La Ferade

«Bambino, conosci Vittoria Piemonte?»

«Sì, è la mia mamma!»

El tenente, sul so cjaval blanc al monte sù el frut e si fâs compagnâ tal curtîl.

Smontât di cjaval e tirât jù chel frut al à cjapât bracecuèl chê femine ch’e fò in Ongjarie, co’ lui al ere frut, a servî te sô famèe a Budapest.

’E tàche cussì, par me, le storie de ferade. Gno pari nol mi veve mai contât chest fat e, dopo muart lui, jo lu ài savût e mi è tant cjâr e mi è simpri denant i voi ancje se jo no ài cognossude chê none. Duncje si dîs intôr dal 1914.

Mi ven a mens trop impuartante ch’e jé stade le ferade par duc’ chei di Ursinîns in tanc’ àins.

Le opare dai borgesâns, vie pal an a vôre pal mont, si svilupave cence grande primure e el lâ dal timp al ’ere segnât dai orlois dai tôrs o dal mangjâ dai nemâi di cjase e nissun scûr lève e nancje un gnûf clâr al jevave cence vê dât o perecjât fadìe.

I fruz però ’e son simpri stâz fruz e la lôr energje si sbrocave in corses e zucs fin quant ch’e vèvin etât di vôre (e chê ’e vignive adore adore). Pes femines fâ fruz e lavôrs di cjase, pai omps il seâ, fâ fen, sclapâ, e po’ un fregul di ostarie par chêi ch’e tornavin finît stagjon. Alore i fruz (chè le scuele no ’ere di oblig) a brène smolade e fûr dal pericul di toglâz e falcèz e cuârs di vacje e vuargines si devin adun prime sule plačute di Sant’Oséf e po’ sule ferade.

Pe veretât un pericul lajù al ere parceche te concje viers el Nivisêt ’e levin a nadâ ma chê int ’e ere come les lisertes tal movisi e come el pèš par stâ te âghe e po’ les famèes ’e vevin plui di cumò fiducie di Diu e i fruz in chel sît no fasevin vignî nissun ingoš.

Sicome che jo no ’eri no savarès cemût contâ i zucs ch’e fasevin ma, tal borc, la vite ’e à mantignût dutes les usances e chel che gno pari e i siei amîs ’e fasevin scuâsit cent àins indaûr nô, cun qualchi zuc modernizât, lu vin fat compagn’.

Par chest jo mi domandi: ma chèi che no àn le ferade dulà vàdino a zuâ? Alore dopo tanc’ àins mi soi inacuart che le ferade ’e jè stade taponade; le strade là ch’al veve di passâ il treno e ch’è vève come unics viagjadôrs qualchi caravane di singars e che le scjavačave dome Treleres cule cariole e le damigjane di âghe cumò ’e jè taponade di catram e al è un vagovegno di camios e vetures nissun cjâr e mancul vacjes o cjavâi però, par no ruvinâ le puisîe, parsôre chel sît chêi di Ursinîns ’e metin un tendon par fâ tornâ chêi di une volte  in tal divertiment e, invesse di lâ a nadâ o a tràj cul carburo o a cirî rotams pal pečotâr, ta chê magje ’e scuvièrgin un’ore in compagnìe, un gòt di vin bon e un plat di polente e lujanue.

No jè plui buse ma ’e jé simpri ferade.

---------------------------