Su pe rive dal Ricovero, in àins tant indaûr, nissun varès pensât ch'al sarès vignût ancje l'asfalt. Cussì nancje il Gjgj, il biel sauro vuarp tal voli zamp, di Pieri Cost, ch'al stave di front de gleseùte dal Ricovero (tal volt a comodon, lì ch'e colàvin duc' in biciclete), nol ere parecjât pe gnove mode di cjaminâ e al vève ancjemò lis vecjs scarpis di fiêr cence cjalcon di gome. Mi ricurdi che quant che si partìve par lâ tai cjamps di Pieri, dongje dal simiteri di Mels, Vergjnie, sô sûr, 'e vignive fûr dal puarton a viodi la strade.

E, quant che nol passave nissun j faseve segnâl di lâ. Pieri alore al disève: - In non di Diu, Gigj. Biiist! - e vie! Tal puest de strade di cumò si lave pe ferade, ch'e sarès là ch'e vèvin di fâ passâ il treno, e jo m'impensi che lis cjaradoriis 'e semeàvin binaris, tantben, ch'e erin fatis. Sun chê strade nol piulave il cjâr. La jerbe 'e ere come un tapêt par cjâr e cjaval, e talpis e ruvedis no fasevin nissun sunsûr cul passâ.

Quant che, plen il cjâr, si tornave ben planc indaûr, finide la ferade a cueste de braide di Pieri Balìn, al ere un plasê scoltâ il clòp-clòp des talpis dal Gigj che, menant il cjâf par fâsi quilibri tant ch'al cjaminave, al pensave ae rive-sù che lu spetave di lì di Sefe fin a cjase, lassù dal volt. Il cjâr, plen di meniche, ch'o sepi jo, al à simpri pesât, ma chel cjaval che, jo frut e lui 'za vecjo, lu tirave, nol mostrave di fâ fature a movilu.

Par jentrâ tal curtîl al 'ere un scarpèt e, alì, si viodeve il Gjgj a slungjâsi e Pieri, cu la redine in man, dut comprendût a fâj fâ chel ultin sfuarz. E si rivâve di soresere par vie dal viaz lunc e par no che il cjaval al ves di stracâsi, masse cul soreli. Po, vie comàt e belancîns, il cjaval crot; al 'ere polsâ. Intant che, a man, si parave sot l'arie il cjâr par discjamâlu, Pieri, cun tune baretate di vene in man, al controlave che, par chel cristian, al fos stât dut in ordin te stale. No lu ài mai viodût a bussâ chê bestie, ma quant ch'j diseve: -Sssscassât!... - al 'ere, secont me, come quant che si busse la morose: afièt e vonde!