Le blancje dal comunâl

El trentedoi di maj tal mîltresinte e cjapilu tun cjscjel nomenât: Mont di Buje, al rivà un fi dal cont di Gurizze cu le sô spose. Lui un biel omp, 'zovin, alt e ben tressât, jê inmò miôr. No tant alte 'e veve une muse di Madone e un'ande di regjne. Bionde tant che un cjamp di forment el mês di jugn.

È vignivin a comandâ el teritori pene cuistât a suns di ueres cui Patriarcjes di Aquilée. Buje ju acolzè cence tante gjonde: e' jerin masse ains ch'e pativin par chês batostes tra Gurizzans e Patriarcjns; cu la pôre di lâ di mâl in piês. E jerin ains di miserie di spacâ cui conis, di no vê vonde nancje ce mangjâ.

El Contìn al tacà daurman a meti mans tal Palaz dal cjscjel co al jere saltât fûr unevorone in disordin dal assedi. Int di mistîr e di voe di lavorâ a Buje a'nd'jere come ch'a'nd'è simpri stade, a gejs, e cussì el lavôr al leve indenant spedît e el Palaz in pôc timp al tornà miei di prin. I doi 'zovins cun dute le servitût e el seguit e' larin a stâ une biele dì dal mês di maj; une zornade meraveôse cun tun soreli clip e un bon odôr di ogni fate che si faseve dongje dal bosc sflurît di mil roses.

Un cîl net indarintât; si podeve viodi di lassù dutlung il Friûl fin al mâr. Finît di justâ el Palaz al jere di rifâ dut el cjscjel cu les tôrs e les muraes di cinte dal borg di Mont. Á larin vie un grunp di ains par finî dute chê vore; el Contìn al jere indafarât stant ch'al conduseve lui dutes chês vores.

Cussì le 'zovine che si clamave Eline, 'e jere simpri bessole; cence lavôrs di sorte si stufave a stâ simpri tal cjscjel o atôr pal borg ancje s'al jere un puest meraveôs. Alore 'e comprà un biel cjaval blanc e 'e tacà a lâ atôr pai borgs di Buje, sù e jù par chês bieles culines.

Une dì, rivade a Sacastoe, s'invià sù pai Pravis, ma subit tacade le rive 'e cjatà un trop di piores a passon che no le lassavin passâ. Jê 'e dà un berghel, ma les piores no si scomponin. Bot e sclop al saltà fûr dal bosc vissin un 'zovin sui vinc' ains, biel come une statue greche con doi voi ch'e lusivin come perles. Le 'zovine 'e restà inbambinide cence peraule.

El cûr j bateve tant ch'el mai dal batafiêr di Tombe. Parades in bande les piores, le 'zovine 'e podè continuâ le sô strade. Prin di partî però 'e scugnî dâ une olmade ancjemò a chel biel 'zovin. I lôr voi si incuintrarin par un moment; un lamp di passion a dîsmil vols al burì fûr lassanju sfinîs.

D'in chê volte ogni dì Eline 'e leve di chê bande; e ogni dì el 'zovin, che si clamave Laurinz, si cjatave ta chel sît cu les piores, tant che no vevin pui jerbe di siminâ e e' scugnivin rontenâ le scusse dai arbui. Par un mês dilung dome cjalâsi e passisi cui voi. Ma l'amôr nol'è brût di verze e une biele dì les piores no an savût dî indulâ ch'al jere lât a platâsi Laurinz cu la sô biele.

Le robe 'e leve indenant di mês e nissun s'inacuarzeve di nie, ma tai paisus le curiosetât 'e jè come le mari dal diaul, passant di bocje in bocje 'e rivà fin al Contìn. Tal prin al stentave a crodi, ma fas i dovûs controi al cunvignì che le robe 'e jere serie.

Al comandà a Eline di no movisi dal ciscjel e viodint ch'e no veve redenzie par scjafojâ le robe in cjase le sierà dentri le tôr dal cjscjelat, ben uardeade dai soi omps. Ma si sà che les femines se si metin alc tal cjâf pûr di tignîlu e' butin parajar el mont intîr. Eline soredut ch'e jere unevore biele e nemorade no à stât tant a cunvinci les uardies a lassâle scjampâ. Une gnot di un scûr come in bocje 'e saltâ fûr de tôr e jù pe culine come une rassenade incuintri a Laurinz ch'al spietave in Dobes bielzà visât di un amì di Eline.

E vie di corse el pui lontan pussibil cence nie cun lôr, dome cîl e tiere e el lôr grant Amôr. Ma si sà che les robes bieles no durin a lunc e cussì dopo un pôc di timp, che jo no savarès dî trop, e' forin cjatâs. Si sa che i siôrs di une volte no sopuartavin el scandul, soredut in famée, vint libero arbitrio su le int; insomis Laurinz al fò condanât ae forcje e Eline sierade dignûf te tôr.

Tal doman a buinore prin ch'al crichi dì, pene fûr de murae dal borg, viers S. Florean, tun cjamp che cumò e' disin dal Comunâl, Lu picjarin cence remission. Eline dopo un an 'e murì di crepecûr. D'in chê dì a Buje e' disin che l'Amôr al è uarp tant che un farç. È contavin ancje, i vons, che in illo tempore une volte al mês si viodeve une femine dute blancje, stralusint, ferme tal puest che lu an copât, in pose di preâ.

S'al passave qualchidun par lì 'e sparive tun marilamp viers el cjscjel, cumò S. Sebastian, lengint el malcapitât cun tun reful di ajarin. Nol'è tant ch'al è sucedût a une femine di Mont ch'e vignive sù di S. Florean, une gnot scure scure che par ajar s'inbastive une boadice dal cjàdaldiaul, 'e sintì, passant par lì, come une man sfrissaj i cjevej; j son vignûs i sgrisui fintremai tai talons.