| Poesie e musichis sul taramot Framieç des manifestazions inmaneadis par memoreâ il cjadalan dal taramot, e spiche la propueste dal "Circul culturâl laurenzian" di Buie e dal "Grop corâl Bueriis". Tal spetacul "Friûl risurît, inmaneât cul jutori dal coro "Gruppo Panarie" di Artigne e dai "Balarins di Buie", a intindin di presentâ ator pal Friûl un sielte di poesiis par furlan dedicadis a la tragjedie dal taramot e lis musichis componudis di Luciano Turato sun tescj di pre' Domeni Zannier. De ricolte dai bocons poetics e di chei musicâi al è saltât fûr un volum trilengâl (furlan, talian, todesc) cul stes titul dal spetacul "Friûl risurît. Tal toc ch'o presentìn sot vie Roberto Frisano al presente lis musichis dal mestri Turato dì Buie. Luciano Turato al cjante il taramot memoreât tai viers di Domeni Zannier cu la sensibilitât dal so stîl e la sclete facilitât comunicative. Come che i tescj a son disponûts te forme de vilote (cu la carateristiche cadence dai viers otonârs tirâts adun in strofis di cuatri, lis rimis vualivis, lis vocâls lungjis dapît il viers), cussì ancje lis musichis si pandin travanadis des fuartis lidrîs furlanis, scuasit che par fevelâ di un acjadiment ch'al à lassât il segn tai furlans no si puedi fâ altri che esprimisi cu l'intonazion de melodie furlane. La forme essenziâl dai viers, lis inmagjinis semplicis di un mont che nus è propi (l'orloi fermât, il mês di mai, il cjiscjel, il fogolâr, lis sisilis... ) a son stramudâts in sun cul cjandôr de melodie direte, ravenade, cun lambris armoniis. Il discors rampit dai sengui cjants ju rint anêi di une ideâl cjadene, o miei arguments diviers di une uniche liende. Piçulis inmagjinis musicâls dulà che ju intonos dramatics a tocjin nome pôcs moments tal ricuart di tragjics acjadiments, biel che un spazi significant e à la lusorositât dal contâ in musiche, dulà che il dolôr al semee jessisi aromai cangjât.
Te scriture dal composidôr o scuvierzìn, aduncje, i segns dal cjatâsi intune cui modui musicâi furlans. Tal tiessût des vôs dispès o ricognossìn lis familiârs tiercis paralelis des dôs parts superiôrs e la metriche omoritmiche. In maniere significant e marcade, come che dispès s'intive tal cjant furlan popolâr e d'autôr, ancje cuant che i tems tratâts a son maluseriôs o dolorôs (pensln nome aes tantis vilotis che a tratin in forme in aparince serene tems come il s'indelâsi, l'abandon, l'amôr contrastât). Significative e je inmò la conclusion cul acuardi maiôr dai pôcs bocons scrits tun implant minôr: e je l'anime pusitive di un Friûl che al à scombatût e al à vinçût a cuistâ spazi tal dìscors espressîf di Turato. Tra lis composizions o voressin ricuardâ cualchidune che nus à cjapât par piçui ma preseôs particolâr: "Mai 1976", ch'e rint l'emozion di une invocazion coletive. "E son grancj i fruts" e "Gleseute" pe lusorositât dade al paesaç al bailant timp componût e in fin "Ven sù biel" pa rintimitât esprimude des indivinadis sfumaduris melodichis e armonichis. Ma il coronament emotîf de interie ricolte al è cence altri "Cûr di mari". L'umane vicende contade e cuiste fuarce e pathos de vieste fate di suns, achì tratade in mût plui slargiât e variât rispiet a altris tocs. Lis trê danzis strumentâls metudis dentri in cheste cente essenziâlmentri vocâl a dan rilêf inmò di plui al sens de sperance apaiade, te recuperade gjonde, tant che o podìn forsit considerâlis come rituâls formis di ringraciament pal Friûl risurît tes cjossis e tai oms. |
