Il romanz di Carlo Sgorlon "Prime di sere" edit de Societât Filologjche Furlane, al è stât puartât in video grazie al impegn di Lauro Pittini vincint la tierce edizion, sezion lungometraggi, de mostre dal cine furlan curade dal Centro Espressioni Cinematografiche di Udin. No gnûf a chest tipo di espression artistiche, Lauro Pittini, 'zovin glamonàs dal borg di Plovie vincidôr ancje te passade mostre cu la sô opare" 'O vares volût vivi", al à dât prove di movisi cun grande sensibilitât cjapant il consens dal public e de gjurie.

Lis motivazions di fonde ch'e an sburtât a frontâ chest lavôr, che tra l'altri al à domandât l'impegn de Compagnie dal Teatro Sperimentâl di Vile di Buje, di chê di Colugne e di altris 20 personis par drche 23 zornadis o miôr di domeniis, a' son soredut chês de ricercje de identitât furlane ancje cul strument dal audiovisîf.

Par tant no jè stade par une volontât edonistiche o di un torne cont economic, stant che lis spesis tecnichis a' son stadis sustignudis di sachete e che dut il lavôr al è stât fat doprant i momenz dal timp libar, ma par une voe di comunicâ e stimulâ une culture che dut câs 'e jè ancjemò vive e sensibil a gnovis espressions. Il romanz si prestave a chest e cun di plui, jessint une vore cognossût, al facilitave il contat cul spetadôr.

Di cert lis fadiis, tal cjatâ i puesc' plui adaz, spietâ lis zornadis justis, meti dongje tante int e soredut meti adun il dut 'e son stadis veramentri grandis. Un prin pas al è stât fat, la presentazion dal video fate a Buje e ae mostre di Udin, 'e à cjatât il consens gjenerâl, cumò nol reste che rivâ a pandilu a tôr pal Friûl e scoltâ lis rispuestis par cjapâ l'ispirazion par un altri lavôr. "PRIME DI SERE" de bande dai atôrs.

Se il teatri al è magic 'zuc de finzion, il cine al è... la finzion dal 'zuc. Plui par scomesse che par vocazion, la Compagnie dal Teatro Sperimentâl di Vile di Buje, si è cjatade a recitâ denant di un public platât forsit dentri di une machine di riprese. "Ten il tono plui bas... Gjave l'enfasi... Sei plui naturâl che no sin in teatro... "nus diseve il regjst, ma par noaltris, teatranz dal dopo cene abituâz a fâsi sintî a|pît de sale, al jere un ce fâ mostro.

Cun di plui no rivavin a capî cemût ch'al podeve dâsi dongje chest "teatro" cuant che par in prin si saressin giradis lis ultimis scenis e po lis primis o piês ancjemò, cuant che par resons tecnichis si giravin prin dutis lis batudis di un atôr, po dutis lis rispuestis di chel altri. Domenie dopo domenie però il 'zuc al scomenzave a coinvolgi e un pôc a la volte, man man ch'e cressevin lis scenis fatis, si scomenzave a vê la dimension dal lavôr.

Cumò a cjalâsi sul schermo dut al semee facil, naturâl, par cerz aspiez scontât, ma par rivâ a chest, Lauro, il regjst, al à scugnût passâ plui di un mês a cjalâsi cirche 8 oris di regjstrazion, a sielgi e componi lis scenis toc par toc, batude par batude, metint adun infin une storie ch'e dure pôc plui di un'ore e miege. Di fat chest lavôr, come dut il cine in gjenar, al ven fat in laboratori. Al è lì che, tacant tassel cun tassel, si met adun chest grant puzzle che si clame CINE.

E in laboratori si stravolz, se al covente, l'intensitât dal lavôr, creant il ritmo e se al covente, gambiant ancje la vôs. "Ce brâf chel atôr!" Nus ven di ridi a pensâ a ce tantis voltis che si è ripetude chê batude o a tropis voltis ch'e jè stade netade la cjandele dal motocaro prin ch'al less in moto a colp sigûr e dut chest tal cine no si viôt nè si capis.

Magje de finzion dal 'zuc! A lavôr finît, la sodisfazion 'e jè grande soredut pal fat che la storie di Liseo 'a jentre tal anim dal spetadôr, lu tocje di dongje, lu ripuarte indaûr a timps lontans ma no dismenteâz. Timps indulà che par une taule di formiche si dave vie chê di nojâr ch'e saveve di miserie. "PRIME DI SERE" de bande di un spetadôr.

Il libri lu vevi let agns indaûr, e mi ere restât il ricuart di un Liseo che al scombateve la sô integrazion sociâl come un segno dal destin, intune atmosfere "bucoliche" di un timp passât. La riduzion in video 'e jè stade une biele sorprese par plui mutîfs. Par prin mi soi cjatât denant di une lavorazion che come costruzion, ritmo, tecniche di riprese e sielte dai personaz no à nuje di invidiâ chê professionâl.

In secont la figure di Liseo come ch'e jè stade costruide no presente un omp remissîf e rassegnât come che mal visavi, ma une vore determinât e par cerz aspiez gnûf, moderni. No mi vergogni a dîlu che in cerz mamenz la storie mi veve cjapât parceche mi fdentificavi in Liseo; no tant in tes sôs tribulazions, cuant in chel caratar orgogliôs e determinât.

Liseo al vîf la sô storie cu la consapevolece de responsabilitât che ognidun al à tal so jessi, tal rispiet dal prossim e de armonie de nature. Une figure "gnove" pe culture furlane che forsit sgjarfant la cjatìn ancjemò dentri di nô.