Romeo (Giordani) al è nassût tal curtîl di Miot, là ch'e rive le androne dal Mago Bide, dal 1909, a Ursinins Pizzul. Sô mari 'e vignì di Rìul. 'E veve sposât Tubie Miot ch'al saveve ben piturâ e decorâ cui stamps vecjos faz a man. Romeo, fin di pizzul, al vodè so pari a doprâ pinei e colors e cussì al imparà a doprâ chê sorte di impresc'. Vint buine man e bon estro tal doprâ i pinei, i soi viei lu mandàrin a imparâ le buine tecniche dal disen in tes scuelis di Ursella, dal pari di Maria Forte e pò dal vecjo Lucardi.

Al jere propit un frut estrôs e cun buine voe di imparâ i trucs che plui tart j varessin permetût di lâ a decorâ lis glesiis ator di Buje. Quant ch'al vè cutuardis ains al tacà a golosâ par sunâ e cussì i predis di chê ete a' conseàrin il vecjo Tubie di mandâlu a studiâ a Udin. In chê volte no jerin corieris o machinis e Romeo al scugnì lâ a Udin a pît par cjapâ lis lezions di musiche in te scuele di S. Cecilie.

Al imparà a sunâ il clarin e cussì al jentrà te Bande di Buje quant ch'al dirigjeve il mestri Casasola. Romeo al cresseve e ben planc si mostrave come un 'zovin plen di iniziative, bon timp e voe di lavorâ. In chê ete la musiche vie pal mont 'e tacave a vê une svolte e ancje a Buje si sintive e si sunave il "Jazz". Chest gnuf mût di sunâ al conquistà Romeo che di buine lene si metè cui soi amîs a sunâ in compagnie.

Cun lui a' sunàrin Vigjut de Cosse, Cleto de Peressine, Lino Covas, Giuseppe Masso e Gino Veri. Plens di entusiasim a' nomenavin il loro comples "Jazz Giovinezza". Chest non al dîs dute la lôr voe di fâ, la lor 'zoventût e il lôr gust di sunâ ancje cjanzons gnovis par fâ balâ la int in tes sagris di pais.

Di sigûr Romeo Miot nol tirà il cûl indaûr quant ch'al jere di lavorâ come senografo oltri che come atôr e cussì al partecipà a "Il segno della croce", "La rosade di sêre" e a tantis altris oparis che in chê volte si fasevin a Madone, Vile e S. Scjefin. Quant ch'al murì il mestri Casasola, ch'al veve la direzion de Bande di Buje, Romeo al cjapà in man acje la fadìe di diretôr par tignì dongje la int e fâle sunâ. Chest so lavoron al tache dal 1931 e al dure fintrimai al 1937.

Dal 1937 al là a istruî i fruz uarfins di vuere dal colegjo di Cividâl e cussì al molà il so lavôr par podê impegnâsi dal dut in chest gnuf mistîr. Quant che l'Italie 'e jentrà in vuere, lui come tanc' altris al metè la divise di alpin e al partì pal front. Quant che il burlaz de vuere al finì il mont al jere cambiât. 'E jere miserie e cjasis di regolâ e a Romeo j tocjà di meti adun la valîs di carton e lâ pal mont. Dal moment ch'al tornà par restâ tal curtil di Miot chei di Ursinins Pizzul lu viodin simpri come chel 'zovin plen âi morbìn ch'al sunà e ch'al fasè l'atôr in tes dades dal teatro cun Rosalie e Pieri Cost prime di partî.

Planc planchin la int a' podè tornâ a ridi e a passâ il timp cul cerneli plui seren par lâ a viodi Romeo tes placis di pais. I soi amîs, Marino Bolzon e Aldo Colaut, j stavin dongje quant ch'al faseve lis sôs senis macaronichis par fâ ridonâ la sô int. Romeo s'izegnave a fâ di dut e cussì un pâr d'ains in tes sagris di S. Josef al doprà un cjar di fen par fâ un palcsenic ambulant che la int di chê ete, ricuardant peraulis muchis, lu clamave "pruc".

Lu decorà cum bon gust. Par completâlu al veve fat cul carton un organo dulà che Marino al faseve fente di sunâ come un grant orchestrâl. Ce ridadis in chê volte i fruz e i granc'! Inmò cumò la int dal lûc 'e cjante: Non vedi che l'albero sdrindulla, le foglie son tutte svuelettate, e la jerba è infruttuhta, che il lidricco è tutto sfolpeatto che i ramacci son tutti ingredeatti...

Ma Romeo non smenteà le Bande di Buje e cussì al tornà a judâ i 'zovins a imparâ la trombe, il clarin, e duc' i strumenz ch'e coventin par meti in pins une sorte di orchestre. Tal timp libar che j lassave il lavôr che j veve insegnât pari Tubie si impegnave simpri par colaborâ cu lis associazionis bujatis. Al dè une man ancje ae cantorie di S. Scjefin sunant il clarin o il viulin par compagnâ lis messis grandis dal Tomadini, dal Perosi e dal Candotti.

Quant che il mont al deventà un freghenin massepassût par Romeo Miot 'e vignì la ore di polsâ e cussì al restà simpri plui dongje dal so curtîl. Pal balcon de cjase sô al viot passâ int e robis che gambiin masse di corse. Lui al è di chêi de ete passade, quant che si veve timp par fâ un sium o par cirî un ami par fâ ridi la int.