Se al tornàs il von! di Roberto Ongaro |
Il nono al è tornât dal mont lavie dilà e rivât su la place si è metût a cjalâ: "Nò, nò, nol è pussibil, il paîs nol è chest, une volte la place e jere il plui biel puest! 'Ne volte si cjantave, là sot dai moronârs, cumò o vin un curtîl plen di piere e ferârs!" Al va a messe prime come che al jere usât, ma il puarton de glesie al cjate biel sierât; nissun nol jeve adore par adorâ il Signôr, parvie che fin es cuatri ducj a son stâts atôr. Alore al va in canoniche cun chê di protestâ e al domande dal predi par podê fevelâ. La perpetue i rispuint che il predi al è a durmî e se al ùl propit vodilu che al torni tor misdì. Il von che tegnadiç al ê di simpri stât, cuant che al sunà misdì da gnûf si è presentât, Ma il predi spazientît i dîs cun arogance che nol à timp di pierdi che al à di lâ in vacance. "Ce mont - al pense il vieli Ca si ê dut ribaltât, ce che al valeve in timp cumô al ê dut scartât!" In chel al viôt 'ne zovine e al reste un pôc scjassât, che e â il luvin de panze crot e ditaponât. Al prove a custumâ la frutate daurman, ma chê i rispuint di bot; "Va a viodi jù a Lignan!" Stant che sicu fantasime il viaç no i coste nie, lui al monte sul pulman e par Lignan s'invie. Jesus Marie No vessial fate mai une tâl, apenis rivât là, robis che i vegni mâl! Tetis crotis pardut e cûi metûts in mostre e oms cun mudantins che a platin sôl la borse. Al pense alore il vieli, dal maressial di lâ, par che al viodi chel scandul e lu fasi fermâ. Ma chel si met a ridi e i dîs: "Se al fos dut li! Viodial là chei dôi masclis? Son sposâts chealtre dì!" "Ma cemût le cumbinino, la gnot a fâ l'amôr?" "Chescj no son afârs miei, chescj a son afârs lôr!" "Sì sì - al dîs il vieli - alore o viodarai se o pues fâ fâ une leç che e freni un pôc chest vuai". Al va di corse a Rome diret in parlament, a dîjur di fâ smeti chel scandul, dal moment. "Cemût isal pussibil che in cincuant'agns, pôc plui, la nestre societât no si le cognos pui?" "A son stadis dôs vueris di cuant che o jeris vô dut si è aromai mudât, sin mudâts ancje nôí Une volte un ministri che al fos incriminât, dentri vincjecuatroris si jere za copât. Cumò se un tribunâl, par câs, no i da reson, al fâs tant fin che al mande il judiç in preson! Chi, cuant che un onorevul al gafe une poltrone, nissun no lu discole, nancje se e cole Rome". "Sì, sì, o ài capît - al dîs il nono scuintiât -al è miôr che jo o torni di là che o soi rivât!" No steit a lâmi vie cussì, dal lamp al ton! No vês inmò viodût il scandul dal balon! E nancje no savês, che il re, subìt tornât, par un cumierç di ses 'l è stât incarcerât; cundiplui no savês che un vescul di colôr al pratint di sposâsi, dî messe e fâ l'amôr". "No mi impuarte plui nuie che cun chel che o ài viodût o indi ài fin sore il cjâf, o soi bielzà passût!" Cussì il nono al rinuncie a fâ la sô vacance e al torne cu lis animis là che e jè plui creance e al conte ai siei compagns cussì biel clâr e tont, cemût che chi, in mieç secul si è dissipât il mont. |