Jo lu cognòs il curtîl dai Cjaforz

e 'o sai

che l'ajar dai palûz al ven

cu la vuate dal Sec,

a misturâsi

cu l'aghe e la lavuache dai pedrâz.

Si fruzzònin i segnos de gjarnazie
finide, te piere alte di un volt.
Ise sable o salmandrie? (1)

Cumò miserie indade di famèis

che àn un fum par cjamìn,

une puarte,

un balcòn,

e quatri cantinelis sul piûl,

e un slambri di soreli.

Al vose un malodôr di blestemadis

de puarte sul cjanton

s'e ven tarde la fie de Morate

cul uadagn di une gnot

e miserie salvadie

dentri i vôi.

Dibant 'e sune messegrande
pe rive di Sanpieri.

Par Nine 'e àn la lûs frede

i veris des ramadis

par petenâ la sàssare ingriside.

E se Aghite 'e zighe lis pacadis

da l'om, nol ven jutori

des puartis dulintôr sieradis.

— Che si rangj! ·—

Si maravèin i mûrs

dome par peraulis buinis.

Al zorne un blec di cîl turchin,
dut par so cont, cu lis sisilis.

Par Tite il vin
al è soreli.

Un frut sentât al friche
su la piere sclesade di un scjalm.
Lis lagrimis j lavin la musute
e j slargjn il turchin dai vôi.

Al vai Beput:

un dûl dut su la muse

come il flôr dal lavaz a fîl

di aghe.

J al puarte vie imburide une sisile.

I pîs in tal paltan

e un toc di pan,

Si vîf ancje cussì.

'E slache adore la gnot
tal curtîl dai Cjaforz.

(1) E' una sciabola o una salamandra... raffigurata nello

 stemma di pietra della chiave di volta del portone dei Ca' Forte?