.........Séjal il vin benedizion celeste
che di tanc' àsins une al fâs bevande,
che di sô mari vît i ùmin 'e mòlgin,
che ploe, soreli e tiere lu àn nudrît.
Dai lavris dal presint al è conquiste,
dai cjalis ch'e saran al è la glorie.
Di turcli e sacrifici al è trionf.
Lagrime e sanc di un len intorteât,
vene che no socomp, plante divine,
tu nus compagnis di gjenerazions
ai granc' travuarz in sucession di vites.
Al à il sorêli vie pal dì i colôrs
che il jessi to 'e svarìin dal blanc al rôs
tal àjar animât di monde lûš.
Sacri tu sês vignût par ogni rît,
ligrie par ogni fieste dade al om,
la bušsade ch'e scjalde timp e tiere,
il levan d'ogni art e d'ogni amôr.
Cu la ricjece e cul podê tu incjòchis
cui ch'al abuse dai tesàurs ch'o avìn.
No àn di cirîti pai amôrs pierdûz,
pai falimenz ch'e incòmbin e ch'e son,
ma venerâti in taule e cercli uman.
Al spirt tu sês confuart, fuarce al pinsîr,
scjale di Cîl a vê divinitât.
Chest al è il cjant dal vin che l'omp al alce
dai dîs de piere fin al nestri cûr.
Par cui che gust al à cun reson vere
la vite no pó jessi improibizion............
