P a š s i o n

No soi mai stât oseladôr ni mai el nît al è stât, par me, une ricercje di ûs e passarîns.

No ’eri ni miêi ni piês di chei cun chê pašsion, ma jo no cjatàvi grant in­terés par lùjars e gardelîns, frangèi e dordines e, par me, un montan o un sgrîsul ’e ’olevin dî frêt che s’inmanèe e nêf vissine.

Pašsion, però, ’e jé vite e, a voltis, muart.

La pašsion ’e fâs bòli il sanc; e ’e fâs čavareâ, scuasit pierdi il sintiment. Pense a vinc’ àins conche la bombasine di frut si srarìs e si tàche a sintî la pice de žoventût e si scomence cul cjalâ les fantacines e si sint che cûr e coradele si tòcjn e si scancassin e si sint a scarabotâ di dentri e si pânt cul deventâ di ogni colôr se si strengisi un l’altri e se, po’, ’e ven dongje cul lâvri ch’al trimule (no di frêt) alore si dismentèe il mont, si ferme il timp, si distude l’amont, no si capìs nuje: cussì ’e jè la pašsion!

E, se tu la provis, al è un dolôr fisic che si sfante e, po’, ’e finìs.

No tu capissis ch’e scuèn finî parceche ti dà une emozion fuarte, parceche ti ’emple dentri, parceche ti scjalde, parceche... parceche...

Ma al è just ch’e finissi par vie che si deventarès màz, no si resonarès, no si lavorarès: no si podarès vivi dome di pašsion!

I fruz no puédin capî el limit, el moment di fermâsi e ’e vàin cuant che si ur insegne, cun fadìe, a calmâsi, a pensâ.

Par un frut el nît ’e jè une atrative par dôs resons impuartantes: prime par­ceche di usance al è fàt e pojât pal àiar e po’ parchè lâ a nîz si fâs come di scuindon.

Che un frut al ciri di rimpinâsi no jè une nuvitât; al tàche cul rivâ ae tete pal so past e po’ vie-vie fin a lâ sui ramàz dai arbui, sui cops di cjase, sui tôrs fin àes cjampanes. La vite ’e jè mistereòse: nus fâs platâ les robes plui biéles e mostrâ chês piês; cussì si platìn ancje par 1â a nîz!

Co’ si devente omps si varès di ’essi ecuilibrâz, no si varès di 1â su pai arbui; si varès di scoltâ il cjant, di cjalâ il svuél, di cognossi la razze di ucèj cun co­lôrs e cjant tant diferênz e ch’e dan emozion e ch’e mostrin la libertât e la purece di cìj incontaminâz.

Invesse no jè cussi.

L’ami di un gno ami al è lât a nîz di chèche; el arbu1, 1isêr, lu à refudât e lui al colà: ròt il fîl de schene!

Dis àins al à patît distirât, no paròn di mòvisi bessôl.

Vuè j’an fat il funerâl: che Diu lu vedi in glorie cul cjant dai cherubins!