Le prime volte che lu ai vidût al è stât su le bicicletute che al faseve il zîr de cjase di so nono Remo. Piçul e tont, cun doi voi furbos che a lusivin. Al sielzeve di fâ simpri il zîr de bande indulà che, par rivâ, al cjatave la rive sù - no cuisà ce ripide, ma da rive su - no di chê altre bande, indulà che al varès podût lâ plui di corse, sbrissâ jù cence scugnî fâ fadie. Di picinin. Provâ a scometi di rivâ, cun grinte e cun gust. Content.

Cjapâ les robes dal viers just. Da "so" viers. Come che lui al voleve e al scometeve, cun sé, prime di dut.

El sfuarç, le fadie tant che une robe 'normâl' par rivâ, che po ancje si divertissisi.

Ducj e savevin - e lui par prim - che al varès scugnût frontâ une rive su par stradeles e par trois plens di claps, di sdrups. A fîl di crets che e puedin tradîti di un moment a di chel altri.

Ma in chei moments al veve simpri cualchidun che lu rezeve pe siele par daûr, come che si fâs cui frutins co e molin les dôs rovedutes dal treciclo.

E nol jere dibessôl. Nol podeve vê pôre: e jerin les mans di so pari, di so mari, di so fradi, di Chiara a tignîlu in dret, ancje cuant che la rive e tornave a dreçâsi a colp, dopo di une splanade.

E dilunc le strade i soi amîs, la int cidine, ma vicine. E se o sin in Glesie no si puès fâ di mancul di pensâ par un moment ae dimension dal Sacri, ae Sacralitât dal Dolôr, che cuant che si stave cun lui al veve dute dute le sô fuarce.

Come jentrâ intun Templi. Là che tu sintis su le piel le fuarce dal Misteri.

E o viodìn dutes les figures de Vie Crucis: le int di famee, i samaritans che e cirin di gjavâi il pês, les femines dilunc le strade, le int.

Cence nissune pratese di rispuindi ae domande "parcè?". E, tornant tra di nô, ce nus vegnial se no il rispiet par ognidun che si cjate pastrade, che no si sa ce che al à vivût, ce che al à provât, ce che al à dolorât.

Ce nus vegnial se no i valôrs grancj de Famee, di une famee come chê indulà che Johnatan al à vivût.

Valôrs che fossino di ducj. Ce nus vegnial senò pensâ che i fruts, i fîs, cuant che e rivin, nol baste che e sedin. Tocje ancje savê tirâju sù. Come che Diu comande.

Par che e sepin savê sei contents, vê grinte, vivi il ben e rivâ a dâlu a di chei altris, come Johnatan.

Cheste vicende e je stade segnade dal Misteri dal Amôr.

Amôr filiâl: di fí a pari, a mari.

Amôr paterni e materni: di mari e pari al fî.

Amôr frateni: di fradi a fradi

Amôr di morôs a morose e di Chiara viers Johnatan.

Amôr parentâl.

Amôr amicâl.

Spieli di un altri Amôr, di un Ben che no nus lasse dibessoi.

Dit in glesie. a Madone di Buje il 25 di otubar dal 2006, a la fin de messe pal nestri Johnatan.