Int di Buie. Int di Buie pal mont. Cualchi volte si domandisi ancjemò ce che al à di jessi stât in chest paîs che le sô int 'e rivave a cjatâ le strade juste par che i motos da l'animo 'e rivassin a cjapâ formes concretes ch'e lavin a custruî dut un patrimoni di culture materiâl popolâr (dai caratei ai imprescj di vore, des detules aes recipes de midisine), o dute une schirie di manifestazions artistiches (de piture ae sculture de poesie al romanz de medae ae architeture).

In dì di vuè cence altri les comoditâts no stìcin plui el ingén, ancje se a Buje 'i podin interpretâ come une sô precise caraterizzazion chê forme di produzion ch'e jè el artigjanât. Le "genialitât dai bujàz" 'e meretaress un biel studi ben pastanât, un discors di un sociolic di mistîr, cui imprescj de ricercje, che fin cumò si son viodûts i efiéts, si à viodût indulà che cheste dote 'e à puartât, ma no si à analizât el parcé, el parcéculì cun cheste ca raterizazion. Int di Buie atôr pal mont 'e à rivât ancje a fâ vivi cheste "genialitât" e 'i sin sigûrs di fâ tuart a duc; chei altris se 'i nomenin dome une citât e dôs persones, Buenos Aires, l'ingegnîr Meni Susìn e el scultôr Troiano Troiani.

Chest an 'i vin vude le ocasion di cognossi un bujàt che al fâs fevelâ di sè vie pal mont pes sôs invenzions eletroniches tant di meretâ le copertine di rivistes specializades intal setôr de sigurece, dai sistemes di alarme unevore sofisticâts. Un che al à fat furtune, si disarés par contâle In curte, soredut cul "jessi juscj: un al po fâ el furbo e vuadagnâ aldopli - nus à dite - ma nol pò fâlu par dute le vite; e jè chê detule: "tu puedis metile tal pano a cualchidun dute le vite, tu puedis metile tal pano a ducj une volte o dôs, no tu puedis metile tal pano a ducj dute le vite".

Di Gianni Comoretto (classe 1947), de famee di Çùs di Cjamp (so pari al è Romano, 1912 e so mari Vally Cozzutti dal Bués, 1914) ducj 'e fevelin come di un geniâl inventôr, di un che an di cjate simpri une gnove lavorant cu le eletroniche intune part dal mont che - pes situazions socials e politiches - 'e jè ae avanguardie in tal setôr de "security".

Les idées i nassin cun facilitât, al rive adore a passâ de fase de ideazion al prototip e dopo ae produzion (ancje se nol è simpri dut cussì lineâr intun mont dulâ che il marketing al puess condizionâ le presince o mancul sul marcjât). Nassût co so pari dasseâr al jere des bandes di Trevîs, al à simpri vude dentri di sè une smanie mostre di cjalâ dilâ dal mûr dal so ort, indulâ che i cjamps 'e jerin plui grancj e il prât al jere plui vert, par cirî di capî cemût che si viveve fûr dal paîs, fûr de provincie.

Tai agns de sô zoventût plui creide si respirave un ajar particolâr, l'ajar che emblematicamentri al varés dât vite ai Hippy, ai Beatles, al rock, a chei figli-dei-fiori che in Woodstok si saressin cjatâts a cjaselôr. Movisi in autostop al jere "normâl", lâ cu le ghitare fin a Milan tôr dai cuìndis, sedis agns, lâ a Parigj dopo seisi diplomât a Padue all'Istitût Marconi perît in eletrotecniche (che le eletroniche inmò no jere lì), tornâ pal san scugnî de nae, lâ a Londre cu le scuse di perfezionâ chel inglês masse scuelastic che no i varess permetût di cjatâ un puest di vore dulâ che al veve fate domande.

Sì, parceche le sô professore di letares, dopo dal diplome, lu veve cjatât e 'i veve dite che al jere lavôr in Sud Afriche propit par int dal so ingén. Ma tocjave savê el inglês come che si devi. Londre in dì di ué 'e manten une carateristiche dute sô tai confronts dai 'zovins e a cui ch'al va ancje par pôc 'i reste chê di tornâ e cui che si ferme par cualchi mês al vîf le nostalgje dal aiar che alì si respire.

Si po' dome inmagjnâ ce ch'e jere e ce ch'e jè stade pai 'zovins dal '68: une citât ch'e produseve musiche, costumps, mûts di viodi e di vivi, ch'e rompeve i tabùs ch'e invoave a esperiences che culì si les insumiavisi, ch'e rompeve cui schemas di une societât piçule e bigote; une citât là che tu sintivis ancje le protezion de legalitât, parceche le libertât 'e jere propite vere. Ancje a Londre si va in autostop cun cincuante mîl te sachete, ghitare in spale. Sunâ pes strades, spatussâsi-fûr cu l'inglês al istitût St. Giles in Oxford road, cjapâ chel ch'al covente par vivi fasint el barman tal cafè dal teatro plui cognossût de citât: Royal Albert Hall e ce ch'al covente par podê lâ a scoltâ in ta chel teatro Aretha Franklyn, Deep Purple, Goldon Lightfood, spetacui incredibii che si ju veve cjalâs cun gole dome su les cuviertines dai gjornai o scoltâts par radio.

Lì i prâts 'e jerin propit verts e pai cjamps si podeve lâ a pîts discolçs resentansi i pinsîrs. Dopo sis mês si torne a Buje: un vignarûli. Lavôr tune fabricute di calcolatrices e dopo un'altre volte cinquantemîl te sachete, vinc' chilos di valîs, ghitare, avion: Sud Afriche. Mai dal 1970. "Stop cui Rolling Stonés, Stop cui Beatles. Stop" 'e vares dite ben une cjanzon.

Stop sul serio. Comoretto al plombe tune societât cun regulis di Diu-nus-vuardi: altri che mûrs e prâts plui verts! A Joannesburg l'aparthaid no jè une peraule, 'e jè une realtât e tocje imparâ a cognossi gnoves regules che savòltin dut ce che si à respirât fintremai in chel moment: regules di filiades, les regules dal blanc e dal neri, dal neri e dal blanc (ch'e còntin par ledrôs), dal neri cul neri, dal boero, dal metiz, dal indian.

Nol è facil cuant che i ideai che tu âs dentri di te e che tu tu às simpri sburtât chei altris a crodigj 'e son niules che si pòin dome a fâ ombrene sui biâz neris copâts tai stragjos. Alore tu ciris di capî les diviersitâts, tu imparis a cjaminâ in cjamps cence jerbe, in tes poces cirint di no paltanâti. 'E varan di passâ vincj agns par rivâ a interpretâ certes cultures, ad esempli chees dai Boeros ch'e an un Diu par cont lôr o par viodi che tantes robes 'e vignivin costruides a pueste par fâ cressi tensions, che le contavin dome di une bande. Le idée 'e jere chê di fâ sis mês, vuadagnâsi il viaç e po tornâ. Ma al passe un an e mieç prime di viodi el Cjampòn.

E dopo tocjave mostrâ che le decision cjapade 'e jere chê juste, il pinsîr al è dome un: i soi lât vie di cjase, ma jô cumô cu le mê esperience i rivi adore a cressi come persone, i rivi ai scopos che mi eri dât, a provâ a me stess che i soi indipendent, che mi soi creade la mê vite, che partît di nuje i rivi a mantignîmi, a creâ, a discuti: dut chest a vincjetrè agns al è tant, al è scuasit dut, une grande sodisfazion.

Ce ch'al sburte e al ten sù un emigrant al è provâ che le sô decision no jere sbagliade. Les oportunitâts vie pal mont 'e son compagnes par ducj ma dome el emigrant al à dentri di sè cheste voe di fâ, di fâ contents chei di cjase, che lu sburte a lâ indenant lavorant ancje el dopli di chei altris. Cussì Gianni andi à fate di strade. Le sô fabricute 'e à une cuarantine di operaios blancs e neris, chescj par di plui scielts sot de guide dal prin so dipendent: un zardinîr ch'e al saveve de vite dal Sud Afriche, des tribùs ch'e an une lôr lenghe, une lôr religjon e usances e cultures diferentes di tribù a tribù e che nol è cussi facil fâ une scuadre di operaios che no si intìndin fra di lôr.

Cumò al torne scuasit cuant ch'al vûl. Nol po fâ di mancul di tornâ, come ducj i emigrants. Ma el emigrant al sint su les spales i vôi de int di culì, che no simpri lu capiss te sô dibisugne di mostrâ indulà che al è rivàt, lavorant di un scûr a di chel altri, si sa, di mostrâ che al è rivât a fâsi e a fâ. Nol à chê di fâsi viodi cuant ch'al pae di bevi o cuant ch'al gire cuntune biele machigne: chei 'e son par lui i emblemas des sôs fadies e dal ben ch'al ûl ae sô int.

(de interviste a Gianni Comoretto, Glemone 16. 01. 1999)

Laura Nicoloso Pitzalis

"Unique" is a Word that journalists usually steer clear of, mainly because this is a hackneyed term and overused mainly by people in the public relations business. For once, however, Security Focus believes that this can be applied to a particular personality in the security industry, and that is Gianni Comoretto. In this article, Godfrey King, publisher/editor, explains why.

Lu presente cussì la cuviertine di "Security Focus", la riviste sientifiche che di sedis agns in cà 'e ven dade fûr in dute la region Sud Africane a varies categories di professioniscj e ch'e jè ricognossude come un pont di riferiment, une vôs influent in dut il cjamp de ministrazion de sigurece professionâl. Tal mês di Mai dal 1998 il diretôr dal gjornâl, Godfrey King, al à dedicât a Gianni Comoretto e ai vincj agns di fondazion de sô societât un lunc servizi fevelânt di lui come di un personagjo "unic" par chês carateristiches che vuê 'e fasin di lui une autoritât in te promozion de sigurece e de automazion industriâl dal Sub-Continent.

Eco chi un struc da l'articul voltât dal inglês. Scuasit ducj i prodots che Gianni Comoretto al vent, ju à inventâts lui di sane plante. Cjatades origjnâls, no doplons. Scuviertes pensades dal inizi ae fin e in grât di gambiâ la vite di ogni dì. Nol è nuje di seconde man, o miôr, di "secont cjâf' tra lis invenzion "firmades" MAMI, la societât che Gianni al à plantade in Sud Afriche tal 1978.

Nassude letteralmentri in cjase (il prin laboratôri al ven tirât fûr tal scantinât dal edifìci), le compagnie 'e jè une vore a l'avanguardie su ducj i fronts de sigurece industriâl. I prins dispositîfs di controi a distance o i gnûfs sistems di alarme cun tastiere di abilitazion e controi di acès, i sofisticats microprocessôrs doprâts in lunc e in larc (par controlâ la pulizie des piscines pluitost che par regolâ la viergidure dai portons automatics), 'e jessin a Johannesburg propit de societât di Gianni Comoretto. Un dai soi prins brevets al consist in tun speciâl dispositif doprât soredut tes minieres pal control des bataries.

L'imprest al è in grât di verificâ la cjarie de lûs sul casco dai minadôrs prime di calâsi jù. Gianni al è ancje l'inventôr dal "video-box" che al funzione un pôc come il "juke-box" e al permet di viodi cualchi inmagjne dal film prime di cjolilu. Al è l'ideatôr di circuits di control "circolârs" studiâts soredut pai cjasâi, par tignîsi di voli l'un cun chel altri.

II "telefono-spie", invezit, al è il prin strument di control che, doprant une tastiere di abilitazion e un sintetizatôr de vôs, al rive a visâ il paron in timp reâl di une robarie. Ma parcè inventâ? Al dîs Gianni:

"E jè simpri une grande sfide rivâ a fâ alc che nissun altri al à inmò pensât e nol è nuje diplui emozionant di viodi la tô idee che si trasforme intun prototip valid. Mi plâs sei cjapât dentrì in problems o situazions che si disaressin "cence soluzion" e la plui grande sodisfazion par me (e jè chê di judâ lis personis a meti in vore une idee ch'e an tal cjâf.

Ancje par chest o ai metude su MAMI (che di fat al stâ par "Manufacturing & Minor Inventions"). Parceche ancje piçules pensades 'e puedin deventâ grandes scuviertes".

Prime di dâ vite a la sò societât, Gianni al à madurât tantes esperiences lavorant un pôc par dut e cognossint divierses persones che lu àn judât a capî la realtât che al stave vivint. Rivât in Sud Afriche tal 1970, di fat, al scomence a vore par une compagnie ch'e costruis linês di fuarce.

Pôc dopo al cjate un impiego intal dipartiment di ricercje di un altre societât. "Cheste (e jè stade une biele esperience\ al dîs, "parceche o ai imparât che par fâ lis robis 'e jè simpri une strade pluijuste". Tal 1973/74 al lavore intal assemblagjo comerciâl di materiâl eletronic e podopo al jentre in tune societât che si ocupe des rilevazions dai incendis. "Cuant che mi inacuarzevi che ce che o stavi fasint no mi dave plui nissun stitnul, o cjatavi il coragjo di gamhiâ".

E cussì al è stât. Une vite di lavôr, di lambics e di tantes sodisfazions, duncje. Il balìn di inventâ alc di gnûf al è simpri tal so cjâf, ancje cuant che al somee che no i pensi. E cussì, se si domande a Gianni ce che al fâs tal timp libar al rispuint: "I lavori. Ancje cuant che 'o stoi guidant su la strade di cjase o lant a viodi cualchi client, o continui a lavorâ tal me cjâf. I pensi a une gnove invenzion e mi sint dut eletrizât! Ma cuant che 'o soi a cjase, mi plâs fâ di mangjâ. I soi bon di improvisâ une cene par dis di lôr in rnancul di un' ore! Cusine taliane, naturalrnentri!".

Giorgia Zamparo