Magna Teresa 

e Madrac Remigjo

I vevi tacât a clamâju in cheste maniere dopo che une mê cusine vignude di Torìn, par piemontês e clamave cussì mê agne.

Sûr di mê mari, agne Teresie, femine di Remigjo Sava, no vevin vûs frus. Jê sartore di cjimeses a Urbignà, lui cuasi dut el an a vore di muridôr in France (là lu clamavin “monsieur Savà”), specialist tai lavôrs dal modòn fugât. D’unviêr cuant che al tornave a cjase par un mês o pôc pui, a viodi de sô Teresie, par no pierdi l’abitudine al lavôr, al faseve cualchi spolêr di modòn atôr par Buje, propit biei; però chei che al comissionavin no vevin di dai trop di bevi durant le opare, se no  e ’erin disastros.

Un an, tornât de France, l’unviêr dal ’34 mi pâr, montât suntune cjadree, al à tacât a meti a puest i argains ch’e vevin sules stageres te cantine. Cussì spostant chestes robes, al fâs colâ par cjere une bombe a man, residuo di vuere che sigûr nol saveve che lì e fos stade, no si sa cemût. Fato sta che cheste bombe, batint sul paviment, e scopìe e e fracasce le cjadree. El barbe si cjate par cjere cun varies ferides, no graves, par dut el cuarp, però cun tun voli ruvinât cence rimiedi, che in seguit i vignarà gambiât cun tun di veri.

Sicome mê agne e veve già un voli di veri (si ere svuarbade di zovine) cussì e an fate le copie, e dopo ur tocjave stâ atens a no confondiju cuant che ju gjavavin, se no e lavin atôr cun tun voli maròn e chel âtri celest.

Dopo barbe Remigjo nol è pui tornât in France, al à fàs nome lavorùs atôr par Buje, cloties varies, dâ di blanc par ca e par là, e cualchi biele cjocute par fâ lâ in bestie agne Teresie, che ere un tipo une vore sufustiche. Cui cognoscins, par scusâlu e diseve simpri che ’erin colpe chei âtris a fâi bevi une ultime tace, che lui poar omp nancje no le varès olùde.

Une volte, vignût a Solaris a cjase nestre a dâ di blanc, gno pari dispetôs, durant el sblancjament i à dât di bevi fin ch’al è stât completamenti plen, tant che ae fin invessit di fâ un filèt parsore de fasce, al veve fat dut un sarpint mo gruês, mo sutîl, atôr de cusine. (Dopo al è tocjât a mi di regolâlu.) Finît el lavôr, sicome al veve di tornâ a cjase cule biciclete, mi an mandât a compagnâlu fin a Urbignà. Di Solaris a Madone dute rive jù, une volte montât sù, jù striscinant les çucules fin tal puint des Vedeles. Rivâs de agne, robes che no i dei, a jodilu dut in trambules, e rabiose cun nô parceche lu vevin imbeverât in chel mût.

Piês ancjemò e jè stade cuant che une domenie sore sere, lì di Cinai, e an visât che Remigjo, sigûr cjoc, lu vevin jodût colât cule biciclete, pognèt in tun fossâl sot de rive di Geà. Alore gno cusìn Teo, insieme a âtris amîs, e van a cjoilu e al mènin a cjase a mê agne cule cariole...

Restât vedul, gno barbe, par no sintisi bessôl te sô cjase, al à invidâs a stâ cun lui mê mari e gno pari, cussì al à tirât indenant ancjimò par un pôs di ains tra une cjocute e chê âtre. Catine, mê mari, j à cridât une sole volte, parceche e veve scugnût preparâi une podine di aghe cjalde, al ere rivât a cjase plen di vin e plens al veve ancje i bregons...

A gno pari Tite, invessit, i dave fastidi el fat che Remigjo, fumant el toscan (girât cule bore dentri in bocje), o cjicant, cuant ch’al veve le bocje plene di salive, al spudave sule lastre dal spolêr cjalt, par gust di jodi a fridi salive e bago. Fin che Tite i à dit: «can da l’osti, tu spudis sule lastre là ch’i fasìn buristî le polente, cheste po no tache» «Hee, ... vescul, ce utu ch’al sei!» dissal lui, però nol à pui spudât sule lastre, nome pal curtîl, sul pedrât, e cualchi volte sul paviment in cusine. Spudades che semeavin sbitiades di rasses o di ôcs.

Une dì al à olût scurtâsi cules fuarpes el sigar intant che lu veve in bocje, ma fasint mâl el calcul des distances, si tae un fregul di lavri. Alore i jè partide sanganade une des sôs bestemes pui grandes: «... vecjo!».