............ E i ulivârs novêi 'e son crešsûz
vie pes culines cu les fuées di arint.
Verdes e neres 'e àn frutât ulives
che il frantôr al masane fracujades.
Vert inaurât pe canalete il vueli
garp al spissule cul fluî a mondâsi.
Penč si travase in vâs di tierecuete.
Si žonte il vueli ai alimenz scuvierz
dai fîs de piere ch'e van oltri piere.
Vierte 'e jè strade che no finìs mai.
Fate 'e jé Plumie di ulivâr e arc.
Chel liquit, colorât di fuarce e pâš,
chel sanc di cîl lu sint našsût tes mans.
«Vueli di un arbul sant, ti benedìssino
i secui ch'e saran face l'uman.
Tu vegnis de fusion di tantes sûrs
e di tanc' fradis come il pan e il vin
a di che union 'e crès les robes miôrs
e che la tiere cîl 'e jé e semence.
Tu sês l'ongint da l'anime e dal cuarp
e tu vincis la gruse e la feride.
La piel 'e ven di lûš, co tu ti spandis,
si viest di tenerece e di flession.
Tu cuincis fuèes di vite e di salût,
la cjâr dal plan terestri e il mont marin
e biel sôl tu alimentis lenghe vive.
Ti dopraran i umans sacri element,
viersanti ai vôi celesc' sore les ares.
Tu sarâs cûr a làmpades lusintes,
la virtût di clarôr ch'e plèe la gnot.
E il to ongi sacrâl al darà glorie,
ream e profezie, divin esisti
dilà des albes e di mil aurores»............

da "Filii petrae" pag.130 di Domenico Zannier