Ancje Ursinins Pizzul, une volte, al veve il so cjaliâr: Elio Tessaro (Bolzon). Nassût a Buje dal 1919 il 21 di novembar, a vot agn al tacà a imparâ il mistîr di cjaliâr in cjase di so barbe Pio. La sô voe di imparâ 'e jere tante! Mons. Chitussi, però, viodint la sô passion pe musiche, lu mandà a studiâ a Udin.

Di dì al lavorave sul desc e di sere al studiave par sunâ l'organo. A quindis agn, pe prime volte, al compagnà la messe sunant l'organo dal domo di S. Scjefin. Quant ch'al mûr so barbe Pio, al lè in cjase di Lino di Sante a Urbignà par finî di scuviergi i segrez dal mistîr ch'al varès fat par dute la sô vite.

A vinc' agn al partì in vuere. Al à dât sîs agn par fâ l'Albanie, la Grecie e la ritirade de Russie a pît. Il vot di setembar dal 1945, a Udin, al ven fat prisonîr dai mucs. Par scjampâ, dal treno in corse diret in Gjermanie, al à petât un salt e cussì al à schivât il campo di concentrament. In chê sere, par platâsi, al à passât la gnot tal fen di un toglât. La pore 'e jere tante che no lu lassave durmî.

Al viodeve mucs di vuardie par ogni cjanton! Tal doman, cul jevâ dal soreli, lis olmis a' sparìrin e al tornà a cjase. Dopo agn di vuere, íl mont si dave una cuietade; ma le miserie 'e obleà Elio a lâ pal mont (Svuissare) a regolâ lis scarpis dai stranîrs. I furlans in chei agn no vevin i bêz ne par comprâlis ne par regolâlis! Quant ch'al tornà dal forest, tal sac al puartà dongje un gnûf imprest pai cjaliârs di Buje: il pît di fiêr.

Chest imprest al sostituive, e al sostituis inmò vuè, il tirepît che une volte si leave tra pît e genoli par fermâ la scarpe di regolâ. Quant che Elio al è jentrât in te viere cantorie di S. Scjefin par fâ l'organist, in pôc timp al rivà a rinfuarcîle sedi in te qualitât de esecuzion sedi in tal numar dai corisc'! Lui al clamave duc' e duc' al judave ancje se no savevin musiche. Inmò vuè, i vecjos cjantôrs si impènsin cun nostalgje lis laudis vudis quant che in te domenie dal 9 di febrâr dal 1964 a' son laz tal domo di Udin par cjantâ la messe "S. Giustina" a quatri vôs disparis.

Elio al sunave l'organo e Don Gigi della Longa, ex capelan di Buje, al dirigeve i 30 cjantôrs. Dal Boletin arcipretâl de plêf di Buje dal stes an si lei: "Ottima ed assai apprezzata l'esecuzione soprattutto per l'impostazione delle voci, la robustezza dei ripieni, la delicatezza dei piani e la sfumatura delle espressioni. Certamente una delle migliori esecuzioni dei cori diocesani... ". Intant ch'al sunave Elio al jere dut un smanez! Al deve il timp cul cjâf e al rivave a rimediâ ai sbalios dai cantôrs cambiant il timp des canzons.

Cun tante paziense al trasmeteve a duc' la sô voe di fâ miôr. "Inmò un colput fruz... " e cussì lis provis si slungjavin di miezore. In tune stagjon la cantorie di S. Scjefin 'e rivave, cul so aiût, a meti su quatri messis! Quant che a Buje tal 1966 al ven fondât il "Coro", lui al colaborare ancje in chê associazion par dâ une man a meorâ simpri. La vite di Elio, fin tai ultins agn, si è dividude tra la famèe, il lavôr e la musiche. In dutis chestis robis al à dât alc di gnûf e sclet. Par chest no podìn dismenteâlu.