Soi pronte

Lusignute

simpri plui basse

tal lumin squasi suiât.

Ultimes fuees

d'un arbul disfueât,

colin les ores

te eternitât dal timp.

Daûr di me

une lungje strade;

denant pôs pas:

'o soi rivade.

Ma ancje dopo

al lusirà il soreli

tal turchin ridint

dal cîl

e les gnos

saran plenes di steles

e i gris cjantaran

a mil a mil...

e jo tal scûr, bessole...

Signôr, ce baticûr,

ce sgrisui jù pe schene!

Ma anìn: soi pronte!