Pieri Menis di Luzian Verone

Nol è facil cjatâ un scritôr ch'al rivi a tirâ l'atenzion dal letôr fin des primis riis come Pieri Menis (1892-1979), stant che si "jentre" subit te clime de sô conte o dal so romanz e, une volte scomenzade la leture, si à voe di lâ fín in somp.

Pieri Menis, al à scrit Sgorlon, "al à vût il gust di contâ", di riferî ce ch'al veve viodût o vivût, insiorant daspès lis contis cu rinmagjnazion e, tal stes timp, doprant une scriture sauride, sclete ma misurade.

Chest autôr al à segnât un moment impuartant te nestre leterature, parceche cu lis sôs prosis al à contribuît a slargjâ l'orizont leterari furlan, e no dome pe cualitât, ma ancje pe cuantitât dai soi scriz, ch'a van des liendis, les contis, al romanz. Cundiplui la grande paronance dal imprest lenghistic j à permetût di fâ vivi tes sôs pagjnis une vore di formis idiomatichis e di peraulis ch'a partègnin al furlan e ch'a stan colant in disméntie, come "meti i scûrs a plomp", "vê lis gjambis a treule", "smecâ", "tachil", "sorâ" e tantis altris che pal plui si cjàtin dome tai vocabolaris.

Pieri Menis al jere nassût a Geà, in comun di Trep Grant, ma co al veve disevot agn la sô famee si jere trasferide a Ursinins Grant di Buje, dulà ch'al à vivût fin ae muart. 'Za a dîs agn al veve scomenzât a lâ pes Gjarmaniis come fornasîr -"par capî di dulà ch'e vignive" -; soldât tai alpins al jere stât ferît te vuere dal 15-18 e, dopo la rote di Cjaurêt, fat presonîr e mandât in Polonie. A vuere finide al jere tornât a Buje dulà ch'al veve inviât une pizzule ativitât comerciâl. Dopo de seconde vuere mondiâl si jere dedicât cun impen ae ricercje storiche sul so paîs, a scrivi pai gjornai e a iniziativis pulitichis, sociâls e culturâls, dant vite ancje ae "Accademia Bujense degli Accesi". Tal so tabachin al veve une vecje machine di scrivi

pojade parsore une stue di modon refratari e lì, tai momenz di polse tra un client e chelaltri, al scriveve. Daspès 'a làvin a cjatâlu amîs, magari par fâsi contâ lis gnovis, opûr par savê ce ch'al stave scrivint. Alore lui si trasformave tun conte-storiis vivent stant che, come 'za dit, al veve il plasê di contâ, anzit, al jere nassût par contâ, e chest si pò calumâlu ancje leint cualchi sô conte autobiografiche. Fin di frut al veve chê di lei dut ce ch'al cjatave, al scoltave, al osservave, intassant te memorie faz, personis, situazions, lûcs. E apene ch'al podeve al faseve tornâ a vivi ogni cjosse cul so penâl che, tanche un pinel, al disegnava cun grande netisie lis senis, inluminant o scurint i cuadruz di vite e magari inflochetantju cu la fantasie.

'Za dal 1928 al veve scomenzât a publicâ "Lis lejendis di Buje" pes edizions di Del Bianco di Udin, une ricolte di contis tra storie e liende, tramandadis de tradizion popolâr. Al jere dome il prin scjalin, parceche te sô vite al à scrit plui di dusintecincuante contis, ch'a son comparidis in diviarsis publicazions, come "La setemane rosse", "Ce Fastu?", "Strolic", "Vita Cattolica" e tantis altris.

Di chestis, otantedôs 'a son stadis metudis adun tun libri dal titul "Contis e racconti", vignût fûr dal '88, cul patrocini dal comun di Buje e la prefazion di Carli Sgorlon. In chest libri 'a son ripuartadis ancje vincjevot contis par talian, stant che l'autôr al veve tacât a scrivi in cheste lenghe, ma al è in marilenghe che Menis al rivà a pandi adimplen la sô anime e il so sintî. Lis dusintecincuatetre paginis dedicadis 'es contis furlanis si lèin d'un flât e, a traviars la memorie dal autôr, si jentre te clime di un mont che nus à partignût e che par tanc' aspiez nus parten. Il

palcsenic des prosis al è il Friûl di Buje, di Trep, di Geà, il Friûl des cuelinis morenichis, là che i protagonisc' si mòvin e 'a vìvin la lôr stagjon te tradizion di simpri: scuasi come un destin 'za scrit. Come ch'e à scrit la Mirmina tun so contribût, Menis nol fâs nuje par gjavâ lis lagrimis al letôr, la sô 'e je une scriture serene, dulà che l'autôr al conte e al ties lis sôs tramis, simpri cu l'ande dal spetadôr. Cundutachel diviers 'a son i momenz di vere comozion, come "Cjasute dai ricuarz", "Il cuadêr de none", "La scuele dai fornasîrs". Altris contis, invecit, 'a son ferbintis, come "Il diaul", "La gjate", altris ancjemò vivarosis e divertentis, cun duc' i petez des feminis, come "Il sotpuarti". In ogni câs, contis ch'a son simpri une testemoneance dal vivi de biade umanetât di cheltimp.

E se chest discors al è riferît 'es contis, grand merit 'e àn sei il prin romanz "Sul agâr", sei il secont, "Chei di Murae". "Sul agâr", publicât de

S. F. F. dal 70 e cu la prefazion di Andreine Ciceri, al è un romanz dulà che l'autôr al à fat tesaur da lis esperiencis des contis, creant cussì un romanz plen di atmosfere, dulà che intôr di Matie, il protagonist, si disglagne vie vie la vicende umane di une int tal periodo tra lis dôs vueris. Il secont, "Chei di Murae", publicât ancje chel de S. F. F. dal 75 cu la prefazion di Nadia Pauluzzo, al conte la storie di une famee patriarcjâl, dulà che la protagoniste 'e je done Pine, une femine autoritarie, atente tai afârs e paronite ch'e rive a ingrumâ palanchis e robe. Ma par cause di un fi, che jê 'e tignive come un dêt madûr, dut al larà sù pal stec e si concludarà cu la muart di done Pine.