Muses incragnosides de fadie e dal lavôr; voi furbos, braurôs e un estri navigât di "mestri dal mistîr" vuadagnât daspò stagjons di Gjermaniis e carioles di modons. Muses che a podaressin jessi chês di tancj fornasîrs, dispatussâts di fruts, come che la miserie e domandave, emigrâts tal forest e tornâts in Patrie cun chê mascare di durece o di baldance che la stagjon ur lassave intor. Si vierç cun cheste imagjine il libri Luoghi, architetture e imprenditori.

Fornaci a "fuoco continuo" in Friuli 1866-1920 editât de cjase editore udinese Il campo. Valentina Piccinno, la autore dal volum, e je une zovine architete furlane indotorade al Politecnic di Milan tal 1999 puartant une tesi dedicade ae architeture des fornâs furlanis e insiorade daspò di altris agns di meticulose ricercje che cjate spazi su chest volumon di passe cuatri cent pagjinis. Presentât l'an passât in diviers comuns furlans insiemit a une mostre itinerant, il libri al met adun, pe prime volte, une infinitât di dâts, imagjinis e documents su lis fornâs piçulis e grandis di dute la Provincie dal Friûl.

Disfueant il volum il prin pensîr dal letôr al va probabilmentri ae pazience e al grant lavôr di ricercje che a an coventât par meti dongje dutis chês fotografies e chês informazions sapulides in archivis publics e racueltis privadis; cirudes, forsit cu la lint di ingrandiment, in statistiches e censiments industriâi; tirades fûr di testaments e rindiconts di esposizions aziendâi, catalics di vendite, cronaches locai, fotografies e cartulines di chê ete.

Dut chest sfuarç di ricercje al à valût ben il risultât. Cussì nus somee intal disfueâ il libri e saltâ cun curiositât di un paîs a chel altri, di une fornâs de Basse a une dal Friûl culinâr scuvierzint ancje intrics e vicendis des fameis che a an creât chês aziendis, relazions e scambis che a voltis nancje i dissendents nojerin a cognossince. Dal volum daspò e saltefûr ancje une schirie di ritrats di personaçs furlans che a àn contribuît a pandi in Friûl modifichis e inovazions impuartantis.

Tra chestis, un brevet in particolâr al à dât un sburt fondamentâl ae produtivitât des fornâs: la tecnologjie dal fôr Hofmann "a fûc continuât", simpri piât. La velocitât di cuei no si podeve nancje mete dongje a chê des fornâs tradizionâls: se cun chestis i timps di spiete tra une cuete e chê altre a lavin dai cinc ai trente dîs, cul gnûf sisteme, puartât in Friûl di Carlo Chiozza e di Giuseppe Fabretti, no esistevin timps muarts. Insome: une vere "rivoluzion", sei a nivel de configurazion dai implants che de organizazion produtive che di chest moment (al è il 1866) e devente simpri plui eficiente, a vantaç ancje des jentradis. Buie e fo tra lis primis realtâts furlanis a meti in vore il gnûf sisteme di cuei i modons. Un for industriâl a fuc continuât di Pietro, Giuseppe e Mattia Calligaro e Pietro e Angelo Nicoloso al fo progjetât intal 1876.

Cheste fornâs a sisteme Hamilt (pôc difarent dal sisteme Hofmann, ma no dal dut compagn) e jere cognossude in dute la provincie sei pe sô modernitât che pe cualitât dai siei cuets. E no va smenteade la braure dai siei fornasîrs che achi a deventavin bulos e tal forest a deventavin mestris. La emigrazion dai oms di Buie, di fat e rapresentave une emigrazion une vore specializade parcè che i siei fornasîrs ajerin domandâts in dut il mont. Cualchidun di lôr al deventâ brâf progjetist e costrutôr di fors Hofmann; altris a forin clamâts in tancj paîs europeans tant che tecnics e esperts.