Sul DIZIONARIO DELLA MUSICA ITALIANA PER BANDA E GRUPPI DI FIATI, Biografie dei compositori e catalogo delle opere dal 1800 ad oggi, Vol. II, di Marino Anesa, BG març 1997, a pagjne 215 'i cjatìn scrit:

"GUERRA, Vincenzo Celso (Buja, 1905). Inizia lo studio della musica da ragazzo col vecchio maestro G. B. Bruni (figlio di Francesco Bruni, insegnante di armonia e contrappunto al Conservatorio imperiale di Vienna dal 1827 al 1830) e col maestro D'Arienzo. Approfondisce in seguito lo studio della strumentazione con gli insegnanti Dini e Frezzaio. A 15 anni comincia a scrivere diversi ballabili, eseguiti dalle orchestrine del Friuli. Nel 1936 compone una commedia musicale per le scuole dal titolo Nella terra dei Dubat. Nel periodo 1946-1970 dirige le Bande di Buja e Artegna. È autore di musica da camera, un'Ave Maria e numerose composizioni per banda: 3 sinfoniette, 3 rapsodie furlane e circa 20 marce, dedicate ai paesi friulani o, su ordinazione, ad alcune grosse ditte svizzere. Ha trascritto per banda brani da opere e operette. Fonti: corrispondenza con il compositore. Composizioni: Marcia deH'amicizia, Dicorato 1996".

Uautôr Marino Anesa nus presente un "dizionario" de musiche taliane par bande, ven a stai i nons di compositôrs, cul catalogo des lôr opares. Si trate di un lavoron, dulà che, cun 2460 nons di autôrs, si met in vore un procès critic di revision de nestre 'storia della musica' che al varess di puartâ a componi il profîl de vicende reâl de musiche (dal 'fâ musiche' e dal 'scoltâ musiche') inte nestre culture e inte nestre vite.

Guerra Vincenzo Celso al è cognossût a Buje come Celso de Lugane e come 'El mestri di musiche'.

Te sô vite al à simpri vudes dôs passions: le musiche e le storie. Le mari (1862-1951) 'e jere une 'Zorzòn Eustacchio di Urbignà, il pari (1855-1928) al jere un di chei di Nan, simpri stâts a stâ su, le place di Madone, dopo vignûs a Solaris indulà che Celso al nass el 7 di lui dal 1905.

El non di famée lu varess dât le none Ane Lugan, maridade cun Agnul di Nan (n. 1830), che pal so caratar plui fuart di chel dal omp 'e dominave jè le famée e cussì 'e varess fat cjapâ a dute le sô gjenìe el non di chei de Lugane. ('I notìn a chest proposit che ancje in altris câs a Buje il sorenon di famée lu à dât le femine lant a marît intune cjase indulà ch'e vignive ricognossude le sô autoritât o di portament o di dote; Celso al fevele di sô none come une femine 'unevore imperiose').

I Lugans 'e jerin benestans, 'e vevin cjase su le place di Urbignà. Chei di Nan 'e vevin une cravuate a Madone par modons e cops, che ju puartavin su pe Cjargne, pardiplui in cambio di bores di fajâr, tocs di un metro e vincj, un metro e trènte, ch'e lavin a cjoiju tal "puart" di Osôf, là che, menâtsjù pal Tiliment, ju misuravin "a pas". Le tradizion di fornasîrs si sarès perpetuade cul pari 'Zuan, capuçat pes Gjermanies.

Célso di frut al à simpri vude passion di musiche, compagnade di une memorie musicâl straordenarie: bastave che al sintiss un toc par podê tornâ a sunâlu cu le armoniche a bocje, ancje se nissun no i al veve insegnât. In timp de prime uere al veve voe di vê un strument, un clarìn; el pari i dà un sac di patates; Celso lu vent, al cjate un clarìn di seconde man par 18 francs e doi francs ju torne a so pari. Lu sune cence fastidis, posto che ancjmò a cinc agns al à imparât a sunâ dibessôl; cuant che al ven a mancjâ un di chei dal Buess che al veve un clarìn, strument dai miôrs, lui s'al fâs imprestâ.

Dal moment lu sune e dopo al va a scuele di teoriche di musiche lì di un ingegnîr eletrotecnic, Venchiarutti Riccardo di chei di Suprian a Madone, che, vint stât a scuele a Graz in Austrie e dopo a Vicense, si jere laureât a Grenoble in France (so discendent al 'è chel Riccardo Venchiarutti che al fevele pe television taliane des situazions economiches e di cemût ch'e van i marcjâts dai bêçs in dut el mont).

L'ingegnîr al sunave el viulìn e al jere capo di une orchestre di bal ancjmò dal 1918-'19 che al jere stât riformât di soldât e nol jere lât in uere (n. 1899). Celso al va lì di lui ogni dì, ogni dì, gustâ e partî subit misdì, a cjapâ lezions; dopo a cjase a studiâ. Cussì par un biel pôc. Intant al sune simpri tes orchestres di bal e al cjape ce che i covente par pajâ ancje un altri mestri che i varess completade le formazion te leture de musiche e tal sunâ.

A San Scjefin dongje dal Marcjât, tal ultin plan de cjase des Adosches al viveve el mestri Bruni, di famée di musiciscj, diplomât a Pesaro e fî di chel Francesco insegnant di armonìe e composizion al Conservatori imperiâl di Viene. Bruni al à le sô biele etât, al à passade le otantine dal '19 e al 'è vignût a Buje dopo che siore Albine, femine dal Tintôr, 'e jere restade vedue e 'e veve tirât a stâ cun sè le gnece Adosche, maridade cun tun dasseâr e mari di tre frutes e di un frut. Bruni al è propit un brâf mestri e Celso al va a lezion ogni dì.

Dopo cuatri mês chest personagjo 'i dîs: "Jo no ai nuje plui di insegnâti; par perfezionâti tu puedis lâ dome al conservatori". Al cîr dopo di convinci el pari "Che lu mandi indenant che jo j ai vûts plui di mil alievos a scuele di me ma so fî al 'è stât el miôr, non di ai vût un compagn. Jo lu siguri: al deventarà un musicist grant". Ma el pari no lu scolte. Les lezions di Bruni no vevin costât cuissà cè, 20 francs al mês, nancje un franc ae lezion, tant par dîle juste, e i bêçs Celso ju veve ducj vuadagnâts sunant, che dome dopo ju dave al pari par che al passàs dal mestri a pajâ, che lui, 'Zuan, vicepresident de Bande fondade dal 1897, al frecuentave el cafè di Cavalèt a San Scjefin, mai une ostarie a Madone. Ma nol vâl nuje: el pari al voleve che al lavoràs pai cjamps.

Les capacitâts di Celso 'e fevèlin dibessoles: al ven cognossût e al fâs amicizie cul vicediretôr dal Istitût Musicâl di Udin, mestri de bande Municipâl di San Denêl, Dini, che 'i insegne strumentazion. Dini al jere un mèstri che al veve diretes opares, ex mestri di bandes militârs, al vignive da l'ltalie Centrâl e che dopo al varess sostituît Mario Mascagni te bande Citadine di Udin. Un grant mestri di clarìn al è D'Arienzo, napoletan: Celso al va di lui par perfezionâsi, di Buje in biciclete fin in vie Liruti, ta chê cjase rosse, lungje e strete; un'ore di lezion 'e ven a costâ 10 francs (1923-'24). El mestri Felice Fortunato Frezzato al à voe di vê Celso inte sô orchestre dal teatro di Glemone, lui, omp rafinât, venezian di nassite, marídât cun tune Falomo, che al veve alievos ch'e insegnavin intal Istitût Musicâl di Udin.

Sunidôr inmò di cuant ch'al jere pôc plui di frut, al va di breârs aes sales: de prime fieste a Madone al breâr grant di Muris; dai veglions di Dartigne al Tabeac.

Le frecuentazion di int plui grande di lui lu met in contat cun tancj aspiets difarens de societât, che lui, simpri atent e curiôs al cjale, al cîr di capî, formansi une cuscience pulitiche e civîl, notant i gambiamens che 'i passavin sot dai vôi. Le int ch'e bale al Tabeac no jè chê ch'e sta a cjalâ di là de plonche sui breârs des sagres.

Tes sales 'e va dome une cualitât di int, le stesse ch'e messedave bêçs e robe par fâ sù un podê diferent di chei cognossûts. Le analisi storiche che in dì di vuè 'e salte fûr des esperiences di chei periodos (e che nus ven contade) 'e à fondes fûr da l'ordenari; le memorie uniche, precise e fine di Celso 'e rive a trasmeti no dome ce che al è sucedût, ma ancje ce che lu à fat nassi. Eco che tal sunâ si insede une culture storiche e une passion pe Storie cu le 'S' majuscule, che 'i vevin acenât al inizi e che 'i varìn mût di spiegâlu miôr un'altre volte.

Un episodi de vite di Celso - secont nô - al po jessi cjapât come emblema dal rapuart tra storie personâl, events storics e musiche. Lât sot de nae (presentansi el 10 di mai dal 1925), nancje metude le divise lu fàsin mestri de fanfare dai alpins. Al sarà lui a dirigile el 4 di novembar dal '25 sul Monte Festa el dì de inaugurazion de lapide inmurade par ricuardâ chel pugn di soldâts de VIII artiglierie 'Fortezza' che, sot dal comant dal cjapitani Winderling, 'e vevin tignût bot cuintri de avanzade dai mucs tra el 30 di utubar e el 7 di novembar dal '17 (disfate di Caporeto, inizi de invasion).

Lui le invasion le veve vivude di frut cun dute le sô famêe, cui fradis plui grancj in uere; de resistence di Feste al veve sintût a fevelâ. No jè finide. Ta chê zornade stesse al sucêt el atentât di Mussolini, cjessût par gran part a Buje. Le sere, co al torne in caserme a Glemone, 'e rive le notizie: ducj i soldâts 'e rèstin sveâs, fusîl in man, cun puartes e barcons sprangâs. Ancje culì Celso al 'è spetadôr e protagonist di momens unics, che si tiéssin un cun chel altri.

Congjedât el 24 di setembar dal '26, al torne a sunâ.

I breârs plui grancj ju vevin a Feagne e ju puartavin, par esempli te Gravate el lunis di Pasche, cun tre cjârs apueste e cui cjavai. Operaios specialisâts ju montavin in pôc timp sui trâfs, el palco de orchestre al jere alt un metro e mieç, lunc tant che el breâr, riparât aes spales e ancje cuviert dut cul len, les lûs; atôr atôr 'e coreve le plonche di len come une ringhiere. El bréâr al jere come el paviment di une sale: par ch'al less ben di sbrissâvie balant 'e butavin polvar di savon, che cul lâ des ores al deventave plui che no une cere.

Le prime sagre 'e jere chê dal lunis di Pasche, cun miârs di lôr ch'e vignivin dongje dai paîs dulintôr: si tacave a sunâ subit dopo gustât e si finive adore, prin di miegegnot. Sagre grande e breârs 'e jerin a San Pieri di Tarcint, a Santramacul, le otave di Pasche a Culurumiz, in Cumierç...

A sunâ tes sales al tache cul so prin insegnant di musiche, Ricardo Suprian. I veglions dal Tabeac, là ch'e lave dome le miôr int di Buje, ju fasarà te orchestre dal mestri Amilcare Molinari: cjavei luncs, frac, magri, alt, istruît, (i soi a Buje 'e vevin dôs buteghes grandes passades dopo a chei di Gennaro). Molinari al sunave cun vôs delicade: al faseve vignî i sgrìsui cu l'Ave Marie di Gounot vie pe messe grande sunade cu l'orchestre ae fieste di Madone.

Al ten le musiche sul Tabeac par amancul vincj agns: i veglions in gjenerâl 'e tacavin tôr des trecuatri dopomisdì e 'e lavin indenant fintremai dôstre abinore; chel di Carnavâl al durave fin siet di matine. Simpri sunâ cun lui: Gurizze, Tumieç, Dimpeç, San Danêl.

'E sôn i agns trente e Celso al fâs lé semiprofession: prin clarìn te bande di San Danêl e tante orchestre, ancje lavôrs cjapâtssù cun sunidôrs sot de sô direzion: a Glemone te sale di place Garibaldi, dîs agns te Gravate tacant cu le prime di primevere, simpri breârs, a Osôf cui Lenùzza.

A Dartigne le sale 'e jere al prin plan, cun logjon parsore, Celso al dave spirt ae fieste: une cinquantine di balabils e el so clarìn simpri in vore. Lì 'e vevin el buffet e dopo le cene, parade jù di corse, tôr des dîs di sere, al passave un a visâ: "Al'è pront!" e Celso al smontave dal palco. Lu spietavin doi ûfs di bevi: "Mi tratavin ben, unevore!".

Dal '33 al jere el An Sant (mil e nûf cent agns de nassite di Nestri Signôr Gjesù Crist); a Culurumiz, su le place de stazion di Tarcint, pe otave di Pasche 'e vevin fat un biel breâr; di Udin si ferme un treno plen di int. Sul plui biel de fieste, cul breâr plen, 'e rìvin i carabinîrs a visâ ch'e jere ore di finî: 'e vevin batût les dîs, par regule e par rispièt de religjon no si podeve plui balâ (el stess fat al sucedarà ancje tal curtîi di Mosar in Tonçolan cu le orchestre Molinari: "Ancje dal '22 co al 'è muart el Pape si veve scugnût finî, int o no inf). Dute le int 'e lave a balâ, no jerin altres distrazions, no jerin nancje cines, nol jere ni 'zuc di fotbal, nol jere nuje; 'e vevin cualchi automobil a Buje, tre cuatri; ducj par svagâsi 'e lavin là ch'e jere le fìeste: nol jere altri.

Chel altri mistîr al reste simpri leât 'e tiere: setôr, vie pe setemane tal soreli pai cjamps; les seres e dutes les domenies impegnades d'astât cu le musiche.

Dal 1938 al scuen lâ pal mont: al va in Gjermanie par doi tre mês; al passe l'unviêr a cjase e el mês di març dal '39 al torne a partî e al sta fin al 10 di novembar dal '43. Al 'è in Prussie, al sune intune Associazion Orchestrâl, te bande citadine di Zella Mellis (Lipsie), in Turingie: une regjon industriâl plene di fabriches ma dulà che nol vignive nancje un pièç di lidric in dut el mandament, dome bosc e sîs mês a lunc le nêf. Tant frêt, montagnutes boschives e tes planes fabriches: 17. 000 abitants e 25. 000 operaios ch'e rivavin cui trenos e cun corieres a vore ogni dì.

Ogni fabriche 'e veve le sô musiche, une fabriche di machines di scrivi 'e veve orchestre e bande. 'E smetevin di sunâ dome in ocasion des grandes bataes: cuant ch'e an cjapade le Polonie 'e an sospendût les fiestes di bal, dopo, finide le batae si podeve divertîsi come che si voleve; tre setemanes di soste di musiche ancje cuant ch'e an fate le uere cule France. Celso al torne a Buje dome pes fiestes.

Dal 1942, delegât di tredis grups di dutes les fabriches de zone, tant che responsabil de distribuzion dai gjenars alimentârs (che de Italie 'e rivavin a Berlin in plui de tessare pai migrants talians a vore in Gjermanie), al veve le note di ducj, ancje dai 'zovins in etât di soldât. Cuant che 'i domandin di spedî le liste cui nons di chês classes, al fasarà di dut par ritardâ le compilazion dai documents che il Consolât 'i domandave, par che cheste 'zoventût no foss spedite sul front.

Apene capît che l'Italie no durave e par no sei obleât a tornâ vie, al fâs domande di rimpatrio definitîf, che senò dopo cuindis dîs 'e rivavin i carabinîrs a cjase e lu spedivin diret in Gjermanie.

inide le uere, dal 1945, rivâts i Anglo-Americans, ch'e balavin di un continuo, Celso al va a sunâ par lôr, ch'e vevin cjapâts i miôrs albergos di Tarcint, robe di lusso. 'E vignivin a Buje a cjoli i sunidôrs cu le gip, 'e davin di mangjâ e di bevi tante di chê bire che si le puartave a cjase e sore ancje 'e pajavin ben, che al viveve cun chei. Dal 1945-'47 al cjape le direzion de bande di Madone, che il mestri Vriz al jere impegnât cul Comitât di Liberazion.

Al partirà pe Svuissare dal '47 dulà che si fermarà fin tal 1970, salvo i periodos di crisi dal 1949 al '55. A Horgen al sunarà simpri te orchestre di un amî di Lear, Fessler, diretôr de Orchestre di Zurigo, vint stât a Viene, Parigj, Londre.

Celso al cjate ce che al veve cirût: le ocasion di sunâ i grancj musiciscj e ancje di vê une culture musicâl plui complete, cognossi Beethoven, Mozart, Schubert, no vint vude cumbinazion di sunâju prime. I concerts ju tignivin inte glesie protestante e nol puéss dismenteâ l'Incompiuta di Schubert, cu l'alternâsi di assoli di clarìn e oboe, cuant che - finide cheste part - el mestri si môf e 'i dà le man a lui, Celso de Lugane, prin clarìn: "7 vês sunât propit ben", denant di ducj.

Tornant aes interuzions pe crisi dal lavôr, lu cjatìn a Buje par un an Mestri de Bande di Buje dal 1949; dal '50 al '51 mestri de bande di Dartigne e insegnant pai fruts; 1953-'55 mestri de Bande di San Scjefin e di Madone; (diretôr de bande dai Alpini del Regno di Buja inte sfilade dal 1955 a Triest, là che Sisto di Mont al ten le tabele in man).

Par cuindis agns daurman al fâs dute une tirade in Svizzare, fin ae pension. Rientrât definitivamentri al cjape in man le bande di San Scjefin e 'i fâs di mestri dal setante fin al setantecinc.

'I podìn dome inmagjnâ tropes partidures che Celso al à cjapât in man, opares interies, trope musiche che aî à lete, trop grande che si jere fate le sô culture musicâl, se di fantàt al sunave fasint i traspuarts, rivant a sunâ a prime viste le robe gnove e a memorie ancje les danzes di Brahams.

Compositôr al 'è stât dal principi, apene tacât a sunâ al à tacât a scrivi musiche; culì 'i nomenìn dome le comedie musicâl in doi ats scrite dal 1936: Nella terra dei Dubat, ambientade in Eritree vie pe uere, su libret scrit de mestre Eme Pauluzzi di Lugan e presentade a ducj i fruts e ai mestris des scueles di Buje tal cineteatro di Madone. Comedie complete, cun ouverture, coros (di fruts), duetos, dut in tes regules.

Par ducj chei che 'i domandin al scrîf musiche, tant. (*)

Dopo dal taramot, passade le setantine, che Enore Pezzetta al veve tant insistût, fate le domande a Rome, al va a Triest in vie Filzi te sede de Societât dai Autôrs a dâ resamp par autôrcompositôr. Le sô amicizie cun Carìo Pirola, (mestri colaboratôr al Teatro della Scala di Milan e dal '88 titolâr de catedre di Strumentazion par bande al Conservatori di Milan, dome par contâ alc) lu puartarà a trascrivi par bande pars di opares e a chê Marcia dell'Amicizia ch'e à tignût dongje le int e comunicât tantes emozions vie pal concert fat a Buje pai vincj agns dal taramot. Celso le à scrite a novante agns.

Che al sedi un personagjo lu dîs dute le sô vite, che al conte cun. arguzie, cun memorie infalibil, fasint dutun cun storie, pulitiche, antropologje, tornant indaûr fin ae metât dal votcent par 'fonti dirette', se di piçul al fevelave cul von Pieri 'Sau Sava, militâr de cavalarie austriache te batae di Sadowa, lât a montâ i cjavai sul treno inte stazion plui vizine: Lubiane.

(*) Su II Gazzettino domenica 24 settembre

1950 'i cjatìn scrit te cronache di Glemone: "Per onorare la memoria del m. o F. F. Frezzato:... È stata da tutti vivamente apprezzata la composizione 'Estremo Addio' che Guerra Celso di Buja, già componente del complesso bandistico diretto dal m.o Frezzato ha composto nella triste circostanza ed è stata eseguita dalla banda della Pro Glemona, nell'accompagnare all'ultima dimora l'esimio professionista".