchidune del sôs contis, come “Ordan” o “Un cjapiel di stran” opûr “Gno nono”, al pâr dabòn di sei dongje dal fogolâr a scoltâ inmagâts lis storiis dai vons di une volte.

Infin, dîs agns dopo de muart di Alviero Negro, la Companìe dal teatri sperimentâl di Avile di Buje e à stampât un lavôr inedit dal titul “Un fîl”, une “pièce” cetant moderne ancje se scrite tai agns Sessante e che l’autôr nol à dât aes stampis, salacôr parceche i timps no jerin inmò madûrs par un teatri ch’al va in sot in tems e situazions che un trant’agns indaûr al jere dificil presentâ al public. In “Un fîl” si mòvin cuntune ritmiche sence polse diviars protagoniscj: doi amants ducjedoi cuntune famee aes spalis, une femine sole inmò tormentade des sôs pulsions, un emigrant, un zovin smàfar e un predi bon e comprensîf ch’al rive a capî e ad assolvi la sô int. Une varie umanitât dividude des situazions, dai problems e de pulitiche, ma unide in maniere solidâl dal fat di partignî a une midiesime cundizion. Par cuintri i amplificatôrs a difòndin vôs fuartonis che a rapresentin la clas dominant che, fuarte dome de retoriche, no pò e no ûl capî il popul e mancul ancjemò i soi desideris. Sichè doi monts: chel de int comun cu lis sôs debulecis e, di chealtre bande, chel dai potents cu la lôr supierbie e prepotence.

Come che si viôt une ativitât no comun chê di Negro, ch’al à scrit di teatri cul rigôr de storie e cul lengaç de puisie.

Disegnant chestis notis sul autôr, vâl la pene ricuardâ che un moment impuartant te vite di Alviero Negro al è stât il so incuintri cun “Risultive”, un grop culturâl nassût dal ’49 ch’al à vût Josef Marchet come saponte e predêl culturâl. Un incuintri determinant no dome parceche j à permetût di insiorâ il so percors culturâl, ma ancje parce ch’al à contribuît a dâ coerence ai problems leâts ae koinè furlane dai soi lavôrs teatrâi.

Cun lui il nestri teatri nol è stât plui dome di evasion, ma al à puartât in sene sintiments e caràtars, cualitâts e difiets, realtâts pulitichis e sociâls di une int che, come ch’al diseve lui, e à une storie, une pusizion gjeografiche, une sô maniere di sintî, di cjantâ, di patî. Lis sôs oparis, scuasi dutis premiadis, a puedin jessi cunsideradis une declarazion di dignitât umane, un testament di impen e di grant amôr pal jessi di cheste tiare.

Par dâ une cerce de ande stilistiche di chest autôr, si ripuarte la conte “Ordan”, gjavade dal libri “Ajar de Basse”.

Ordan

di Alviero Negro

A Ordan no j veve mai pocât il lavôr. Lu diseve ancje lui, dal rest, e, par chel, nol si jere mai insumiât di imparâ un mistîr. - Jo ’o ài di lâ tal cino – al diseve. – ’O soi nassût par fâ l’artist, jo! –

Cussì si jere fat fotografâ par denant e par daûr, ridint e vaint, lecât e discjaveglât, resint e pezzotôs, a muse viarte e a muse dure: come un artist complet, insumis, pront par dutis lis parz. Par un quart di litro, subìt, lì, tal miez de strade o ta l’ostarie, al jere bon di fâti la part di Rodolfo Valentino o chê di Buster Keaton. Al jere di chei timps, Ordan!

Nol jere biel, par nuje! Al veve un bocon di nâs pendolot, simpri bagnadiz e sgargarôs; vôi discocolâz, mans come palotis, bocje come un fôr, un personâl di bacalà cul mâl-da-l’urtìe par vie che si gratave simpri. Une sacodade di nâs, une gran ridade come une sglovadure, e ti pareve di vê indenant Jimmy Durante. Chel di Durante, il nason di Hollywood, al jere il numar che j vignive miôr, e Ordan lu tignive-sù di presit: miez litro a la volte. se no j vès plasût il bevi un tic di masse, Ordan al sares deventât dal sigûr un grant artist dal cino.

Par bevi duncje – che di sêt a ’ndi veve simpri une vore – al cumbinave; pal mangjâ (che ancje di fan a ’ndi veve une vore), al proviodeve so pari: un vecjut pulît e minudin, plui di là che di ca, ch’al faseve il scovazzin sol dal Cumun. Il puar vieli al saveve di no vê vite lungje e che so fi nol sares mai stât di chei ch’a san tignîsi a stic, e inalore al procurave di indrezzâlu sul lavôr e j diseve, ogni volte ch’al podeve cjatâlu sancîr: - Lasse de bande i matiòs. Va a vôre, va! Quant astu di fâ judizzi, benedet fi? –

E vie cun cheste solfe par dîs a dilunc. Ordan al sacodave il nâs e al sborfave par sot, ma nol rispuindeve. Dome al cjalave di sot-coz il vecjo. – Quant astu di fâ judizzi, ah? Quant...? – al businave chel.

Une dì Ordan al lassà che il vecjo al finìs di businâ e po’ si plantà denant di lui, al alzà lis mans (chês manonis ch’al pareve ch’a tocjassin il cîl!), e al zigà: - Il judizzi al è fat, pari, al è fat! Dome ch’al è ancjemò di disnizzâ! – Une pirlade, une gran bacanade e vie fûr. Doi minûz dopo al jere ta l’ostarie a «uadagnâsi» il prin quart de zornade.

Muart il pari, Ordan al scugnì praviòdisi ancje il mangjâ, e alore al è in Belgjo a gjavâ cjarbon in tes minieris. Quanche si scugne, si scugne, veh!

Un pâr di ains dopo al tornà in paîs (dome vôi e nâs sgargarôs plui di prime), involuzzât in tune mantiline robade di sigûr a un spavente-pàssaris. Quant ch’al cjaminave, al sborfave simpri par sot, e il quart al cirive di scrocâlu e no di «uadagnâlu». Bacanâ, nol bacanave plui, e nancje moto di ridi nol faseve, di mût che ur vignive a duc’ di puarinâlu.

- Puar Ordan - a’ disevin e, se mai a’ podevin, un taj o un quart j al pajavin vulintîr.

Une sere lu fermà il plevan. – E alore Ordan? - j disè.

- Ben... ben... - al rispuindè Ordan.

- Astu fate furtune, po? -

- Bastanze, bastanze! Ma ce vuèlial: la vite ’e je cjare par dut, e miez uadagn ’o ai scugnût mangjâlu... -

E il plevan: - E chel altri miez? -

- Bèvilu, bèvilu veh, siôr plevan! -

E Ordan, cheste volte, al dè une grande bacanade e si disfantà tal scûr.

Il bevi, di sigûr, dome il bevi j a robât al cino un artist.