Il secul ch'al finarà di chi a pôc, al à vierte une gnove e biele pagjne ancje in te storie de musiche furlane.

Gnoves leves di musicisc', cun lidrîs ch'a si slargjn in tun membri musicâl nudrît de liturgje de glesie di Aquilée, des balades e dai cjanz popolârs, a' si fàsin numerôs sul tacâ dal nûfcent.

Cun lôr a' nassin ancje tanc' grops corai, polifonics e folkloristics autonomos dal servizi liturgjc, motivâz de voe di cjantâ insieme, de voe di studiâ robe gnove, de voe di scuviergi un mût gnûf di musicâ. A' nas la forme corâl "a cappella". Tra tanc' cultôrs o ricercjadôrs furlans 'j cjatìn Luigi Garzoni.

La sô vite 'e ven insiorade di composizions dulà che si scrusigne dolz ricuarz di zoventût e malinconies tipiches dal nestri Friûl. Armonies semplices e cadenzes ritmades dal sun des cjampanes 'a clamin cu la sovranitât dal crodi in Diu e a' fàsin corone a peraules di ogni dì. Fevelades e motez sintûz des femines ch'a lavòrin tai cjamps, riadades tal conoasi pal morosut, dolors di miserie impastâz ae voe di crodi in tun doman plui biel a' son la poesie di Garzoni.

Cun cheste sacoce culturâl il Mestri par Buje al à scrit un cjant intintulât: "Cjant di Buje". Si trate di un "inno" a tre vôs fat su misure in ocasion dal 1150° aniversari dal prin document ch'al ricuarde Buje. Al inizi dal 1942, il Mestri al mandave al comitât promotôr pes celebrazionis dal aniversari, le bozze dal so lavôr.

Di lì a pôc il spartît al passe in tes scueles local par fâsi imparâ dai fruz, che in tal astât dal stes an a' vignivin direz par man dal stes Garzoni sun tun palco alestît pe ocasion su le place dal municipi. Il Mestri, cun "Cjant di Buje", al à insiorât di grant il nestri paîs scrivint une melodie "legrute" che a miez si volte in "andant".

Il cjant aí finis in tun "Viva Buje" acentât par sotolineâ il volê sei di Buje par chel che lu cjante. Clarece di peraules in onôr ai nestris viei a' vegnin firmades di Garzoni sul pentagram cun semplicitât. Chê semplicitât che va drete tal cûr.