Buje tal doimil (e un): 

25 ains dopo.

FOTO 1

A 25 ains dal taramot, Buje e jè cambiade completamentri, ancje te sô int.

Ducj ormai i sin daûr a vivi la nestre zornade in maniere intense e nevrotiche come che il mont al finis doman, cence requie, come tes grandes sitâts.

Quand ch’e ven sere, si sierìn dentri de nestre cjase e si metìn denant de television cence nissune pussibilitât di dialogo cun nissun. I vin pierdût le voe di stâ insieme, di socializâ, come che prin dal taramot si faseve tai curtii, quand che nissun al serave a clâf le puarte di cjase.

Le “ricostruzion” e à tignût cont des necessitâts modernes plui che riproponi les tipologjes costrutives di prin e ancje chest nus à judât a gambiâ.

Ancje l’ostarie le vivìn in maniere diferent; ormai quasi no si zuje pui di cjartes e ancje il “bevi un tai” nol à pui il stes significât di une volte.

Insome, lis cjasis e son tornadis a fâ, l’economie e tire e il lavôr nol mancje, ma ormai il vivi nol è plui chel e lis gnovis gjenerazions e stan quasi pierdint la memorie storiche di ce ch’al è sucedût e di cemût che i erin, ormai i sin intun moment storic e culturâl dulà che si pense pui ae “Qualitât de vite”.

Il nestri impegno aministratîf di chescj siet ains  al è stât dedicât soredut a dâ a Buje chês infrastruturis che nus fasessin cressi sot chest profîl par miorâ il nestri vivi quotidian.

Alore i vin slargjât il CENTRI SPORTÎF par dâ une rispueste ae cressude pratiche dal sport, i vin realizade la gnove BIBLIOTECHE e recuperade la CJASE DE ZOVENTÛT par che si puedi fâ pui culture, il gnûf MUSEO CITADIN e il recupar ambientâl di MONT, dal Cjscjelat aes muraes e di dut ce che chest al à rapresentât pe storie dal nestri paîs e le nassite dal MUSEO DE ART DE MEDAE par ricuardâ i nestris mestris incisôrs e la lôr art ch’e à fat cognossi Buje tal mont.

Il gnûf ASILO che i sin daûr a fâ dongje des Scueles Medies al sarà pront fra qualchi mês; al è un prin pas viers chel "POLO SCUELASTIC" che al è simpri stât un dai grancj siumps de nestre aministrazion.

La particolâr conformazion de struture urbane dai nestris borcs, ormai ruvinade dal taramot e de ricostruzion, e veve bisugne di un PARC par meti adun lis zonis verdis dal nestri teritori e che al fos une testemoneance des tradizions dal passât.

Si son cjatâts cuatri puescj che pes lôr diferentes carateristiches, e rapresentin le idee di particolaritât dai lucs che ere tipiche dai borcs: San Scjefin come aree atrezade al servizi de comunitât, Mont come parc de memorie, il cuel dai Pravìs come parc botanic e lis rivis de Ledre come parc des aghis.

I sin daûr a fa il Parc Urban a San Scjefin, in te zone daûr de caserme dai Carbenîrs; cheste iniziative e met adun elements significatîfs de nestre memorie storiche come il lavadôr, le braide cu le vigne, el riul Curgnûl, un lagùt artificiâl pe racolte des aghis di risultive in te zone dal palaç di veri.

Il Parc al è sistemât tal centri dal paîs e al met in colegament il Centri Storic e il Lavadôr cu la Biblioteche e la Place dal Marcjât e la frazion di Sacastoe e San Bortul.

Il progjet al proviôt une superficie di pui di 20.000 mq, ma intant si sta lavorant sui 11.000 mq che fin a uè i vin comprât. Il cost proviodût pe opare al è di 350 milions.

Cheste iniziative e vûl jessi une grande oportunitât di socializazion par ducj, fasint une spassegjade pai trois o stant sentâts a tabajâ sun tune bancje, ta l’ombrene, intant che i fruts e zuin tal prât.

Une gnove iniziative che si fasarà grazie al particolâr interessament dal aministradôr regjonâl bujês Paolo Ciani, che si è ativât par fânus rivâ un finanziament cence il quâl no varessin podût fa nuje, e partirà tal cors da l’an: UNE PISTE CICLABIL. Cheste iniziative nus permetarà di meti adun une piste nome pes bicicletes che di Tombe e rivarà fin tal Centri Sportîf des Polvaries passant pe zone de Scuele Medie e pe Place dal Marcjât di San Scjefin.

I podarìn cussì doprà la biciclete sun tune piste riservade, cence pericui par nô e pai fruts che podaràn lâ ancje a scuele in biciclete.

Chest progjet al ere stât svilupât intant che i erin daûr a fâ il Plan dal Trafic, plan ch’al coventave par verificâ il flus dal trafic su lis nestris stradis e par studiâ la situazion dai parchegjos des nestris frazions.

I vin pensât alore che se i volevin puartâ i nestris paesans fûr di cjase, a riscuviergi Buje, e se i volevin incentivâ chel “TURISMO FUORI PORTA” che al puarte ducj  chei che vivin in sitât a saltâ fûr di là il fin setemane par gjoldi la nature e lis bielecis des nestris culinis, bisugnave fâ des iniziativis ch’e tirassin cheste int des nestris bandis. Cheste e jè le idee che i vin svilupade tal progjet e che cumò i podarìn realizâ.

In chescj siet ains i vin corût par recuperâ il timp pierdût e par dâ sodisfazion aes necessitâts dai bujês, parceche Buje e à corût e a côr ancjemò.