Sagre a Maian

Al fo un scherz che ancje dopo agnoruns mê agne no podeve vê inliment cence che no j lès al cûr e che les scalmanes no j tengessin di ros la muse.

Madone d'Avost sul palombâ da ambui e Maian in gringule pe sagre dal paîs. Fin de vilie un cori, un lâ sù e jù indafarât, un netâ, un lustrâ, un ridi murbinôs di fantates imboreçades e, tes ostaries, un sgherbetâ e un svoletâ di gjalines e di poles, jenfri les mans pôc dulinzioses des massaries.

Tal dì de fieste, cîl clâr e tenar come une sede e canicule morestade da un ajarìn fresc ch'al dave vite. Legri scampanotâ di cjampanes e sunâ di trombetes, baraches di colàs e pevarins: Silie de Vuere, cul so gei di classùs e favetis, la Talachine ch'e sberlave la sô marcanzie, fasint sglinghignâ tes sachetones dal so grumâl blanc carantans e palanches; e les fusetes e i falconès prons par sei tras sul cuel da l'Arie.

'E rivave in vene di frae la siore di Sandenêl. Jl turtîl di Pieri di Sefe, cui vistîs cjassôs des siores, al jere un prât in flôr. Me agne 'e veve podût vê il balcon cul plui biel vedè da l'ostarie e di lassù s'e gjoldeve a cjalâ chês magles di colôr e i siôrs ch'a scolavin i bocai tan' che pleres. Giovine e biele di cjoli il flât, il vistît di scree di sede nere a gales e camufs e un grum di spagnolìn atôr dal cuel, 'e semeave une regjne.