- Guido, tu varessis di fâmi une poesìe pai 50 agns di matrimoni.

- Guido, ce vino di fâ par cjapâ un franc par chei puars fruz de Bosnie?

- Guido, puedistu puartâ i panei ch'i vin di fâ le mostre fotografiche?

La sô rispueste: - Si, par cuant?

Il so telefon... simpri in bore. Cumò nol pò rispuindi, al è in tun âtri puest, ma ' i pensi che ancje lassù al judi cualchidun!

Guido Brini al 'ere nassût in Adorgnan di Tresesin. Al veve scomenzât a studiâ par deventâ mestri, ma dopo la malatìe dal pari al veve scugnût bandonâ i studis par lavorâ e mantignî la famee. Dopo vê provade la vite dal emigrant, al è vignût a stâ a Buje cu la sô femine e so fí.

I plaseve lavorâ, balâ, lei e scrivi par furlan, ma soredut fâ alc par Buje. Forsit lui si sintive un bujês plui di chei ch'e son nassûz culì parceche nol diseve - I soi di San Scjefin, di Madone o di San Florean - ma - 'i soi di Buje - e par cheste idee al à lotât fin ae fin.

Al à dit, al à scrit, al à urlât, cualchi volte al à "urtât" cualchidun, ma nome parceche al veve voe che chei di Buje si sintissin duc' dal stes paîs.

Cuant che al veve un moment, al scriveve contis e poesiis par chei che j es domandavin, e no 'erin pôs, ma chês pui veres, al diseve lui, e jerin lis poesiis vignudis dal cûr.

Tal ospedâl un miedi j à dite: - Guido, ti an puartâdis lis rosis! Cemût a un omp?

E Guido j rispuindè: - A un poete si pò.

Si, Guido al veve la fuarce di un leon e l'anime di un poete.

Pecjât che nus à lassâz masse adore. Par furtune 'e son restâz i soi scriz, lis sôs poesiis, lis sôs ideis, la sô voe di fâ alc pe int e pal nestri paîs.