"Scomparve nella sua natìa Raveo... lasciando alla famiglia, al suo paese di nascita ed a quello di adozione ed a quanti ebbero la fortuna di beneficiare della sua amicizia un'eredità di bene che non morrà". Chestis 'e son lis ultimis riis di un scrit di Emma Pauluzzo, la "Maestre Eme", ancje jê personagjo cun tanc' meriz te crescite culturâl di Buje.

'E puàrtin la date 8-XI-1982. Pôs ains dopo, ancje la maestre Eme nus vares saludâz par simpri, lassantnus in ereditât i Balarìns di Buje. Famee, paîs di nascite (Raviei - Raveo) e di adozion (Buje), int ch'e à vût la furtune di cognossilu 'e son duncje i eredes dal ben grant che Luigi Vriz al à lassât.

De sô famee jo 'o cognòs di persone nome Teresine, ma 'o sai ch'e jere une famee grande, di int ch'e viveve il so lavôr come une mission. Romano Aita, su "Cjant a Buje" (numar unic dal '91 pai vincjecinc ains dal Coro di Buje) al dîs: "Il maestro Vriz è scomparso lasciando la vocazione dell'insegnamento elementare alle fíglie Maria, Teresa e Rina (anche la moglie era maestra), della musica al figlio Domenico, valente membro della locale banda... " Teresine, une maestre di chês ch'e an rivât a mertâsi il premi di viodi che i soi fruz di scuele, ormai granc', 'e vadin ancjmò a cirîle, 'e cjacare di so pari cun tun afiet che si viodilu grant daûr des peraulis, misuradis e silenziosis come che jè jê.

Tai soi ricuarz di cuanch'e ere frute, tai 'zucs su lis rivis des Vedêles e tal curtîl là che si cjatavin duc' dopo vê fat i compis, stant atênz di lâ a cjase prime ch'al saltas fûr il lôf di Mont (ch'al cjapave i fruz ch'e stavin atôr ancje se al ere scûr), in duc' chei ricuarz si viôt so pari. "'O ai tant 'zuât" 'e conclût cence nomenâlu, ma lassant capî che daûr di tante serenitât 'e jere la figure di doi gjenitôrs ch'e son stâz boins di tirâju sù cul rispiet di duc' i impegnos, ma ancje lassantju gjoldi i ains plui biei da l'infanzie.

Raviei al è il paîs dulà che Vriz al è nassût qualchi an prime ch'al finis il secul, ma al è ancje il paîs dulà ch'al è muart, in tune zornade d'estât da 71. Al è un paîs, duncje, che lui nol veve mai dismenteât, ancje, se lu veve lassât quanche al veve nome vinc' ains.

E ancje Raviei no lu à dismenteât Lui, se jè vere che a lui lassù si pense simpri cun afiet e ricognossince in dutis lis iniziativis culturâls e soredut musicâls, opûr ricuardanlu, come che al pâr ch'e stedin fasint, in tune publicazion sule storie dal paîs. A Buje, duncje, al è vignût a vinc' ains. Al è di chel moment che chei di Buje 'e an comenzât a gjoldi chê ereditât che lui al vares lassât lunc dute la sô vite e ancje dopo.

Lu veve puartât chi la scuele: al ere mestri elementâr, ancje se al veve fat il liceo classic, e al veve vude la prime nomine propit chi, tes scuelis comunâl di San Scjefin. La scuele di Madone 'e sares vignude un pôs di ains dopo, une volte fate la vuere dal '15-'18 e vê ancje frontade la prisonie a Mauthausen.

Tornât a cjase, so pari i veve dite che i veve salvât de invasion dai Austriacs il violin e la biciclete, come dî la musiche e il contat cu la int: dut ce che i coventave par tornâ a inviâ la sô creativitât di mestri, di musidst, di atôr e di organizadôr. Di lui come mestri si vìsin i soi scuelârs che cumò 'e son ancje nonos, e jò 'o crôt che qualunque mestri al sares content di sei ricuardât come che lôr si vìsin di lui.

No còntin cemût ch'al insegnave a lei e a scrivi, o a fâ i conz, ma cemût ch'al semeave sevêr e cemût ch'al ere, invessit, pront a capî e soredut a dâ ce ch'al veve dentri. Miez cjargnel e miez furlan, cu lis qualitâz di duc' i doi i caratars al descrîf il so "dentri" il professôr E. Santi in tun articul su "Monede di Buje", une publicazion de Pro Loco dai prins ains setante.

E duncje dentri al ere riservât, ma al saveve stâ cun duc', clâr e lineâr tal contâ lis robis, ma ancje bon di svuelâ su l'idee di gnovis iniziativis, tant di semeâ imprevedibil. Cussì al ere mestri, ma ancje musicist e atôr. Lis tre musis 'e vivevin insieme dentri di lui parceche no si contentave di coltivâ lis sôs passions te musiche e tal teatro, fasintsi une culture par sè, ma al rispuindeve soredut ae bisugne di trasmeti a chei âtris la bielece di scuviergi ce che la musiche o il teatro 'e puedin dâ.

Clara Aita, de famee di Cesar, di Soremont, une des tantis personis che si vìsin dai ains passâz a imparâ cun lui te Filodramatiche, 'e conte di cemût che lui al saveve tignî la scene ancje nome jemplant la pipe, dant doi colps di tos e bevint un got di vin, cussì di fâsi scoltâ plui pal so silenzio che pal cjacarâ. 'E dîs: "Nol ere facil lavorâ cun lui.

Al pratindeve il massim, e il massim, ae fin, nô i devin. 'O vevin sudizion di lui, epûr quanche nus clamave 'o corevin. Nus bastave il so mût ruspi di dinus grazie par ricompensânus di dut. 'E jè vere che in chê volte no ere television, ma 'o vevin âtris divertimenz e cun dut chel nol ere nuje che nus ves jemplade la vite co me che oris passadis cun lui a fâ provis te stanzie frede dal vecjo cine di Madone.

Buje e Osôf, Raviei e Vile Santine e duc' i paîs dulintôr 'e an batudis lis mans denant des comediis e dai spetacui che 'o puartavin atôr cun lui". Clara cumò no recite plui, ma 'e sa contâ storiis a chei fruz come che pôs âtris 'e san fâ. Nol è tant che te scuele di Vile, là ch'e van lis sôs gnezzutis, 'e à tignût cu la bocje vierte par un'ore novantenûf fruz, imbambinîz a sintîle contâ lis storiis dal Bide.

E se si domande atôr dulà che à imparât a contâlis cussì ben, si sintisi rispuindi: "'E à fat teatro cun Vriz". Ma chestis testemoneancis non son nome un fat sogjetîf di cui ch'al à alc di contâ. La vite di Vriz e jè un lunc calendari di tapis dulà che musiche o teatro 'e an lassât il segno fin dai prins timps ch'al è rivât.

Par esempli, dal '11, subit dopo metût pît a Buje, il plevan di Madone, Giuseppe Bernardis al à capît che chel mestri al saveve insegnâ unevore di plui de gramatiche e dai numars, e cussì i à dât di meti dongje une cantorie. Un pas plui indenant 'e jè stade la volte dal circul mandulinistic, par sunâ tes fiestis dal paîs, ma ancje ta chês de glesie.

Mandulins: al semee impussibil che in tun timp dulà che si stentave parfin a meti dongje il gustâ cu la cene, e le istruzion, se lave ben, si fermave prin ch'e finissin lis elementârs, qualchidun al ves rivât a meti dongje un trop di int ch'e saveve lei la musiche e sunâ un strument. Inmagjnâsi, po', ce ch'e vevin a disposizion par fâ circolâ i tocs, par copiâ lis partiduris... e no stin a cjacarâ di ce ch'e vevin te sachete par comprâ i strumenz: 'o stin fevelant dai ains Vinc'! La Filodramatiche, chê ch'o vin fevelât qualchi rie parsore tes peraulis di siore Clara, 'e jè vignude subit dopo e dal '25 'e veve già rivât a fai concorince a chê di Osôf, metint in scene oparetis come "La scuola del Villaggio", "Ma chi è", "La mania del lotto", "Rosignolo". Plui tard, simpri plui dificil, si passe parfin a lis oparis lirichis, cun tocs di Ponchielli, Rossini, Donizetti... La sô vôs di bas (un biel bas, potent e profont, e' dìsin) 'e jemplave la sale e jentrave te int che, cence visâsi, 'e viergeve il cûr ae musiche.

Eco, jo no crôt ch'al sevi un câs che a Madone e' vìvin in plene fuarce ben dôs associazions musicâls. No crôt, come che qualchidun al dîs, che une realtât dal gjenar 'e puedi sei spiegade nome dal fat che in chest borg si sint plui fuart un spirt di cjampanîl ch'al sa organizâsi in associazions e iniziativis.

Tradizion e alfabetizazion e' son lis basis su cui 'e met lidrîs la culture musicâl e Vriz lis à costruidis madòn par madòn, dutis dôs: no stín a smentâsi che lui al tacave dai fruz, slungjant la lezion di scuele di une miez'ore par insegnâur a lei la musiche.

La fondazion, ains dopo, de Filarmoniche di Madone, la bánde che ancjemò cumò, cul mestri Franco Molinaro, e' ten dongje int di dutis lis etâs, e no nome di Madone, tal non de musiche, (e i risultâz ju ai viodûz cui miei vôi tal concert ch'e à fat prime dal ultin Nadâl!) 'e jè la conseguence naturâl di chest semenâ inteligjent, atent a no butâ vie semencé.

Ancje il fat ch'al sei un so scuelâr Luciano Turato (ch'al à fat de musiche ancje la sô profession) a tignî dongje il groput di cantôrs ch'e an dât vite al coro "Vivaldi", che a Madone al lavore già di qualchi an cun tun voli di riguart ae polifonie, mi semee che al sevi in linie cun cheste strade di ideis e di fats.

Ma l'ereditât di Vriz no si è fermade a Madone, simpri ch'al sei pussibil pensâ che un fat culturâl e educatîf di chê dimension al puedi jessi sierât dentri dai confins di un teritori. In veretât si conte che a Buje 'e vedin tentât di sierâlu dentri dai soi confins fasint in mût, ma no sai cemût, che une sere nol podes meti in scene a San Scjefin un spetacul ch'al veve tal cjâf di fâ.

Forsit, però, l'invidie 'e à la gjambe curte come la bausìe, tant al è vêr che lis primis vilotis che il coro di Buje, nassût dal '66, al à metût in repertori 'e son stadis chês di Vriz, insieme cu lis plui vecjs rapsodiis popolâr e cun chês dai nestris plui granc' autôrs furlans, come Garzoni e Zardini. "Lis sisilis", "La mê lusignute", "La mê sera" e "La balconela" erin i tocs che i cantôrs di don Luigino D'Agostini, che a Buje j voleve ben dute interie, 'e puartavin atôr tes rassegnis in dut il Friûl e ancje fûr, cu la braure no sôl di cjantâ ben, ma ancje di podê dî che chês musichis li veve fatis un di Buje! Mi visi ancjmò (e chest, finalmentri, m'al visi di persone!) il moment quant ae Sagre de Vilote di Felet, dal '67, 'e à comenzât a girâ la vôs, dopo confermade cun dutis lis cerimoniis dal câs, che "La balconela" 'e veve vint il "Furlan d'Aur". Mi visi ancje di chel vecjut, ch'al è montât sul palco e al à alzât i braz par saludâ la int che i bateve lis mans.

No ere la prime volte ch'àl cjapave un premi: a Vignesie, dal '27, un grup folkloristic preparât di lui e dal segretari comunâl di Glemone, un cert Rossetti, al veve cjapât il secont premi in tun concors nazionâl; dal '32 'e jere stade "La mê lusignute" a vinci un prin premi a Passons. Sodisfaziôns e ricognossimenz erin vignûz dongje di ogni bande in tanc' ains, epûr in chê sere lui al ere content come un frut. Chê 'e jè stade la uniche volte che mi visi di vêlu viodût. In realtât ce che lui al à dât ae filologje musicâl furlane al è cence presit.

La composizion di vilotis, ma ancje l'impegno a cirî e a cjapâsù da la vôs vive de int i motîfs popolârs de nestre tradizion, opur il lavôr cun Tite Zorzini, Someda de Marco, Giso Fior, Mario Argante o par musicâ lis lor poesiis o in ogni câs par aprofondî lis quistions de musiche furlane e la lungje colaborazion cu la Societât Filologjche e' son faz ch'e van ben al di là dai cunfins di Buje.

Par dutis chestis resons 'o crôt che Luigi Vriz al merti un grazie: un at di ricognossince che la bande e il coro di Madone 'e an già mostrât, ancje cu la partecipazion dai fruz de scuele ch'e an metût in scene "I emigranz", un toc teatrâl che il mestri al veve scrit di 'zovin. Ma ancje il grazie, come l'ereditât che lui al à lassât, nol pò vignî fûr nome di Madone: e jè dute Buje ch'e à di vê braure di vêlu tra le sô int.