In chest numar di “Buje Pore Nuje!” si sintìn in dovè di ricuardâ un amì ch’al à dât tant de sô esperience e de sô disponibilitât: ai Alpins sô seconde famee, a cheste publicazion e a chei che lu an cognossût.

Olinto Gallina, de famee dai Carìes di Sacuèl, nus à lassâz ai vot di dicenbar passât.  Al veve otant’agns.

Le sô memorie e sarà simpri ricuardade di ducj chei che e an vude le furtune di cognossilu, di scoltâlu, di preseâ le sô capacitât, fûr dal ordenari, di ricuardâ fats, dates, nons, persones e di fâju tornâ a vivi in tun mût di contâ apassionant, plen di particolârs, di umorisim, di sintiments, ma simpri cun tant rispiet.

Le sô colaborazion e jè stade determinant in tancj lavôrs: le storie dai Gallina a Buje, le ricercje sule emigrazion dai bujês in Venezuela, ricuarts di vuere, testemoneances sule nestre int e sul nestri paîs.

Olinto al à vût el grant merit di ingolosînus sui fats dal passât e di sburtânus a cirî e meti in lûs les nestres lidrîs e les vicendes des persones protagonistes, o vitimes, de storie e fâ in maniere che no vadin dismenteades.

El miôr mût di ricuardâlu nus è semeât chel di publicâ doi fats che nus contave dispes; i nons e son stât gambiâts ma i aveniments e son vêrs.

Mandi Olinto e grazie di dut.