Glamone, come nuvice, ’e à gust di fâsi sustignî il vêl dal so vistît e, par chel cont, a mont di Ospedalét a bas Surnì ’e son perecjâz ma, come fruz, si ’uelin fâ dispiéz.

In face dal Cjampòn e dal Quarnan un pôc plui innà de strade, Buje, come une amante, ’e cjale par robâ.

Si cjàtin ta chel sît, che miei non d’è, un miedi di Surnì e un predi di Ospedâl che, in vie di meretòri, ur ûl tant di cjapiel.

Vidon al fo tâl miedi e Urban il monsignôr.

La storie si slontane ma no si sfante tal pinsîr.

Urbani al rive di Cuâr di Rosaces dal cinquante; Vidon al è zà l’ì: une autoritât!

Sindic, ’o dîs il non che mi pâr plui just e no vorès sbaliâmi, Ricardo dal trop di Cjocjo.

Zornadis subìt dopo la ’uere: miedi, predi, sindic e, po’, la gubie; cussì la societât uficiâl (chel che al à simpri disponût e duc’ lu sa ’e ’erin capucaz e capoborc).

Ta l’ostarie di siôr Ricardo (Cavalèt) nissun ’entrave prime di vê fate la nae, feminis nancje pensâsi, e dopogustât il "Scarabòc’", zuc di cjartis che si use ancjemò, al impegnave la Borghesie e, jenfri chê, ancje Vidon.

Urban, intant, a polsâ ta l’ombrene de canoniche: grande e frescje.

Di momenz libars chei culì, pal rest, dì e gnot a di ogni ore, tu podevis lâ: ’e ’erin simpri pronz.

Il miedi e il predi, ancje se par un vêl di diferenze, si cjatarin te int, dulà che la int ’e ’ere: alore par cjamps, pa’ strade, in glesie, par ospedâi; jo lu dîs parceche, dal cinquantevot, mi è sossedût di fâ sperienze cun duc’ i doi.

Fin quant che ognun pe sô strade al faseve il so fat, e ben, dut al è stât come la bore dal fuc: si cussume e, intant, ’e scjalde e ’e fâs lusôr; al vignì il moment dai fucs artificiâi!

Il simitieri, puest di pâs che plui di cussì tocje dome provâ a inmaginâsi, al deventà scuintri di ideis e luc di divisions.

Vidon, par sanitât, al ’oleve gambiâlu di sît, Urban, par afiez e custumance, nancje discori.

Paîs miec par bande: ’uere di religjon.

Conseis cumunaj cjalz, pulitiche ancje tal ort, chel ch’al capive di mancul al sburtave la sô ignorance fin ch’al cjatave resòn: tra miedi e predi no scufiòz ma ristogratic no cirîsi.

Mi impensi che, a predicje, a messe grande, no si cuminavin plui tanc’ afârs di prin: l’atenzion la veve il discors sul simitieri e il so restâ lì o gambiâ luc.

No ai vût ocasion di cjatâmi ni a Surnì ni a Ospedâl ma, amîs mi an dit di discussions pal argoment ancje tes lôr ostariis.

Come ogni robe lis dôs ideis ’e forin buinis, bastave spietâ un pôc ancjemò e dut si sarès capît e ’ustât, ma la pulitiche no à lassât fâ cussì e Vidon e Urban, granc’ di Buje ognun par merit diferent, ’e son lâz lassant un fregul di mâr in bocje soredut a chei ch’e an vût bisugne de lôr buine man, de lôr buine peraule, dal lôr cunfuart.

Chest vê lassât displasé, però, ju fâs ancjemò plui Granc’.