Timp passât
di Francesca Marini Barnaba |
1955 |
Slambri di lûs fra il scûr dai miei ricuars il fresc incjant de mè dolce zoventût lontane. Alis d'áur vevin i miei siums chei dîs, e il paradîs sieravi dentri il cûr, e l'ilusion che al durás eterno. Qualchi lagrime ancje, ma no lassave pene; qualchi sospîr ch'al dispierdeve il vint. I dons plui biei cun mans colôr di rose mi ufrive la vite, 'po un par un ma j à robâs il destin. |