Une volte si podeve lêi su la Riviste Diocesane tanc’ biêi tocs sui predis, che il Signôr, finide la lôr mission, al clamave tai soi splendôrs celesc’. Al ere il disen biogràfic, il ristret de lôr vite, cuinčât di informazion e di sintiment. Al ere il “mandi” de Diocesi ai soi pastôrs.

Mons. Gjelmo Biasutti al ere un mestri tal fâju. Cumò al è dut plui burocratic, sintetic, ’o disarès formâl. Quatri datis, i passaz di une glesie a chê âtre, di un paîs a chel âtri, une onorificenze eclesiâl o statâl, s’e jé, e buine gnot cul funerâl. Al é compagn il profîl di Pre Oreste.

Ben par lui che une rie ’e dîs: «Fu compositore. Le sue musiche fanno parte del repertorio liturgico e non di questa terra friulana». Se ’o lin a viodi il dizionari di Žuan Nazzi, chel dai omps ch’e àn lustrât il Friûl, lu cjatìn ricuardât ancjemò di vîf cu l’indicazion di qualchi so lavôr.

Une vore indicatîf al é il libri “Svuâi” (Voli) ch’al é stât publicât tal 1990 de Associazion dai Amîs dal Malignani cun articui di Elena Scuricini Toso, che ’e à curade la publicazion cun Luigi Maranzana, di Ernetti, Cantarutti, di Mario Macchi, ch’al à tratât dal so implant compositîf. Si viôt di chest volum ce tant ch’al à scrit Pre Oreste, se ben che tante robe ’e jé restade fûr e robe no di pôc. Al é compit dai studiôs furlans e no chel di tirâ dongje la sô largje e infinide produzion. La durade de sô vite ’e va dal 1911 al 2001, un timp che j à permetût di creâ, di insegnâ, di diregi coros di ogni fate, granc’ e pičui, cantorìis di glesie, cjaps di fruz. Al inventave e al proponeve l’inventât. Si mantignive tal agâr furlan in maniere di fânus sintî cjanz e vilotis e oratoris come robe ch’e fos našsude dal nestri cûr e capide di simpri. In Oreste Rosso al ere dut un popul ch’al cjapave ancjemò svuel. Jo lu ài cognošsut prime pe sô musiche e dopo di persone. ’O sin deventâz amîs e colaboratôrs in tun grum di iniziativis: sagre dal cjant cristian furlan, sagre de gnove vilote, canzions (o cjančons) dal Gri d’àur, Festival del canto mariano, composizions pe Scuele Libare Furlane. Il timp plui ferbint de nestre colaborazion e va dal 1960 al 1975. Adùn cun Siro Cisilino ’o vin fat cognošsi Mainerio al Friûl. Qualchi volte ’o lavi ancje jo a Vignesie a la Fondazion Cini te Isule di San Žorč. Mi visi ch’o vin girât mieč Friûl a regjstrâ lis lezions de Setemane Sante e dai Madins di Nadâl, letis cun intonazion o cjantadis di vecjos muinis e cantôrs par rigjavâ i mutîfs che nus documentavin Aquilee e i secui passâz. No vuei sprolungjâmi a numerâ lis sôs composizions. Dal rest cui no cognòšsial “Aquilee” su lis peraulis di Rico Fruch e “Suspîr da l’anime”? La sô linie melodiche monde e nete ’e sa di risultive e ti jentre daurman. La struture corâl si insede in tune esperienze vive di vôs e di persones parceche ’e jé simpri esistude une intese tra lui e la int ch’e veve di cjantâ chel che lui al componeve. Se tai prins timps e a dilunc al à favuride la melodie, cence trascurâ la coralitât, tai ultins timps j plaseve di plui žujâ cu lis vôs secondariis di compagnament, squasi un trapont e un cuintripont.

Sul plan de umanitât al veve un cûr veramentri grant e compernsîf, leât al contat pastorâl cul popul dal Signôr e madrešsût ancjemò miôr devant dai disfortunâz e dai clienz des presons, ch’e àn bisugne di redenzion e di rinašsince morâl. Une volte liberâz, tanc’ di lôr ’e vignìvin a cjatâlu e ringraziâlu. Al saveve dî qualchi batude cun finece di spirt e une vene di ironie, però buine, mai triste. Si è lašsât te sô cjalde Fede traspuartâ in qualchi svuel mìstic, che j à causât patiment e cjàcaris, sopuartadis cun serenitât cristiane. A Buje al à vût il Premi Nadâl Furlan tal 1987.

Il Stât talian lu à fat Cavalîr al Merit de Republiche. Jo ’o pensi che il premi plui grant e plui naturâl jal vei dât il Signôr a principi di un gnûf secul e di un gnûf milenari. E il Friûl, e no nome chel, al à di ricognošsi che lu à fat plui siôr e ric di anime, di culture, di Spirt. Il so cjant e il so esempli ’e lùsin tal scûr e nus insegnin il troi de vite. ’O sai ch’o ài pierdût un fradi e un amì, ma ’o sai ancje che ’o tornarai a cjatâlu. E a chest pont ’o vuei impensâmi ancje di sô sûr Gemma (Gjeme) ch’e jé stade il so agnul di simpri e lu à sustignût te sô mission di omp, di predi, di artist, di Furlan, di vêr cristian. Podessial il Cîl dânus ancjemò personis di cheste fate! Se nol é pratindi masse.